تۇنگى كلۋبتىڭ جارنامالىق بانەرىنە قۇرمانعازى مەن پۋشيكيننىڭ «ءسۇيىسىپ» تۇرعان سۋرەتىن سالىپ بەرگەن ۋكرايندىق سۋرەتشى رومان ستراتييچۋك ءقازىر ۆەتنامدا تۇرادى. داۋلى «ەڭبەگىمەن» اتى شىققان ول پوستەردەن شۋ شىققاندا ەلدەن كەتۋگە ءماجبۇر بولعان.
365info.kz پورتالىنا سۇحبات بەرگەن ول قازاقستانداعى جىلدارى، ءبىزدىڭ ەلىمىزدەن العان اسەرى مەن مۇنداعى مادەنيەتكە، تۇرمىس پەن قوعام ومىرىنە دەگەن ۇستانىمدار تۋرالى ويىن ءبىلدىرىپتى.
«مەنىڭ الماتىعا كوشۋىم وتە ءيمپۋلسيۆتى بولدى. جۇمىس تۋرالى ۇسىنىسقا ءبىر كۇننەن دە از ويلاندىم. ول كەزدە مەن قازاقستاندا تۇراتىن ءبىراز ادامدى تانيتىن ەدىم. الماتىدا دا شارۋالارمەن بىرنەشە رەت بولعام. سوندىقتان، قايدا باراتىنىمدى الدىن الا ءبىلدىم. ال، ءبىر ەلگە بىرنەشە كۇنگە كەلىپ كەتۋ مەن وندا تۇراقتاپ قالۋ ەكى بولەك ماسەلە»، - دەيدى الماتىعا 2013 جىلى كەلىپ، بىلتىر كوشىپ كەتكەن ول.
وسى ۋاقىت ىشىندە الماتىدا كورگەن-بىلگەندەرىنەن ول قالا ومىرىنە قاتىستى سىني كوزقاراس تا قالىپتاستىرعان.
«الماتىدا ساۋلەت جاعى اقساپ تۇر. قولدا باردى باعالامايدى. ءبىراق، مەن الماتىنى جىلى ەستەلىكتەرمەن ەسكە الامىن. ادامنىڭ ساناسى ناشار ساتتەردى ۇمىتتىرىپ، تەك جاقسىلارىن عانا قالدىرادى»، - دەيدى رومان ستراتييچۋك.
ۆەتنام، ۋكراينا مەن قازاقستاندى سالىستىرا كەلە ءبىزدىڭ ەلدىڭ حالقى بۇيىعى، ءوز قۇقىقتارىن قورعاۋعا تىرىسپايتىنىنا كوز جەتكىزگەن.
«قازاقستاندا بارلىق ادامدار تۇيىق، قىسىلىپ جۇرەدى.» ءوز ويىن ايتۋ، ەرەكشە بولۋعا، توپتان ءبولىنىپ شىعۋعا دەگەن تالپىنىس اتىمەن جوق. وسىنداي جاعدايدا ادامدار توپتان شىقپاي، كوپپەن بىرگە ءجۇرۋدى قاناعات تۇتادى» دەگەن ول الماتىدا كييەۆ پەن حوشيميندە كەزدەستىرمەيتىن قىزىقتاردىڭ دا از ەمەستىگىن اتاپ وتەدى.
كوشىپ-قونىپ ءجۇرىپ تىرلىك كەشۋگە ۇيرەنگەن سۋرەتشى قازاقستانعا ورالا الاتىنىن دا ايتىپتى.
«الماتىدان مەن ءبىرىنشى كييەۆكە كەتتىم، بىرنەشە ايدان سوڭ حوشيمينگە كەلدىم. قازاقستانعا بارسام تەك مادەنيەت ءمينيسترى بولىپ قانا بارامىن. كۇلمەڭىزدەر! ءدال وسىلاي جازىڭىزدار. قازاقستاننىڭ مادەنيەتىمەن جوعارى دەڭگەيدە اينالىسۋعا ءازىرمىن. سپورتتارىڭىزدا ءبارى دۇرىس. وعان تيىسپەيمىن»، - دەپتى سۇحباتىندا رومان ستراتييچۋك.
