قازاق زاعيپتار قوعامىندا تاعى دا شاتاق شىقتى. بۇرىنعى پرەزيدەنتىن سوتتاتىپ تىنعان ۇيىم وكىلدەرى بۇل جولى الماتىداعى فيليال ديرەكتورىن دا قىزمەتىنەن كەتىرمەككە بەكىنگەن. الايدا مەكەمە باسشىسىنىڭ وڭايلىقپەن ورنىن بەرگىسى جوق. ديرەكتوردى كرەسلوسىنان كۇشپەن الىپ تاستاماق بولعاندار اقىر سوڭى قىرعىن توبەلەستى باستاپ كەتتى، - دەپ حابارلايدى Qamshy.kz كتك ارناسىنا سىلتەمە جاساپ.

بۇرىنعى باسشىسىن تۇرمەگە قاماپ تىنسا دا زاعيپتار قوعامى ءالى تىنشي قويماعان. ەندى بۇل جولعى تالاس وسى قوعامعا قاراستى الماتىداعى وقۋ-وندىرىستىك كاسىپورىن ديرەكتورىنىڭ ورىنتاعىنا قاتىستى ءجۇرىپ جاتىر. 

التىناي يبراگيموۆا، قازاق سوقىرلار قوعامى №1 الماتى ءوقۋ-وندىرىس كاسىپورىنىنىڭ ديرەكتورى:

-بۇرىنعى ديرەكتور وسى جەردەگى بۇكىل قۇجاتتاردىڭ ءموردىڭ بارلىعىن، الىپ، 6 اي بويى ءبىزدىڭ كاسىپورىنعا جۇمىس ىستەتپەدى. ەندى بۇگىنگى كۇنى تاعى دا سونداي جالعان قۇجات اكەلىپ، ابىگەرگە ءتۇسىرىپ جاتىر. 

ال ءوزىن وسى ءوقۋ-وندىرىس كاسىپورنىنىڭ جاڭادان تاعايىندالعان ديرەكتورىمىن دەپ تانىستىرعان ازامات التىناي يبراگيموۆانىڭ وسىدان ەكى كۇن بۇرىن جۇمىستان بوساتىلعانىن العا تارتتى. سوندىقتان بۇگىن قالايدا قىزمەتكە كىرىسۋىم كەرەك دەپ وتىر.

تالعات ءپىرىمجانوۆ:

-زاڭ جۇزىندە قايتا سايلانعان جاڭا باسشىلىق ونى وتكەن 13ء-ى كۇنى جۇمىستان بوساتقان. ءبىراق ول ورنىن تاستاپ كەتكىسى كەلمەيدى. كەزىندە وسى قوعامنان ۇرلاعان 2،5 ميلليون تەڭگەسى ءۇشىن ءالى قىلمىستىق ءىس ءجۇرىپ جاتىر. ءبىز سول اقشانى قايتارىپ، مىنا جەردەن كەتۋىن تالاپ ەتەمىز.

قارسى تاراپتار قاتتى-قاتتى ايتسا دا قۇر ءسوز جارىستىرىپ قانا تۇرعان. الايدا جانجال سوزبەن بىتپەگەن سوڭ ءبىر-بىرىنىڭ جاعاسىنا جارماستى.

زىڭگىتتەي كۇزەتشى جىگىتتەر جەتىپ كەلسە دە، ولارعا قاراپ جاتقان زاعيپتار جوق. كوزبەن كورمەسە دە قۇلاش سەرمەپ جۇدىرىقتاپ، ءتىپتى ديرەكتور كەڭسەسىنىڭ ىشىندە قولىنا تاياق ۇستاعاندار دا تابىلدى. ءبارىنىڭ كوزدەگەنى بۇرىشقا تىعىلعان ديرەكتوردى قۋىپ شىعۋ.

-ۇرما، كەت!!! جوعال!

جاپپاي توبەلەس ۇزاققا سوزىلعان سوڭ وقيعا ورنىنا پوليسيا كەلىپ جەتتى. 

پوليسيا وكىلدەرى كەلگەن سوڭ عانا جۇرت ساباسىن ءتۇستى. ءتارتىپ ساقشىلارىنا ەرە كەلگەن جەدەل جاردەم قىزمەتكەرلەرى سودان كەيىن عانا تاياق جەگەندەرگە العاشقى كومەك كورسەتتى.

ايتەۋىر، قازاق زاعيپتار قوعامى داۋدان ارىلماي قويدى. ونىڭ بۇرىنعى پرەزيدەنتى بايبولات اۋباكىروۆ تە تالاي جىلعى تەكەتىرەستەن كەيىن 7 جىلعا سوتتالىپ تىنعان ەدى. سوت ونى بيۋدجەتكە 1 ملرد. 300 ملن. تەڭگەنى جىمقىردى دەپ تاپتى. بۇل جولعى جاپپاي توبەلەسكە دە وسى قوعامنىڭ بيۋدجەتىن قۇرايتىن ءىرى كولەمدەگى قارجى سەبەپ دەگەن سىبىس بار.