سەمەيدە بيتكە قارسى پرەپاراتتان 8 جاسار قىز كوز جۇمدى. ونىڭ شاشىنداعى پارازيتتەردىڭ كوزىن جويماق بولعان اناسى قىتايدىڭ ۋىتتىلىعى جوعارى ديازينون دەگەن ءدارىسىن سەپكەن ەكەن. بالا سودان بىرەر مينۋتتان كەيىن ەسىنەن تانىپ قۇلاعان، - دەپ حابارلايدى Qamshy.kz كتك ارناسىنا سىلتەمە جاساپ.

وقىس وقيعادان ەسى شىعىپ كەتكەن ايەل جەدەل جاردەم شاقىرۋدىڭ ورنىنا، تانىستارىنا حابارلاسىپ ۋاقىت جوعالتىپتى. دارىگەرلەر جەتكەنشە كوماعا ءتۇسىپ قالعان قىزدى قۇتقارۋ مۇمكىن بولمادى. ءتىپتى جانساقتاۋ بولىمىندە جاسالعان شارالاردىڭ پايداسى تيمەگەن. ويتكەنى، ديازينون ۋىتتىلىعى جاعىنان ەكىنشى ساناتقا جاتادى ەكەن. سوندىقتان ادامدارعا قولدانۋعا بولمايتىن ءتۇرى بولىپ شىققان. ماماندار ونى مالدىڭ وزىنە پايدانالار الدىندا قاجەتتى مولشەردە سۋ ارالاستىرۋ كەرەك دەيدى. وكىنىشكە قاراي، شەشەسى ءدارىنىڭ سىرتىنداعى انىقتامانى وقىماعان سىڭايلى.

«بۇل پرەپاراتتى ۆەتەرينارلىق ءدارىحانالاردا ساتادى. ال ونى بالانىڭ شاشىنا سەپكەن ۋاقىتتا اۋىر اللەرگيالىق رەاكسيا پايدا بولعان. سوندىقتان قۋاتى جوعارى ديازينون جاندىكتەردىڭ عانا ەمەس، قىزدىڭ دا ءولىپ كەتۋىنە سەبەپ بولدى. نەگىزى، ونى كەنەلەر مەن باسقا دا زينيانكەستەردى ۋلاۋ ءۇشىن عانا قولدانۋ كەرەك»، - دەيدى سەمەي قالالىق جەدەل جاردەم ستانسياسىنىڭ دارىگەرى بالجان الماعامبەتوۆا.