الماتىداعى تەرگەۋ اباقتىسىندا زورلانعان ناتاليا سلەكيشينا ادۆوكاتىنان باس تارتتى! سوت اياقتالۋعا جاقىن قالعاندا كەلىنشەك قورعاۋشىنىڭ قىزمەتىنە مۇقتاج ەمەسپىن دەپ تۇرمەدەن قاعاز جىبەرگەن. الايدا ادۆوكات، اباقتى قىزمەتكەرلەرى بۇعان ايەلدى ادەيى ماجبۇرلەگەن دەيدى. ويتكەنى ول سوڭعى رەت جولىققاندا، سلەكيشينانىڭ بەتى كوگەرگەنىن بايقاعان، - دەپ حابارلايدى Qamshy.kz كتك ارناسىنا سىلتەمە جاساپ.

تەمىر توردىڭ ار جاعىندا وزىنە ءجابىر كورسەتكەندەرمەن سلەكيشينا ەندى جالعىز ءوزى كۇرەسپەك. ول تۇرمەدەن سوتقا ادۆوكاتتان باس تارتامىن دەپ ءوتىنىش تۇسىرتكەن. مۇنى ەستىگەن ادۆوكاتى ءمان-جايىن ءبىلۋ ءۇشىن ايەلگە بىردەن بارعان ەكەن. ءبىراق، سونداعى كورگەنى – جاعاسىن ۇستاتىپتى.   

ايمان وماروۆا، ادۆوكات: 

-بەتىنە  كرەمدى قابات-قابات قىلىپ جاعىپ العان. «ايمان مۇرات قىزى، مەن سىزگە ايتىپ ەدىم عوي» دەدى. «مەنى سولاي ماجبۇرلەپ جاتىر، مەن سول ءۇشىن ءسىزدى جاڭاعىداي ايتامىن ادۆوكات ماعان كەرەك جوق» دەدى.

سوتى اياقتالۋعا جاقىن قالعاندا بۇلاي باس تارتۋى قيسىنسىز دەيدى ادۆوتكات. ويتكەنى سوڭعى كۋاگەرلەر سوتتا سالماقتى سويلەگەن. ال ەندى سلەكيشينانىڭ قارا باسىن قالعانىن پايدالانىپ، قارسى تاراپ ىستەگى بار ايعاقتى جوققا شىعارۋى مۇمكىن. 

 ايمان وماروۆا، ادۆوكات: 

-«دالەلدەر جوق» دەپ پروكۋرورلار دا ايتىپ جاتىر. قالاي دالەلدەر جوق؟ زاڭسىز تەلەفونىن  تىڭداعان. «مەن جالعىز باسىما الامىن»دەپ تۇر حاكيموۆ،- «ال سەندەر بولساڭدار تولەيسىڭدەر» دەپ تۇر. «سەن ءبىر اي تولەيسىڭ، سەن ءبىر اي تولەيسىڭ، سەن ءبىر اي.» تولەيتىن  ول – حامراكۋلوۆ، يسايەۆ، مۇحامەدجانوۆ.

ءبىراق، بۇلاردىڭ ءبارى ەندى جازادان قۇتىلىپ كەتۋى مۇمكىن. ءقازىردىڭ وزىندە ءۇش قىزمەتكەر تەرگەۋدەن بوساتىلعان. ەستەرىڭىزگە سالساق، ءقازىر جازاسىن وتەپ جاتقان 32 جاستاعى ناتاليا سلەكيشينا تەرگەۋ قاپاسىنىڭ ءتورت بىردەي قىزمەتكەرى زورلادى دەپ شاعىمدانعان ەدى. ءبىراق ءقازىر سوت الدىندا بىرەۋى عانا جاۋاپ بەرىپ جاتىر. ول تۇرمەدە تۋىلعان ءسابيدىڭ اكەسى دەپ تانىلعان مايور رۋسلان حاكيموۆ. قالعانى تەك كۋاگەر رەتىندە قاتىسۋدا. دەسە دە، پروسەستەن اياقاستى الاستاتىلعان ادۆوكات ءبارىبىر دە ءىستى ورتا جولدا قالدىرمايمىن دەپ وتىر.    

-ەرتەڭ كەزەكتى سوت پروسەسى. وندا جارىسسوزگە كەلىنشەكتىڭ ءوزى تۇسەدى. ەشقانداي زاڭگەرلىك ءبىلىمى جوق سلەكيشينانىڭ ءوزىن-وزى قالاي قورعايتىنى ازىرگە بەلگىسىز. ويكەنى، وعان ساقاداي ساي دايىندىق كەرەك. ال ول ءقازىر جازاسىن وتەپ جاتقان جەردە ونداي جاعدايدىڭ جاسالۋى ەكىتالاي.