وسكەمەندە ورالمانداردىڭ كۆوتاسىن يەمدەنىپ، اقشا جىمقىرعان كۇدىكتىلەر انىقتالدى. كوشى-قون باسقارماسىنا قالالىق پروكۋراتۋرا وكىلدەرى جۇرگىزگەن تەكسەرۋدىڭ ناتيجەسى وسىنداي. بۇگىن ولار ورالماندارعا تۇرعىن ءۇي الۋ ءۇشىن بەرىلەتىن ءبىرىڭعاي مەملەكەتتىك تولەمدەر باسقا بىرەۋلەردىڭ ەسەپشوتتارىنا اۋدارىلىپ كەلگەنى تۋرالى مالىمدەدى. ەل اۋماعىنا وتپەگەن 17 وتباسىنىڭ اتىنا كۆوتا رەسىمدەلگەن. وسىلايشا، كوشى-قون باسقارماسىنىڭ قىزمەتكەرلەرى قازىنانىڭ 24 ميلليون تەڭگەسىنە قول سالعان. تەرگەۋ جۇمىستارىنا كەدەرگى جاساماۋ ماقساتىندا، پروكۋرورلار كۇدىكتىلەردىڭ كىم جانە قانشا ەكەنىن قۇپيا ۇستاپ وتىر.

 مەرۋەرت بۇلعىنبايەۆا، قالا پروكۋرورىنىڭ اعا كومەكشىسى:

— تەرگەۋ امالدارى جۇرگىزىلىپ جاتىر. ءبىر نەمەسە ەكى ادامنىڭ قاتىسى بار دەپ ازىرگە ايتا المايمىز. كوشى-قون باسقارماسىنىڭ زاڭدى تۇلعاسى مەن باسقا كۇدىكتىلەرگە قاتىستى ءىس قوزعالدى.

پروكۋراتۋرا وكىلدەرى بۇل قىلمىستىڭ 2010 جىلى جاسالعانىن ايتادى. ول كەزدە كوشى-قون باسقارماسى وبلىستىق اكىمشىلىككە قاراعان. ال، ءقازىر ىشكى ىستەر دەپارتامەنتىنىڭ قۇزىرىنا وتكەن مەكەمەدە ول قۇجاتتارعا جاۋاپتى تۇلعالار جوق كورىنەدى. پوليسيانىڭ باسپا ءسوز قىزمەتى وسىنداي ءۋاج ايتىپ وتىر. ماسەلەن، ءقازىر ۇستىنەن ءىس قوزعالعان ازاماتشالاردىڭ ءبىرى قىزمەتتەن وسى وتپەلى كەزەڭدە كەتىپ قالعان.

 باقىتجان تورعايەۆ، وبلىستىق ءىىد باسپا ءسوز قىزمەتىنىڭ باستىعى:

— ول ازاماتشا اتالمىش قۇرىلىم ىشكى ىستەر دەپارتامەنتىنە ەنگىزىلىپ جاتقاندا بالا كۇتۋ دەمالىسىنا كەتكەن بولاتىن. سودان كەيىن، ءوزىنىڭ جەكە ءوتىنىشى بويىنشا، ىشكى ىستەر ورگاندارىنان بوساتىلادى. ياعني، ول رەسمي تۇردە بىزدە تىركەلگەنىمەن بىردە-بىر كۇن جۇمىس ىستەمەگەن.

وسكەمەن قالالىق پروكۋراتۋراسى ءىستى قارجى پوليسياسىنا تاپسىردى. ورالماندار كۆوتاسىن يەمدەنگەندەرگە قاتىستى اسا ءىرى كولەمدەگى الاياقتىق فاكتىسى بويىنشا قىلمىستىق ءىس قوزعالدى. تەكسەرىلىپ، تەرگەۋگە الىنعانداردىڭ ىشىندە بۇرىنعى مەملەكەتتىك قىزمەتكەرلەر دە بار.

وسكەمەن

قۋانىش عابدۋللين

«7» تەلەارنا

تاقىرىپ وزگەرتىلدى