الماتى وبلىسىندا «جاس كاسىپكەر مەكتەبى» اشىلادى. بۇل جوبا «بيزنەستىڭ جول كارتاسى - 2020» بيزنەستى قولداۋ مەن دامىتۋدىڭ ءبىرىڭعاي باعدارلاماسى اياسىندا قولعا الىنعان. بۇل جونىندە الماتى وبلىسىنىڭ وڭىرلىك كوممۋنيكاسيالار قىزمەتىندە وتكەن بريفينگتە وبلىستىق كاسىپكەرلەر پالاتاسىنىڭ وكىلدەرى مالىمدەدى، دەپ حابارلايدى Baq.kz.

- جاستاردىڭ يننوۆاسيالىق جانە كاسىپكەرلىك الەۋەتىن اشۋعا جاردەمدەسەتىن مەكتەپتە كاسىپكەرلىك نەگىزدەرىن، سونىڭ ىشىندە بيزنەس-جوسپار، ماركەتينگتىك جوسپار، دامۋ ستراتەگياسىن ازىرلەۋدى، سونداي-اق كاسىپكەرلىك پسيحولوگيانى مەڭگەرىپ شىعۋدى وبلىستىق كاسىپكەرلەر پالاتاسىنىڭ تاجىريبەلى بيزنەس-ترەنەرلەرى ۇيرەتەدى. مەكتەپتىڭ تىڭداۋشىلارى 18-29 جاس ارالىعىنداعى ازاماتتار بولا الادى. وقىتۋ قورىتىندىلارى بويىنشا بيزنەس-جوسپارلارىن ءساتتى قورعاعان جاعدايدا، تىڭداۋشىلارعا سەرتيفيكات بەرىلەدى، - دەيدى الماتى وبلىستىق كاسىپكەرلەر پالاتاسىنىڭ كاسىپكەرلىكتى قارجىلىق ەمەس قولداۋ ءبولىمىنىڭ باسشىسى ەرلان داتقايەۆ.

قىزىقتى جوبالار «يدەيالار جارمەڭكەسى» بايقاۋىندا تانىستىرىلادى. ال سونىڭ ىشىندەگى ۇزدىكتەرى كەيىن «بيزنەستىڭ جول كارتاسى - 2020» باعدارلاماسىنىڭ شەڭبەرىندەگى مەملەكەتتىك گرانتتى الۋعا قاتىسۋ مۇمكىندىگىنە يە بولادى. وندا كەز كەلگەن ازامات بار بىلگەنىن، تاجىريبەسىن، جەتكەن جەتىستىگىن، باستامالارىن ىسكە اسىرۋعا مۇمكىندىگى بار.

الماتى وبلىسى اكىمدىگىنىڭ باسپا ءسوز قىزمەتىنىڭ مالىمەتىنشە، «جاس كاسىپكەر مەكتەبى» جوباسى مەملەكەتتىك تىلدە ۇستىمىزدەگى جىلدىڭ 31 قازانىنان باستاپ 4 قاراشاعا دەيىن، ال ورىس تىلىندە 7 قاراشادان 11 قاراشاعا دەيىن «دامۋ» كدق» اق كاسىپكەرلەرگە قىزمەت كورسەتۋ ورتالىعىندا وتەدى.

وقىتۋعا وتىنىشتەر وسى جىلدىڭ 13 قىركۇيەگىنەن باستاپ 28 قازانعا دەيىن الماتى وبلىسىنىڭ كاسىپكەرلەر پالاتاسىندا قابىلدانادى.