سالىق جانە كەدەندىك اكىمشىلىك سالاسىنداعى مەملەكەتتىك قىزمەت كورسەتۋدىڭ ساپاسى نۇروتاندىقتار نازارىندا. وسى ماقساتتا پارتيا جانىنداعى جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەس مۇشەلەرى ەلدەگى كەدەن بەكەتتەرىنىڭ جۇمىسىمەن تانىسىپ ءجۇر. كەزەكتى باقىلاپ-تەكسەرۋ الماتى وبلىسىنداعى "قالجات" كەدەن بەكەتىندە ءوتتى. كەڭەس مۇشەلەرى مۇنداعى قىزمەتتىڭ قولجەتىمدىلىگىنە جاقسى باعا بەرگەنىمەن كەيبىر جايتتارعا كوڭىلدەرى تولمادى. ماسەلەن، وتكىزۋ بەكەتىنىڭ جۇمىس جاساۋ ۋاقىتىنىڭ قىسقالىعى جۇك تاسمالداۋشىلارعا كەدەرگى كەلتىرگەن، - دەپ حابارلايدى Qamshy.kz "جەتىسۋ" ارناسىنا سىلتەمە جاساپ.

قوعامدىق كەڭەس مۇشەلەرى كولىك جۇرگىزۋشىلەرىنىڭ ءوز اۋزىنان شەكارادان كىرىپ-شىعۋدىڭ ماشاحاتىن سۇراپ ءبىلدى. ولاردىڭ ايتۋىنشا قۇجاتتىق راسىمدەۋ بۇرىنعىدان قاراعاندا الدەقايدا جەڭىلدەتىلگەن. ءبارى تالاپقا ساي. جۇكتەردى كەدەنشىلەر كوپ ۇستاماي وتكىزىپ وتىرادى. قىزمەت كورسەتۋدىڭ قولجەتىمدىلىگىن ارتتىرۋعا سەبەپ بار. "قالجات" كەدەن بەكەتىنەن تاۋار تاسمالداۋ كولەمى جىل سايىن ارتىپ كەلەدى. 

ماسەلەن، 2015 جىلدىڭ 8 ايىندا 4570 جۇك كولىگى وتكەن. ال بيىلعى جىل باسىنان بەرگى 8 ايدا بەكەتتەن تاۋار تاسمالداعان كولىكتەردىڭ سانى 5971 گە جەتىپ وتىر. ياعني، جۇك تاسمالداۋ كولەمى كوبەيگەن. وسى جىلى كۇنىنە تاۋار تيەگەن 33 كولىكتى قابىلداپ ەل اۋماعىنا كىرگىزىپ وتىردىق. 

مۇنان تىس بەكەت ارقىلى ەكى ەل اراسىندا ارى-بەرى قاتىناعان جولاۋشىلار سانى دا كوبەيگەن. وسى جىلعى 8 ايدا 3 جارىم مىڭعا جۋىق جەكە تۇلعا "قالجاتتان" كىرىپ-شىققان. جىل باسىنان كەدەن ەرەجەسىن بۇزعان 53 ادام انىقتالىپ، جاۋاپكەرشىلىككە تارتىلدى.  ال وتكىزۋ بەكەتىندە كونتراباندىمەن كۇرەس بارىنشا كۇشەيتىلگەن. اسىرەسە،  اۆتوكولىك قۇرالدارىنىڭ جۇك بولىگىن تەكسەرۋ بارىسىندا تاسىمالدانعان تاۋارلاردىڭ اتاۋى، سانى، سالماعى جانە قۇنى قۇجاتتاعىمەن سايكەس كەلمەي جاتادى. 

ال ءماجىلىس دەپۋتاتى ومارحان وكسىكبايەۆ جۇك تاسمالداۋشىلار ءۇشىن الاڭدايدى. قىتايدان ءوتىپ قازاقستان كەدەنىنە كەلگەندە مەرەكە كۇندەرىنە تۋرا كەلگەندەر بىرنەشە كۇن بويى ەكى ەل شەكاراسىنىڭ ورتاسىندا قالىپ قويادى ەكەن. اپتاسىنا التى كۇن تۇسكى ءبىر ساعات ءۇزىلىستى قوسا ەسەپتەگەندە ، تاڭعى 8 دەن كەشكى 5 كە دەيىن قىزمەت كورسەتەتىن بەكەتتىڭ جۇمىس ۋاقىتىن ۇزارتۋ كەرەك دەيدى حالىق قالاۋلىسى.

قوعامدىق كەڭەس مۇشەلەرى كەدەن بەكەتىنىڭ جۇمىسىمەن باستان-اياق تانىسىپ شىقتى. جۇك تاسمالداۋشى جانە جولاۋشى بەينەسىنە ەنىپ،  مەملەكەتتىك قىزمەتتىڭ قالاي كورسەتىلەتىندىگىن كوردى. شەكارا جانە كەدەنشىلەرمەن سۇحباتتاستى. كەدەندىك رە­سىمدەۋدى جەدەلدەتۋ جانە جەم­قور­­لىق­تى بولدىرماۋعا بايلانىستى قولعا الىنعان شارالارعا قانىقتى. "نۇروتاندىقتار" شەشىمىن تابۋعا ءتيىستى وزەكتى ماسەلەلەردى قاعازعا ءتۇرتىپ الدى. بۇل ماسەلەلەر قازان ايىندا وتەتىن رەسپۋبليكالىق قوعامدىق كەڭەستىڭ كەڭەيتىلگەن وتىرىسىندا تالقىعا سالىنباق.