تەكەلىدە جاستاردىڭ فورۋمى ءوتتى. مونو قالانىڭ ەڭ جاس تۇرعىندارى ورتالىق الاڭدا باس قوسىپ، وتانسۇيگىش ۇرپاق ەكەندىكتەرىن كورسەتتى.  پاتريوتتىق اندەردى شىرقاپ، جۇزگە جۋىق وقۋشى فلەشموب بيلەدى. بۇل شارا تاۋەلسىزدىكتىڭ 25 جىلدىعىنا ارنالىپ ۇيىمداستىرىلدى، - دەپ حابارلايدى Qamshy.kz "جەتىسۋ" ارناسىنا سىلتەمە جاساپ.

فورۋمنىڭ باسى بيمەن باستالدى. فلەشموب بيلەگەن جۇزگە جۋىق قىز-جىگىت جيىلعانداردى ءبىر جەلپىندىرىپ تاستادى. جالپى، "جاستىڭ قۋاتى - ءبىلىمى مەن بىلىگىندە، بىرلىگى مەن پاتريوتتىعىندا". مەملەكەت باسشىسىنىڭ وسى ءسوزىن تەكەلى جاستارى بويتۇمار ەتكەن. ءار سالادا ەڭبەك ەتكەن، اسا بەلسەندىلەرى ەل الدىندا ماراپاتتالدى. قالا اكىمى مەن وبلىستىق جاستار ماسەلەلەرى باسقارماسىنىڭ العىس حاتتارى بەرىلدى. قاتارىندا قارتتارعا قامقورشى  ەركەجان جاڭاجىل دا بار.  

مۇنداي  باسقوسۋدىڭ  ۇلكەن تاربيەلىك، تانىمدىق  استارى بار. وتانشىلدىق تۋرالى وي ايتىلىپ، تۋعان جەر، اتامەكەن جايلى ءان شىرقالاتىن جيىن جاستارعا وڭ اسەرىن تيگىزەدى. ەرتەڭگى كۇننىڭ جارقىن بولۋى وسى توپتاعى تالايدىڭ قارىمىنا بايلانىستى. قۋانتارلىعى جىلت ەتكەن تالانتى بايقالسا مەملەكەت وسۋىنە، جۇمىسسىزىنا جۇمىس بەرۋگە  مۇمكىندىك بەرىپ وتىر.  

سول ەڭبەكقور جاستاردىڭ قاتارىنا تاعى 23 جاس ماماندى قوسىڭىز. ولار جاڭا وقۋ جىلى باستالىسىمەن ءبىلىم سالاسىنىڭ قىزمەتكەرى اتاندى. كەندى شاھاردىڭ تازالىعىن ساقتاۋعا ۇلەس قوسقان، جاز بويى بوسقا قاراپ جاتپاعان 70 كە جۋىق "جاسىل ەل" جاساقشىسىنىڭ ەڭبەگى دە ەل اۋزىندا. تەكەلىلىك 7 مىڭ جاستىڭ اراسىنان سپورت پەن ونەردىڭ بيىگىن باعىندىرعاندار دا جەتەرلىك. فورۋمدا ولاردىڭ كىمدەر ەكەنى ايتىلدى، جيىلعاندار شابىت السىن دەگەن ماقسات. شارا سوڭى كونسەرتتىك باعدارلاماعا جالعاستى.