جەتىسۋ جەرىندە ينتەسيۆتى الما باعىن ءوسىرۋ قارقىندى تۇردە جۇرگىزىلمەك. "اگرارلىق نەسيە كورپوراسياسى" اق قارجىلاي كومەك كورسەتۋگە دايىن.  الماتى وبلىسىنىڭ اكىمى اماندىق باتالوۆ پەن كورپوراسيانىڭ باسقارما ءتورايىمى گۇلناز اتامقۇلوۆانىڭ قاتىسۋمەن وتكەن جيىندا وسى ماسەلە كەڭىنەن تالقىلاندى. بۇل باعىتتا نەسيەلىك سەرىكتەستىكتەردىڭ كومەگى وراسان، - دە حابارلايدى Qamshy.kz "جەتىسۋ" ارناسىنا سىلتەمە جاساپ.

2016-شى جىلدان بەرى كورپوراسيا قولداۋىمەن قازاقستاندا 180 نەسيە سەرىكتەستىگى قۇرىلعان. وعان 12 مىڭنان اسا اۋىل شارۋاشىلىعى تاۋار وندىرۋشىلەرى بىرىككەن. الماتى وبلىسىندا 22 نەسيەلىك سەرىكتەستىك جۇمىس ىستەيدى.  مامانداردىڭ ايتۋىنشا، نەسيەلىك سەرىكتەستىك جۇيەسى يرلانديا، پولشا سياقتى مەملەكەتتەردە اسا دامىعان. ونداعى حالىقتىڭ 70 پايىزى نەسيەنى وسىنداي ۇيىمدارداردان الىپ، كاسىپتەرىن دوڭگەلەتىپ وتىر. اگرارلىق نەسيە كورپوراسياسى "قازاگرو" ۇلتتىق باسقارۋشى حولدينگىنىڭ قۇرامىنا كىرەدى. اگروونەكاسىپ كەشەنىن نەسيەلەۋ جۇيەسىن جالپى تۇرعىندارعا قولجەتىمدى ەتۋدى كوزدەيدى. وسى جىل باسىنان بەرى كورپوراسيا 82 ملرد تەڭگە نەسيە بەرگەن. ونىڭ 3 جارىم ملردى جەتىسۋلىق شارۋالاردىڭ ەنشىسىنە ءتيدى.

دەسە دە بۇل، 2 ملن حالقى بار الماتى وبلىسى ءۇشىن وتە از كورسەتكىش. سوندىقتان، وبلىس اكىمى، اۋدان باسشىلارىنا نەسيەلىك سەرىكتەستىكتەردىڭ جۇمىسىن جانداندىرۋدى، بولىنگەن قاراجاتتى يگەرۋدى، ونى ماقساتتى جۇمساۋدى قاتاڭ تاپسىردى. ەندىگى جەردە "اگرارلىق نەسيە كورپوراسياسى" مەن الماتى وبلىسى اكىمدىگى تىعىز قارىم-قاتىناستا جۇمىس ىستەيتىن بولادى.  ەكى تاراپ ىنتىماقتاستىقتى نىعايتۋ جانە نەسيە سەرىكتەستىگى مۇشەلەرىن قارجىلاندىرۋ اۋقىمىن كەڭەيتۋ تۋرالى ءوزارا كەلىسىمگە قول قويدى. 

اماندىق باتالوۆ 
الماتى وبلىسىنىڭ اكىمى
الماتى وبلىسىنىڭ قاي جاعىنان بولسىن مۇمكىندىكتەرى وتە جوعارى ەكەنىن جاقسى بىلەسىزدەر. بىزدە اۋىلشارۋاشىلىق ونىمدەرىنىڭ بارلىعى وسەدى. ءتىپتى سىرتتان تاسىمالداۋدىڭ قاجەتى جوق. سونى دامىتۋ ءۇشىن باعباندارعا، شارۋالارعا جاعداي جاساۋىمىز ءتيىس. وسىنداي قارجى ينستيتۋتتارىنىڭ پوتەنسيالىن ءتيىمدى پايدالانعانىمىز ءجون. مىنە وزدەرى كەلىپ وتىر. بىرىگىپ جۇمىس ىستەيىك. اۋىلشارۋاشىلىعىن كوتەرەيىك دەپ.ۇستەماقىسى اسا جوعارى ەمەس 11 دە 3 پايىز.  ،ينۆەستيسيالىق جوبالار ۇسىنايىق. مەن قولداۋعا دايىنمىن. ءبىز قانداي كولەمدەگى قاراجاتتى بولسىن يگەرۋگە، ونىڭ ەكى ءۇش ەسە بولىپ قايتۋى ءۇشىن جۇمىس ىستەۋىمىز كەرەك. ونىمدەرىمىزدى ەكسپورتتاۋعا دا جاعداي بار. 

گۇلناز اتامقۇلوۆا 
"اگرارلىق نەسيە كورپوراسياسى" اق باسقارما ءتورايىمى
جيىن بارىسىندا ءبىزدىڭ اتقاراتىن جۇمىستى، باعدارلامانىڭ شارتتارىن، تالاپتارىن ايتۋعا مۇمكىندىك بولدى. سونىمەن قاتار، كورپوراسيا، جەتىسۋ الەۋ كورپ، الاتاۋ فرۋتيس ەنەردجي سەرىكتەسىتىگى جانە اكىمدىك 4 جاقتى مەموراندۋمعا قول قويدى. جاڭا جوبالاردى تانىستىردىق، ولاردىڭ بولاشاعى زور دەپ بىلەمىن. ياعني كورپوراسيا ارقىلى، نەسيەلىك سەرىكتەستىك ارقىلى وعان قاراجات قۇيىپ، تابىسقا جەتۋگە بولادى. بۇل مەملەكەتتىك باعدارلامالاردى جۇزەگە اسىرۋدىڭ بىردەن ءبىر جولى.