جەتىسۋلىق ايەلدەر بوكس قۇراماسى الماتى وبلىسى اكىمىنىڭ جۇلدەسى ءۇشىن وتەتىن ءداستۇرلى "جەتىسۋ كۋبوگى" جولىنداعى حالىقارالىق جارىسقا دايىندالۋ ۇستىندە. جارىس جىلداعى داعدى بويىنشا قازان ايىندا تالدىقورعان قالاسىندا وتكىزىلمەك. بيىلعى باسەكەگە ەلىمىزدىڭ ءار ايماقتارىنان بولەك، كورشى قىرعىزستان مەن وزبەكستاننان جانە رەسەيدەن دە بوكسشىلار كەلىپ ب ا ق سىنايتىن بولادى، - دەپ حابارلايدى Qamshy.kz  "جەتىسۋ" ارناسىنا سىلتەمە جاساپ.

سپورت مەكتەپ-ينتەرناتىنىڭ تاربيەلەنۋشىسى انار قوجا بوكسپەن 2013 جىلدان باستاپ اينالىسىپ كەلەدى. سوڭعى كەزدەرى جاقسى ناتيجە كورسەتىپ ءجۇر. كۇندەلىكتى جاتتىعۋ زالىنان شىقپايدى. الداعى وتەتىن "جەتىسۋ كۋبوگى" جولىنداعى جارىسقا قىزۋ دايىندىق ۇستىندە. اناردىڭ وسى كۇنگە دەيىن رەسپۋبليكالىق دەڭگەيدە جەتكەن جەتىستىكتەرى دە از ەمەس. ول 2014-2015 جىلدارى ەل چەمپيونى اتاندى. ءارى وسى ماۋسىمدا حالىقارالىق "ازيا بالالارى" تۋرنيرىندە تاماشا ونەر كورسەتتى. 

انار قوجا بوكستان سپورت شەبەرى 

حالىقارالىق "ازيا بالالارى" ءتۋرنيرى ءبىز سياقتى جاس سپورتشىلار ءۇشىن ايتۋلى دودا. سوندىقتاندا مەن ءوزىمنىڭ بار كۇش-جىگەرىمدى سالدىم. العاشقى جەكپە جەگىمدە وزىمە سەنىمدى بولعاندىقتان، قارسىلاسىمدى وڭاي ءارى ەش قيىندىقسىز جەڭدىم. ال ەكىنشى كەزدەسۋدە رەسەيلىك بوكسشىمەن جۇدىرىقتاسقاندا ءبىراز قوبالجىدىم، ءبىراق قانشا دەگەنمەندە ۇپاي جاعىنان ودان باسىم ءتۇستىم. نەگىزىنەن بوكستا سپورتشىدا مىنەز قالىپتاسادى. جاتتىعۋلار سپورتشى بويىنداعى كۇيزەلىستى جويادى. 

بوكس - تەك ەموسيونالدىق بەرىكتىكتى عانا ەمەس، ۇلكەن ءارى قاجىرلى ەڭبەكتى دە تالاپ ەتەدى. ماسەلەن، قىزداردىڭ ءار جاتتىعۋى ءبىر جارىم ساعاتقا سوزىلادى - دەنە جاتتىعۋلارى، سوققىعا توتەپ بەرۋ، سپاررينگ سەكىلدى كەزەڭدەردەن تۇرادى. باپكەرلەر سپورتشىلاردىڭ فيزيكالىق جانە پسيحولوگيالىق جاعدايلارىن دا مۇقيات باقىلاۋدا. سەبەبى الدا "جەتىسۋ كۋبوگى" ءتۋرنيرى وتكىزىلمەك. وندا جەڭىمپاز اتانۋ ءۇشىن ءبىزدىڭ قىزدار ەلىمىزدەن بولەك، مىقتى دەگەن وزبەك، قىرعىز، رەسەيلىك سپورتشىلاردان دا باسىم ءتۇسۋى ءتيىس.

سەرىكباي تۇرلىبەكوۆ باپكەر

مەن بۇرىن ۇل بالالارمەن جۇمىس جاساعانمىن، ال قىز بالالارمەن جۇمىس جاساۋ ءۇشىن مەن ءوز ادىستەرىمدى وزگەرتتىم. بۇل ۇلكەن جۇمىس، مۇنداعى ءار قىز بالانىڭ ءوز مىنەزى بار، ولاردىڭ ءارقايسىسىنا جول تابا ءبىلۋ قاجەت.

باپكەرلەر ەلىمىزدىڭ جۇلدەگەرلەرى مەن جەڭىمپازدارى فاريزا داگەن مەن ايدا قوجانعا ۇلكەن ءۇمىت ارتىپ وتىر. ءوز شاكىرتتەرىنىڭ الداعى تۋرنيرگە دايىندىعىن شىڭداۋ ءۇشىن قىزداردى الماتى قالاسىندا جانە تالعار اۋدانىندا وتەتىن وقۋ-جاتتىعۋ جيىندارىنا دا قاتىستىرماقشى.