جىنىستىق قاتىناسقا ماجبۇرلەگەنىمەن قويماي، قورعانسىز ايەلدى ازاپتاعان. ناتاليا سلەكيشينانى زورلاعان تۇرمە قىزمەتكەرىنە ەندى وسىنداي ايىپ تاعىلىپ جاتىر،- دەپ حابارلايدى Qamshy.kz  كتك ارناسىنا سىلتەمە جاساپ.

"سوتتالۋشى بۇعان دەيىن قىزمەتىن اسىرا پايدالانىپ، جابىرلەنۋشىنى جىنىستىق قاتىناسقا ماجبۇرلەگەنى ءۇشىن ايىپتالعان ەدى. ءبىز ءىستى قايتا قاراپ، ايىپتاۋ اكتىسىنە تولىقتىرۋ ەنگىزدىك. ياعني، ەندى تۇرمە قىزمەتكەرى «ازاپتاۋ» بابى بويىنشا دا سوت الدىندا جاۋاپ بەرەدى"، - دەيدى پروكۋرور داۋرەن حالىقوۆ.

بۇعان قوسا، سلەكيشينانى ادۆوكاتتان باس تارتۋعا ماجبۇرلەگەندەر دە جازاعا تارتىلاتىن بولدى. جابىرلەنۋشى تاراپتىڭ بۇعان كوڭىلى تولعانىمەن، ولار جالعىز رۋسلان حاكيموۆتىڭ جازالانۋىنا قارسى. سەبەبى، سلەكيشينا تەرگەۋ قاپاسىندا ءوزىن 4 قىزمەتكەردىڭ جابىلىپ زورلاعانىن مالىمدەگەن ەدى. ءسويتىپ، ول جۇكتى بولىپ، قىز تۋعان.

ساراپتاما ناتيجەسى بويىنشا، تۇرمەدە تۋىلعان ءسابيدىڭ اكەسى ءقازىر سوتتالىپ جاتقان مايور حاكيموۆ بولىپ شىقتى. ال زورلانعان ايەل ايىپتاعان تاعى 3 قىزمەتكەر سوتقا كۋاگەر رەتىندە قاتىسىپ جاتىر.

ءوزى ازاماتتىق نەكەدەگى كۇيەۋىنە قاراقشىلىق شابۋىل جاساعانى ءۇشىن 8 جىلعا سوتتالعان ناتاليا سلەكيشينانىڭ ءالى وتەيتىن 6 جارىم جىلى بار ەكەن. ەندى ونىڭ ادۆوكاتى تۇرمەدە كورگەن قورلىعى ءۇشىن جازاسىن وتەۋدى كەيىنگە قالدىرۋدى تالاپ ەتپەك.

"ونى اباقتىدان شىعارىپ الۋدىڭ امالىن ويلاپ وتىرمىن. نەگە دەسەڭىز، 3 نارەستەسى بار. سوعان مەن ءوتىنىش سوتقا جىبەرەم"، - دەيدى ادۆوكات ايمان وماروۆا.