قاراعاندىلىق 18 جاستاعى قىز باحرەيندە سەكس-قۇلدىققا تاپ بولعانىن مالىمدەدى. بۇل تۋرالى  Qamshy.kz Tengrinews.kz –كە سىلتەمە جاساپ حابارلايدى.

 ايتۋىنشا، ول بۇل ەلگە سۇيىكتىسى ارقىلى جۇمىس تاۋىپ بەرەم دەپ ۋادە بەرگەن قۇربىسىمەن بىرگە بارعان. 

بويجەتكەن تىلشىمىزگە تەلەفون ارقىلى قۇربىسىنىڭ ماسساج جاساۋشى قىزمەتىن تاۋىپ بەرۋگە ۋادە بەرگەنىن، ءبىراق باحرەينگە ۇشىپ كەلگەن سوڭ جاعدايدىڭ باسقاشا بولعانىن ايتىپ وتىر. قازاقستاندىق قىزدىڭ  جەكە كۋالىگىن  الىپ قويىپ، جەزوكشەلىكپەن اينالىسۋعا ماجبۇرلەگەن. "تانىسقانىمىزعا 1،5 جىل بولعان قۇربىم باحرەينگە شاقىردى. ماعان بيلەت ساتىپ الىپ بەرىپ، ءتىپتى پاتەر جالدادى. ماسساج تۋرالى عانا ءسوز بولعان، جەزوكشەلىك جايىندا ەشتەڭە ايتپادى. تاياۋدا عانا 18-گە تولدىم (...) مەن ەكى اي بۇرىن باحرەينگە كەلدىم، ءبىر اپتاداي بولاتىن شىعارمىن دەپ ويلادىم، - دەيدى ول. - ەكىنشى كۇنى جەزوكشە بولىپ جۇمىس ىستەيسىڭ دەپ، بيلەت پەن ءقوناقۇيدىڭ قۇنىن ءوندىرىپ بەرۋىمدى تالاپ ەتتى. كليەنتتەرىمنەن كومەكتەسۋىن سۇراپ،  جىلادىم. سولاردىڭ ءبىرى ماعان 200 دينار بەردى، قالعان اقشانى قايدان الاتىنىمدى بىلمەيمىن. انام قاراعاندىدا، جىلاپ جاتىر، بۇل جاقتان كەتۋىمە كومەكتەسىڭىزدەرشى"، - دەيدى قىز. الايدا ول ءاتى-جونىن اتاعىسى كەلمەدى. "ءبىر اپتا ىشىندە ءتورت ءقوناقۇي اۋىستىردىق، بۇل جاقتان دا الىپ كەتۋى مۇمكىن (...)"، - دەيدى ول.

مۇنىمەن قاتار، بويجەتكەن وزىنە ۇركىتىپ، قورقىتۋ مانىندەگى سوزدەردىڭ ايتىلىپ جاتقانىن مالىمدەدى. ايتۋىنشا، ول «سۋتەنەرلەرگە» شامامەن ميلليون تەڭگە بەرەشەك ەكەن. بۇل قاراجاتتى ول 27-سىنە دەيىن تولەۋىس ءتيىس، ولاي بولماعان جاعدايدا ءولتىرىپ كەتەمىن دەپ قورقىتادى ەكەن.

قىز السىرەپ قالعانىن ايتادى. وزىمەن بىرگە سەكسۋالدىق قۇلدىقتا تاعى دا باسقا قازاقستاندىق قىزدار بار ەكەن. 18 جاستاعى بويجەتكەننىڭ 2،5 جاستاعى بالاسى بار بولىپ شىقتى. "مەن 15 جاسىمدا تۇرمىسقا شىقتىم، بوساندىم. ءبىراق كۇيەۋىممەن اجىراسىپ كەتتىك"، - دەپ حابارلادى ول.

قوناقۇيدە تۇسىرىلگەن بۇل ۆيدەونى قىز رەداكسياعا جولدادى.

Tengrinews.kz رەداكسياسى قازاقستاننىڭ سىرتقى ىستەر مينيسترلىگىنەن وسى وقيعاعا بايلانىستى تۇسىنىك الدى. باسپا ءسوز قىزمەتىنىڭ جەتەكشىسى ءانۋار جايناقوۆتىڭ ايتۋىنشا، قازاقستاندىق ديپلوماتتار بۇل ماسەلەنى شەشۋ ءۇشىن جۇمىستى باستاپ كەتىپتى. "قىزعا كومەكتەسۋ ءۇشىن قولدان كەلگەننىڭ ءبارىن جاسايمىز. ءقازىر وسى ماسەلەمەن اينالىسىپ جاتىرمىز"، - دەدى ق ر ءسىم وكىلدەرى.