الداعى ۋاقىتتا «نۇر وتان» پارتياسىنىڭ كادرلىق قورىن قالىپتاستىرۋ جۇمىسى جۇزەگە اسادى. بۇل تۋرالى جاقىندا ورتالىق اپپاراتىڭ باسپا ءسوز الاڭىندا پارتيانىڭ حاتشىسى ناتاليا گودۋنوۆا ءمالىم ەتتى. ونىڭ ايتۋىنشا، بۇل باستاما سايلانبالى جانە پارتيالىق لاۋازىمدارعا جوعارى كاسىبي كادرلاردى ۇسىنۋدىڭ جۇيەلى پروسەدۋراسى بولماقشى. كادرلىق رەزەرۆ ەكى دەڭگەيدە – رەسپۋبليكالىق جانە ايماقتىق دەڭگەيلەردە بەكىتىلەدى. رەسپۋبليكالىق رەزەرۆتىڭ نەگىزى – ايماقتىق رەزەرۆتەگىلەر. وعان ءار ايماقتان ءۇش ادامعا دەيىن تىركەلە الادى. ال ايماقتىق پارتيالىق كادرلىق رەزەرۆكە ەنۋ ءۇشىن كانديداتتار 3 ساتىلى ىرىكتەۋ جۇيەسىنەن ءوتۋى قاجەت. جۇيە كونكۋرستىق پروسەدۋرالار مەن قۇزىرەتتەرىن باعالاۋدان تۇرادى. كانديداتتاردىڭ ءارقايسىسى كاسىبي، پارتيالىق جانە جەكە سيپاتتارى بويىنشا كەشەندى تەكسەرۋدەن وتەدى، - دەپ جازادى Qamshy.kz Turkystan.kz - كە سىلتەمە جاساپ.
مىسالى، پارتيا مۇشەلىگى بويىنشا ءوتىلى، جۇمىس ءوتىلى، ءبىلىمى، پارتيالىق قىزمەتتەگى سىڭىرگەن ەڭبەگى بويىنشا تالاپتار بار. اتالعان تالاپتار اۋدان-وبلىس-رەسپۋبليكا بويىنشا ءۇش توپقا ءبولىنىپ، سوعان ساي جۇرگىزىلمەك. تەك قىلمىستىق جانە اكىمشىلىك جاۋاپكەرشىلىككە تارتىلماۋى، سىبايلاس جەمقورلىقپەن قاتىسىنىڭ بولماۋى سونداي-اق، پارتيالىق جازالارىنىڭ بولماۋى جونىندەگى تالاپتار ءار دەڭگەي ءۇشىن مىندەتتى بولىپ وتىر.
پارتيالىق كادرلىق رەزەرۆتى قالىپتاستىرۋ ءۇش اي بويى كەزەڭ-كەزەڭمەن وتەدى دەپ جوسپارلانعان. الدىمەن، پارتيالىق كادرلىق رەزەرۆتى قالىپتاستىرۋ تۋرالى حابارلاۋ، سودان سوڭ بارىپ پارتيانىڭ ايماقتىق جانە اۋماقتىق فيليالدارىنىڭ قۇجاتتاردى قابىلداۋى جانە قاراۋى، رەزەرۆكە ەنگىزىلەتىن كانديداتتاردى تىركەۋ، كانديداتتاردى باستاۋىش پارتيا ۇيىمدارىنىڭ (بپۇ) جينالىستارىندا ۇسىنۋ، كانديداتتاردى تەستىلەۋ جانە سۇحباتتاسۋ كوزدەلگەن. ايتا كەتەرلىگى، تەستىلەۋ پارتيانىڭ ايماقتىق فيليالدارىنىڭ ورىن-جايلارىندا وتەدى. تەستىلەۋدەن وتكەن كانديداتتار سۇحباتتاسۋعا جىبەرىلەدى. سۇحباتتاسۋدى پارتيانىڭ ايماقتىق فيليالىندا كوميسسيا وتكىزەدى. سوڭىندا، رەزەرۆتەگىلەردىڭ تىزىمدەرىن ءتيىستى اۋداننىڭ، قالا جانە وبلىستىڭ ساياسي كەڭەسىنىڭ بيۋرولارىندا بەكىتۋ قاراستىرىلعان. تىزىمگە ەنگەندەردى بەكىتكەننەن كەيىن پارتيالىق كادرلىق رەزەرۆتى دامىتۋ جۇمىسى جۇرگىزىلەتىن بولادى.
كانديداتتىڭ رەزەرۆتە بولۋ مەرزىمى 5 جىلدى قۇرايدى، ءتيىستى دەڭگەيدە كانديداتتاردىڭ 50 پايىزى ىلگەرىلەتىلگەن جاعدايدا جاڭارتۋ جۇزەگە اسىرىلماق.
سونداي-اق، پارتيانىڭ ورتالىق اپپاراتىندا جانە ايماقتىق، اۋماقتىق فيليالدارىنىڭ اپپاراتتارىندا (باسشىلىقتان باسقا) بوس لاۋازىمدىق ورىندارعا بايقاۋ نەگىزىندە قابىلداۋ جۇزەگە اسىرىلادى.
پارتيالىق كادرلىق رەزەرۆكە الۋ، بايقاۋ وتكىزۋ تۋرالى حابارلاندىرۋ، مەرزىمى جانە بوس لاۋازىمدارعا قويىلاتىن بىلىكتىلىك تالاپتارى «ايقىن»، «ليتەر» رەسپۋبليكالىق گازەتتەرىندە، سونداي-اق پارتيانىڭ www.nurotan.kz ۆەب-سايتىندا جاريالاندى.
̶ پارتيا كادرلىق رەزەرۆ قۇرىپ، پارتيا اپپاراتىندا جۇمىس ىستەيتىن، اۋداندىق، قالالىق، وبلىستىق ءماسليحاتتار مەن ماجىلىسكە ۇسىناتىن مىقتى مامانداردى ىرىكتەيدى، ̶ دەپ اتاپ ءوتتى ن.گودۋنوۆا. ايتا كەتەرلىگى، كادرلىق رەزەرۆ تاجىريبەلى پارتيا مۇشەلەرىنەن، باستاۋىش پارتيا ۇيىمدارىنىڭ مۇشەلەرى مەن بەلسەندى جاستاردان، سونداي-اق پارتيا جاقتاستارى قاتارىنان جاساقتالماق. ال كادرلىق رەزەرۆ رەسپۋبليكالىق جانە ايماقتىق دەڭگەيدە بەكىتىلەدى.
̶ تاڭداپ الۋ بارىسى 3 كەزەڭنەن تۇرادى. ءبىرىنشى، باستاۋىش پارتيا ۇيىمدارىنىڭ جينالىسىندا ۇمىتكەرلەر ۇسىنىلادى. ەكىنشىدەن، ساياسي مەكتەپ مەنەدجمەنتىندە قاشىقتىقتان تەستىلەۋ جۇرگىزىلەدى. ياعني، مۇندا كونستيتۋسيا، پارتيا جارعىلارى مەن دوكترينالارى، سايلاۋالدى جانە جەمقورلىققا قارسى باعدارلاما، پارتيا مۇشەلەرىنىڭ ەتيكا كودەكسى بويىنشا بىلىمدەرى تەكسەرىلەدى. ءارى قاراي سۇحباتتاسۋعا ءوتۋ ءۇشىن جوعارىدا اتالعان قۇجاتتاردىڭ ءارقايسىسىنان 12 سۇراقتىڭ كەم دەگەندە 8-نە دۇرىس جاۋاپ بەرۋى ءتيىس. قازىرگى ۋاقىتتا ايماقتىق رەزەرۆ قالىپتاستىرىلىپ جاتىر. كانديداتتار كەلەسى كۆوتا بويىنشا ىرىكتەلەدى: ءار اۋداننان – 10، قالادان – 12، وبلىس ورتالىقتارىنان – 25 كانديدات ىرىكتەلىنىپ الىنباق، – دەدى پارتيا حاتشىسى.
پارتيا حاتشىسىنىڭ اقپاراتىنا سۇيەنسەك، كادرلىق رەزەرۆ شامامەن ءۇش مىڭ ادامنان قۇرالماق. سىناقتان سۇرىنبەي وتكەن ۇمىتكەرلەردىڭ بىلىكتىلىگىن ارتتىرۋ دا باستى نازاردا. «نۇر وتان» پارتياسى ورتالىق اپپاراتى باسشىسىنىڭ ورىنباسارى ايدوس زيادين:
̶ پارتيا العاش رەت كادرلىق رەزەرۆتى جاساقتاۋ جۇمىسىنا كىرىستى. جىلدىڭ سوڭىنا دەيىن ايماقتىق دەڭگەيدى ءبىتىرۋدى جوسپارلاپ وتىرمىز. ايماقتىق كادرلىق رەزەرۆ جاساقتالعاننان كەيىن رەسپۋبليكالىق دەڭگەيدە، ورتالىق اپپاراتتا ءاربىر ۇمىتكەردىڭ جۇمىسىن ءتيىمدى پايدالانۋ ماقساتىندا ءارتۇرلى سەمينارلار مەن ترەنينگتەر وتكىزۋدى قاراستىرۋدامىز. ونى ءوز دەيگەيىندە جوسپارعا سايكەس جۇزەگە اسىراتىن بولامىز، ̶ دەدى.
رەسپۋبليكالىق قور كەلەر جىلدىڭ سوڭىندا قالىپتاسادى. ونىڭ نەگىزگى بولىگىن ءار وڭىردەن ايماقتىق قورعا ەنگەندەر قۇرايتىن بولادى.
ەركەجان جۇماتاي

استانا قالاسى