قازىرگى تاڭدا ماجىلىستە ەكسترەميزم مەن تەرروريزمگە قاتىستى كەيبىر زاڭ اكتىلەرى بويىنشا ءبىرقاتار وزگەرتۋلەر مەن تولىقتىرۋلار تالقىلانىپ جاتىر. كوڭىل كونشىتپەيتىن تۇسى زاڭ باستان اياق ورىس تىلىندە جۇرگىزىلىپ، ورىس تىلدەگى نۇسقاسى تالقىلانىپ جاتىر.

بىردەن ايتا كەتەيىن بۇل زاڭدا كوپشىلىك كۇتكەن "سالافيزمگە تىيىم سالۋ" ماسەلەسى مۇلدەم قاراستىرىلمايدى. ول تىيىم سالىنسا، سوتتىڭ شەشىمىمەن تىيىم سالىناتىن كورىنەدى. تالقىلانىپ جاتقان زاڭدا قارۋ-جاراق، كوشى-قون، تەرروريزمگە شاقىرۋ ماسەلەلەرى كوبىرەك قاراستىرىلعان. ال ەكستريميزدى يدەولوگيالىق تۇرعىدان الدىن الۋ ماسەلەلەرى مۇلدەم جوق. قارۋ-جاراققا شەكتەۋ قويۋ، ون كۇننەن اسا ۋاقىت ءبىر جەردە تۇراتىن كىسىنى تىركەۋگە ماجبىرلەۋ ماسەلەسى، تەرروريزم جازاسىنىڭ قاتايتىلىپ، سوتتالۋ مەرزىمىن سوزۋ تەرروريزمنىڭ الدىن الا الا الا ما؟!. از عانا كۇردەلەندىرۋى مۇمكىن.

ولىمگە دايىن تەرروريستەردى قانداي زاڭمەن قورقىتپاقپىز؟ تەررورلىق اكت جاسايتىن ادامنىڭ ءبىر جەردە 10 كۇن تۇرۋىنىڭ تۇككە دە قاجەتى جوق. ءقازىر ءبىر تۇندىك جالعا بەرىلەتىن پاتەرلەر جەتكىلىكتى. ءتىپتى ىزدەرىن جاسىرىپ، كوزگە ءتۇسىپ قالماۋ ءۇشىن ولارعا ءبىر جەردە كوپ تۇرماۋ جاعى تيىمدىرەك. زاڭنىڭ بۇل تارماعى پاتەرىن جالعا بەرەتىن كىسىلەرگە، جالپى پاتەر جاعالاپ كۇندەرىن وتكىزىپ جاتقان كوپشىلىككە قيىنشىلىق قانا تۋدىرادى. باسقا ەشتەڭە ەمەس. ناتيجەسى ورىندالمايتىن زاڭعا، جەمقورلىققا ۇلاسۋى مۇمكىن.

تەررورلىق اكت جاساۋ ءۇشىن قارۋ-جاراقتىڭ ءتىپتى قاجەتى دە شامالى. ساناسى تەرروريزمەن ۋلانعان ادام ايتەۋىر ءبىر جولىن تاۋىپ، جاسايتىنىن جاسايدى. فرانسيادا اۋىر سالماقتى جۇك كولىگىمەن-اق مىجىپ-جانشىپ، جۇزدەن اسا ادامنىڭ جانىنا قاستاندىق جاسالعانى كەشە عانا. قاجەت بولسا، قولدان جارىلعىشتى جاساي سالادى. زاڭنىڭ العاشقى وتىرىسىندا وسى ۇسىنىستارىمدى ايتتىم. زاڭدا تەرروريزمگە شاقىرۋدىڭ، ۇگىتتەۋدىڭ جازاسى قاتايتىلعان. بۇل قۇپتايتىن نارسە. سالافيزمگە شاقىراتىندارعا دا وسىنداي زاڭ كەرەك.

مەنىڭ ۇسىنىسىم تاكفيريزم مەن سالافيزمگە تىيىم سالۋمەن قاتار، يدەولوگيالىق تۇرعىدان قارسى تۇراتىن ارنايى عىلىمي-زەرتتەۋ ينستيتۋتى قۇرىلۋى قاجەت. اياماي قارجى ءبولۋ كەرەك. ولاردىڭ ءار ۋاجدەرى مەن كوزقاراستارىنا، دالەل-دايەكتەرىنە جەكە-جەكە جۇيەلى تۇردە عىلىمي سالماقتى ماتەريالدار دايىنداۋ كەرەكپىز.

قايرات جولدىباي ۇلىنىڭ فەيسبۋكتەگى پاراقشاسىنان