شىمكەنت پەن تاشكەنت اراسىن جالعايتىن تراسسادا سوڭعى بەس كۇندە ءۇشىنشى ءىرى جول اپاتى ورىن الدى دەپ حابارلايدى Qamshy.kz  Nur.kz-كە سىلتەمە جاساپ.

    «تاشكەنت-الماتى-تەرمەز» تاس جولىنىڭ بويىندا «اقجول» ءدامحاناسىنا جاقىن ماڭدا Mercedes-Benz كولىگى جول بويىندا تۇرعان گازەل جۇك كولىگىنە سوقتىعىسقان. سالدارىنان جەڭىل كولىكتە بولعان ءۇش جولاۋشى مەن جۇرگىزۋشىسى قايتىس بولدى.

كۋاگەرلەردىڭ ايتۋىنشا، Mercedes-Benz جوعارى جىلدامدىقتا جۇيىتكىپ كەلىپ، جۇرگىزۋشىسى تىزگىندى يگەرە الماي قالعان. سالدارىنان جول جيەگىندە توقتاپ تۇرعان گازەلگە بارىپ سوقتىعىسىپتى.

سوققىنىڭ قاتتى بولعانى سونشا، جەڭىل كولىك ادام تانىماستاي بولىپ مىجىلىپ قالعان. سالوندا بولعان ءۇش جولاۋشى وقيعا ورنىندا كوز جۇمىپتى. جۇرگىزۋشىنى جەدەل جاردەم كولىگى اۋرۋحاناعا الىپ كەتكەن. الايدا، ول دا العان دەنە جاراقاتتارى سالدارىنان جولدا قايتىس بولدى.

وقيعا بولعان ساتتە گازەلدە ادام بولماعان. ونىڭ جۇرگىزۋشىسى تاماقتانىپ الۋ ءۇشىن ءدامحاناعا كىرىپ كەتىپتى.

بەلگىلى بولعانداي، Mercedes-Benz كولىگىنىڭ جۇرگىزۋشىسى بۇگىن ۇيلەنۋى ءتيىس بولعان. كولىكتە قايتىس بولعان جولاۋشىلاردىڭ ءبىرى ونىڭ بولاشاق جارى ەكەن. ولار ءوز تويلاىنا اسىققان دەپ جازادى اقپاراتتىق پورتال تىلشىلەرى. قايتىس بولعان تاعى ەكى ادامنىڭ كىم ەكەنى انىقتالۋدا.

ايتا كەتەيىك، اپات بولعان جول بولىگىندە بىرنەشە ۋاقىتتان بەرى جوندەۋ جۇمىستارى ءجۇرىپ جاتىر. سونىڭ سالدارىنان كولىكتەر قارسى باعىتپەن جۇرۋگە ءماجبۇر. بۇعان دەيىن وسى تراسسادا بىرنەشە ادامنىڭ ءومىرىن جالماعان ەكى جول اپاتى بولىپ ۇلگەردى.