باتىس قازاقستان وبلىسى تاۋەلسىزدىكتىڭ 25 جىلدىعىنا قىزۋ دايىندالىپ جاتىر. مەرەكەگە وراي، وبلىستا جاڭادان بىرنەشە نىسان پايدالانۋعا بەرىلەدى. بۇل تۋرالى بۇگىن ورتالىق كوممۋنيكاسيالار قىزمەتىندە باتىس قازاقستان وبلىسى اكىمىنىڭ ورىنباسارى ارمان وتەعۇلوۆ ايتتى، دەپ حابارلايدى BNews.kz.

«تاۋەلسىدىكتىڭ 25 جىلدىعىنا وراي، 20 قاراشا مەن 15 جەلتوقسان ارالىعىندا «جۇلدىزدى 25 كۇن» وتكىزىلەدى. ودان بولەك، 60-تان استام ءىرى شارا ۇيىمداستىرىلادى. اتاۋلى مەرەكەگە وراي بىرنەشە الەۋمەتتىك نىسان پايدالانۋعا بەرىلدى. سونىمەن قاتار، ورال قالاسىنىڭ تۇرعىندارىنا 90 مىڭ شارشى مەتر، ياعني، 1562 پاتەر كىلتى تاپسىرىلادى. وقۋشىلار سارايى، كوپسالالى اۋرۋxانا جەلتوقسان ايىنىڭ باسىندا اشىلادى. قازىرگى تاڭدا وبلىستا 7150 جۇمىس ورنى اشىلدى. سونىڭ ىشىندە «جول كارتاسى 2020» باعدارلاماسى اياسىندا 2235 ادام جۇمىسپەن قامتىلدى. ءۇش اۋىسىمدى مەكتەپتەر پروبلەماسى جويىلدى. وبلىس تۇرعىندارىن سۋ جانە گازبەن قامتۋ وڭ شەشىلدى. بۇگىنگى تاڭدا باتىس قازاقستان وبلىسىنىڭ 89 پايىزى سۋمەن قامتىلدى»، - دەيدى ارمان وتەعۇلوۆ.
ايتا كەتەيىك، قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي استانا قالاسىندا ەلباسىنىڭ تاپسىرماسىمەن «قۋاتتى ءوڭىر – قۋاتتى قازاقستان» اتتى وڭىرلەر كۇنى باستالىپ كەتكەن بولاتىن. وسى اپتانىڭ سەنبى-جەكسەنبى كۇندەرىندە باتىس قازاقستان جانە اتىراۋ وبلىسىنىڭ كۇندەرى وتەدى.
باتىس قازاقستان وبلىسىنىڭ اۋىل شارۋاشىلىعى جارمەڭكەسىنە 12 اۋدان مەن ورال قالاسىنىڭ كاسىپكەرلەرى قاتىسادى. جارمەڭكەدە 200 توننادان استام كوكونىس، ەت، كونسەرۆى، ۇن جانە ماكارون ونىمدەرى، بال، بالىق، كۆاس، شىرىن، سۋسىن جانە ت.ب. ساتىلادى. بەيبىتشىلىك جانە كەلىسىم سارايىندا باتىس قازاقستان وبلىسىنىڭ تاريحي-ولكەتانۋ مۇراجايىنىڭ «اقجايىق ارۋ مەكەنىم» تاقىرىپتىق كورمەسى كوپشىلىك نازارىنا ۇسىنىلادى. 18 قىركۇيەكتە ساعات 16.00-دە داۋلەتكەرەي اتىنداعى قازاق حالىق اسپاپتارى وركەسترىنىڭ، باتىس قازاقستان وبلىسى اكىمىنىڭ ەسترادالىق-سيمفونيالىق وركەسترىنىڭ، «نازەركە»، «اقجايىق» بي انسامبلدەرىنىڭ جانە ت.ب. ونەر يەلەرىنىڭ قاتىسۋىمەن گالا-كونسەرتى وتەدى.