«استانا ەكسپو-2017» كومپانياسى حالىقارالىق كورمە اۋماعىندا قىزمەت كورسەتەتىن قوعامدىق تاماقتاندىرۋ وپەراتورلارىن تاڭداۋدى باستاماق. ول ءۇشىن جىل سوڭىنا دەيىن اشىق بايقاۋ وتكىزىلىپ، ءتيىستى تالاپتارعا ساي كەلەتىندەر ىرىكتەلىپ الىنادى.

ايتۋلى شارا اياسىندا حالىقتى تاماقتاندىرىپ تابىس تابۋ مۇمكىندىگىنە يە بولعىسى كەلەتىندەر ءۇشىن قويىلاتىن تالاپتارعا توقتالا كەتەيىك. الدىمەن، ونداي كومپانيانىڭ وسى سالاداعى تاجىريبەسى مول بولۋعا ءتيىس. ەكىنشىدەن، تاماقتانۋ ورنىنىڭ ديزاينىنىڭ تارتىمدىلىعىنا كوڭىل بولىنەدى. سونىمەن قاتار، باعا سايا­ساتى دا كوڭىلگە قونىمدى، حالىقتىڭ قالتاسىنا سالماق سالمايتىن بولۋعا ءتيىس.

– ءبىز 30 مەيرامحانا مەن 14 دۇڭگىرشەك قاجەت دەپ تاۋىپ وتىرمىز. كورمەنىڭ فورماتىن ەسكەرە وتىرىپ، ءوز ەلىمىزدىڭ ازاماتتارى عانا ەمەس، شەتەلدىك قوناقتار دا كوپ بولادى دەپ كۇتىلۋدە. سول ءۇشىن الەمنىڭ تانىمال اسحانالارىن قاراستىرماقپىز، – دەيدى كومپانيانىڭ كوممەرسيالاندىرۋ دەپارتامەنتىنىڭ ديرەكتورى داۋلەت ەركىمبايەۆ.

ونىڭ ايتۋىنشا، بايقاۋعا وتاندىق جانە شەتەلدىك كومپانيالار اشىق نەگىزدە قاتىسا الادى. ىرىكتەۋ پرەميۋم ساناتتاعى مەيرامحانالار مەن بارلار، كوفەحانالار، ءدامحانالار جانە فاستفۋد جەلىلەرى اراسىندا جۇرگىزىلەدى. بايقاۋدىڭ قورى­تىندىسى كەلەسى جىلدىڭ باسىندا شى­عارىلىپ، اقپان، ناۋرىز ايلارىندا پاۆيلونداردا جەڭىمپاز مەكەمەلەر جۇمىس ىستەيتىن ورىندار ناقتىلانادى.

بايقاۋدا جەڭىسكە جەتكەن كومپانيالار كورمە اۋماعىندا ارەندالىق نە­گىزدە جۇمىس ىستەيدى. جالداۋ اقىسى ەلور­داداعى ورتاشا باعا دەڭگەيىنەن تومەن بول­ماق. سونداي-اق، بۇل جەردە تاماقتانۋ باعاسى دا استاناداعى باسقا تاماقتانۋ نىساندارىنىڭ باعاسىمەن شامالاس بولۋى كەرەك.

– بايقاۋ شارتتارى تەندەر وتكىزۋ شارتتارىنا ۇقسايدى، ءبىراق ودان گورى ءبىرشاما جەڭىلدەۋ. ويتكەنى، بۇل جەردە بيۋدجەت قاراجاتى بولمايدى. بايقاۋعا ۇيىمداستىرۋشى كومپانيانىڭ وكىلدەرى تورەشى بولادى، – دەيدى داۋلەت ەركىمبايەۆ.

ەلوردادا وتەتىن حالىقارالىق كور­مەنىڭ اشىلۋىنا 9 ايدان از ۋاقىت قالدى. كۇنى بۇگىنگە دەيىن الەمنىڭ 103 ەلى اۋ­قىم­دى شاراعا اتسالىسۋعا نيەت ءبىلدىرىپ وتىر، ولارمەن اراداعى كەلىسىمشارت جاساۋ جۇمىستارى جىل سوڭىنا دەيىن ءتامامدالۋعا ءتيىس. ماۋسىم-قىركۇيەك اي­لارىنىڭ ارالىعىندا ەلورداعا وسى ەل­دەردەن جانە باسقا مەملەكەتتەردەن 300 مىڭ ادام كەلەدى دەپ كۇتىلۋدە. ال ەلى­ءمىزدىڭ وزگە اۋماقتارىنان كەلەتىن ادامداردى قوسقاندا، تۋريستەردىڭ جالپى سانى 2 ميلليوننان اسىپ تۇسۋگە ءتيىس. جۋىردا عانا كومپانيا باسشىسى ا.ەسىموۆ ايتىپ وتكەندەي، ءقازىر 74 مىڭ بيلەتتى ساتۋ ءۇشىن ءىرى كەلىسىمدەرگە قول جەتكىزىلگەن. حالىقارالىق كورمە وتاندىق تۋرزيم سالاسىنا سونى سەرپىن بەرەدى دەپ ءۇمىت ارتىلىپ وتىرعانىن ەسكەرسەك، تۋريستەردى ىڭعايلى ءارى تارتىمدى قوعامدىق تاماقتاندىرۋ ورىندارىمەن قامتۋدىڭ دا ماڭىزى ارتا تۇسەدى.

«استانا ەكسپو-2017» كومپا­نياسىنىڭ قوعاممەن بايلانىس دەپار­تامەنتى ديرەكتورىنىڭ ورىنباسارى اقسۇلۋ ارزىقۇلوۆانىڭ ايتۋىنشا، حالىقارالىق كورمە اۋماعىن تاماقتاندىرۋ ورىندارىمەن جابدىقتاۋ كەزىندە الەم ەلدەرىنىڭ تانىمال اسحانالارىن قامتۋعا كوڭىل بولىنەدى. سونداي-اق، شەتەلدىك مەيماندار ءۇشىن قازاقتىڭ ۇلتتىق تاعام تۇرلەرىن كورسەتۋ دە نازاردان تىس قالمايدى. كورمەگە كەلۋشىلەرگە ەلىمىزدە تۇراتىن وزگە دە ۇلىستاردىڭ تاعامدارى ۇسىنىلۋعا ءتيىس.

حالىقارالىق كورمە وتكەننەن كەيىن ونى ۇيىمداستىرۋشى كومپانيا تارايتىنى بەلگىلى. ال كورمە پاۆيلوندارىنداعى قوعامدىق تاماقتاندىرۋشىلارعا ولاردىڭ وزدەرىنىڭ قالاۋى بويىنشا، جۇمىستارىن ودان ءارى جالعاستىرۋعا مۇمكىندىك جاسالادى.

ارنۇر اسقار، «ەگەمەن قازاقستان»