بيىل امەريكانىڭ ەكس پرەزيدەنتى 70-كە تولدى. وسىعان بايلانىستى «گازەتا.ru» پورتالى بيلل كلينتوننىڭ بۇرىنعى كوڭىلدەسى دوللي كايلمەن جۇرگىزگەن سۇحباتتى جاريالادى. دوللي كايل جۋىردا «حيللاري. بوتەن ايەل» دەپ اتالاتىن كىتاپ جازىپ شىعارعان.  

دوللي كايل بيلل كلينتونمەن ءبىر مەكتەپتە وقىپتى. ولاردىڭ جاقىن قارىم-قاتىناستارى تەك 1970 جىلى باستالىپ، 1992 جىلعا دەيىن سوزىلعان. ول بۇعان دەيىنگى كىتابىندا ايەل ادۆوكات پەن گۋبەرناتور ەركەكتىڭ قارىم-قاتىناسى تۋرالى جازعان. جۇرتشىلىق دوللي كىتاپتارىندا كلينتوندى كەيىپكەر ەتىپ العان دەگەن پىكىردە.  

ءوزىنىڭ كلينتونمەن جاقىن بولعانىن جوققا شىعارمايتىن دوللي سۇحباتىندا كلينتون ءوز ايەلىن ۇناتپايدى دەگەن پىكىر بىلدىرەدى. بيلل مەن حيللاري ءسۇيىپ قوسىلعان ەمەس، تەك ساياسي جاقتاستار دەيدى ول. كلينتوننىڭ كوڭىلدەسىنىڭ ويىنشا، حيللاري  كۇيەۋىنىڭ جارقىن بولاشاعىن الدىن الا ءبىلىپ، ونى اق ۇيگە كىرۋ ءۇشىن پايدالانعان. دوللي بيلل كلينتون قالاعان نارسەسىنە قول جەتكىزەتىن ماقساتشىل ادام دەپ باعالايدى.  

دوللي سونداي-اق، كوپتەگەن ەركەكتەر وزدەرىنىڭ اناسىنا ۇقسايتىن جار ىزدەيتىنىن ايتا كەلە، حيللاري ءبيللدىڭ اناسىنا مۇلدە ۇقسامايدى دەيدى. ءبىراق ول اناسى سياقتى وعان كومەكتەسەتىن. حيللاري كۇيەۋىنە قارجىلاي دا كومەك كورسەتكەن. حيللاري ءبيللدىڭ اجەسى سياقتى، ونى اشسا الاقانىندا جۇمسا جۇدىرىعىندا ۇستاعان، وتە ىقپالدى ايەل.

«ەگەر مەن ءحيللاريدىڭ ورنىندا بولسام، باسقاشا ارەكەت ەتەر ەدىم. ارينە مەن بۇرىس ارەكەتتەن ادامىن دەگەن ءسوز ەمەس. ءبىراق مەن ولاردىڭ كەيبىر ارەكەتتەرىن قايتالاماس ەدىم. مىسالى، جاۋدىڭ سوڭىنا ءتۇسۋدىڭ قاجەتى جوق. ەگەر ءسىز مايداندا جەڭۋدى ويلاساڭىز، ادال جولمەن ارەكەت ەتىڭىز. ال حيللاري ءۇشىن ەشقانداي ەرەجە جوق».

دوللي، سونداي-اق ەگەر ول ءحيللاريدىڭ ورنىندا ءبيللدىڭ ايەلى بولسا، وندا كلينتون پرەزيدەنت بولۋدان گورى كوپ بالالى وتباسىنىڭ اكەسى بولۋى مۇمكىن ەدى دەيدى. كلينتوننىڭ بۇرىنعى «كوڭىلدەسى كۇيەۋىم بوتەن ايەلگە بارعانىن بىلسەم ول ايەلگە تارپا باس سالماي، كۇيەۋىمدى كىنالى سانار ەدىم» دەگەن پىكىردە.

دوللي كايل بيلل كلينتون جوعارى مانساپقا جەتكەن قالتالى ازامات بولسا دا ىشتەي باقىتسىز دەپ ەسەپتەيدى. ويتكەنى ءدولليدىڭ ويىنشا، كلينتون ءوزىنىڭ پوتەنسيالىن جۇزەگە اسىرا الماي، ايەلىنە باعىنىشتى بوپ قالعان. 

دوللي حيللاري كلينتوندى جاساندى ارەكەت يەسى دەپ ايىپتايدى. «كۇلكىسى دە جاساندى» دەيدى. «ول قانشا جەردەن كۇيەۋى سيقياتى بولۋعا ۇمتىلسا دا ءدال بيلل كلينتونداي بولا المايدى».  

بۇرىنعى كوڭىلدەس سونداي-اق بيلل كلينتون ونىڭ جانىن اۋىرتاتىن تالاي نارسە ىستەسە دە ءبارىن ۇمىتىپ، كەك ساقتامايتىنىن ايتادى.

ازىرلەگەن ايعانىم ءبىرتۋار