الماتى وبلىسىندا قازا بولعان اعايىندى 3 جىگىتتىڭ ارتىندا 8 بالا جەتىم قالدى، - دەپ حابارلايدى Qamshy.kz 31-ارناعا سىلتەمە جاساپ.

كەنەتتەن اكەلەرىنەن ايىرىلىپ قالعان مارقۇمنىڭ بالالارى قىلمىسكەرلەر ەڭ اۋىر جازاعا تارتىلسا دەيدى. ءقازىر كوكسۋ اۋدانىنىڭ ءۇش بىردەي تۇرعىندارىن جەرلەۋ راسىمىنە دايىندىق جۇمىستارى ءجۇرىپ جاتىر. 

- مەنىڭ ەكى قارىنداسىم، ءوزىم بارمىن. وسى ادامداردى اتسا ەكەن دەيمىن.

13 جاستاعى جالىن قازا بولعان جارقىنبەك دولداننىڭ تۇڭعىشى. اكەسى جوعالعان ساتتەن باستاپ جالىن بىردەن ەسەيە تۇسكەن. 9 جاستاعى ءدىلنار مەن 4 جاستاعى ىڭكارعا ءوزى باس-كوز بولىپ ءجۇر. ءدال وسى قايعىلى وقيعادا قايتىس بولعان مۇقيات مارقۇمنىڭ دا ارتىندا  بۇعاناسى قاتپاعان 3 بىردەي  بالاسى جەتىم، ال جارى  جەسىر قالدى. ونىڭ تۇڭعىشى 10 جاستا، قىمبات ەسىمدى قىزى بەستە، ال نۇرلاتى نەبارى 3-تە ەكەن. بالاپاندار تەلەارناعا ءوز ويلارىن ايتۋعا اسىقتى.

دۋلات مۇقيات ۇلى، مۇقيات زارىلحاننىڭ ۇلى:

- ولار توزاقتا جانى قينالسىن دەپ تىلەيمىن. 

قازەز توقا، مارقۇمنىڭ تۋىسى:

- ەكەۋىندە 3 بالا، بىرەۋىندە 2 بالا. سەگىز بالا قالدى. ەكى كارى قالدى. كارىنىڭ بىرەۋى دالاعا كىرىپ شىعادى، بىرەۋى مۇلدەم كىرىپ شىعا المايدى، مۇگەدەك بولىپ قالعان. وسى جونىندە اكىمشىلىككە مۇمكىندىگىنشە كومەك بولسا دەيمىز.

مارقۇمداردىڭ تۋىستارى قانعا قان، جانعا جان دەپ اشىنىپ وتىر. الايدا ەلىمىزدە ءولىم جازاسى مۇلدەم قولدانىلمايدى. ءقازىر جەرگىلىكتى اكىمدىكتەگىلەر دە قولدان كەلگەنشە قول ۇشىن بەرىپ، جاردەمدەسۋدە.

ءاليا سادىقوۆا، كوكسۋ اۋدانى اكىمىنىڭ ورىنباسارى:

- ءبىر ازاماتىمىزدىڭ ءتول-قۇجاتىن جاساپ جاتىرمىز. ءقازىر تۇستەن كەيىن اكەپ بەرەمىز. ءتولقۇجاتىن اۋىستىرۋعا بەرگەن ەكەن. اۋىل تاراپىنان قانداي كومەك قاجەت بولسا، ءبىز سونىڭ ءبارىن اتقارىپ جاتىرمىز.

جالپى قازا بولعان وتباسىنىڭ تۋىستارى ءۇش جىگىتتى الدىمەن اتقانىن، ارتىنشا كومگەندەرىن ايتىپ وتىر. ەندى بار تىلەكتەرى - ءىس ءادىل جۇرسە دەيدى. توسەك تارتىپ قالعان 90-عا كەلگەن اجە دە ۇلىن ولتىرگەن قىلمىسكەرلەر ءادىل جازاسىن السا دەيدى. ەرتەڭ قازا بولعان كوكسۋ اۋدانىنىڭ ءۇش تۇرعىنىن ەت-جاقىندارى جەر قويىنىنا تاپسىرادى.

بۇعان دەيىن حابارلاعانىمىزداي، 18 قىركۇيەك كۇنى الماتى وبلىسى ۇزىناعاش كەنتىنەن جوعالعان ءۇش ازامات جارقىنبەك دولدان ۇلى، مۇقيات زارلىحان ۇلى مەن قادىلبەك ءالىمحان ۇلى سول كۇنى قاراقشىلاردىڭ قولىنان قازا تاپقان بولاتىن. سەنبى كۇنى پوليسيا قىلمىسقا قاتىسى بار دەگەن كۇدىكپەن جامبىل اۋدانىنىڭ ەكى تۇرعىنىن قاماۋعا الدى. 

مارقۇمداردىڭ دەنەسى ەرتەڭ الماتى وبلىسى كوكسۋ اۋدانىندا جەر قوينىنا تاپسىرىلادى.