ۇزىناعاش بازارىندا مال ساتىپ ءجۇرىپ ءىز-تۇزسىز جوعالىپ، سوڭىندا قىلمىسكەرلەر قولىنان جازىم بولعان ءۇش جىگىتتىڭ ءولىمى وسى اۋلەتتە ورىن العان جالعىز قىلمىس ەمەس. قايتىس بولعان جىگىتتەردىڭ ءبىرى مۇقيات زارلىحاننىڭ اعاسىنىڭ ۇيىندە بىلتىر دا ءىرى توناۋ قىلمىسى ورىن العان، الايدا وعان كىنالىلەر سول كۇيى تابىلماعان، - دەپ حابارلايدى Qamshy.kz Baq.kz – كە سىلتەمە جاساپ.

قازا تاپقان ءۇش جىگىتتىڭ ءبىرى مۇقيات زارلىحاننىڭ تۋعان اعاسى ادال زارلىحاننىڭ ۇيىندە توناۋ قىلمىسى بىلتىر دا بولعان ەكەن. ىنىسىمەن قوسا ءوزى دە مال ساۋداسىمەن اينالىساتىن ادال زارلىحان بۇل وقيعا تۋرالى بىزگە بۇگىن ءوزى ايتىپ بەردى.

2015 جىلى 9 مامىر كۇنى تۇنگى 02:30 شاماسىندا ونىڭ ۇيىنە وتاعاسى جوق ورايدى پايدالانىپ، بەتىن بۇركەگەن قارۋلى 3 ادام باسىپ كىرگەن. ايەل، بالا-شاعاسىن بايلاپ تاستاپ، 1 ميلليون تەڭگە اقشاسى مەن ۇيدەگى وزگە دە اشەكەي بۇيىمدارىن تۇگىن قالدىرماي توناپ كەتكەن.

ادالدىڭ ايتۋىنشا، سوزدەرىنە ورىسشا ارالاستىرىپ سويلەپ، دارمەنسىز بالا-شاعاعا قارۋمەن ءقاۋىپ توندىرگەن قىلمىسكەرلەردىڭ ىسىمەن الماتى وبلىسى كوكسۋ اۋداندىق ىشكى ىستەر ءبولىمى اينالىسىپتى. بۇل جاعدايدان قاتتى قورىققان ونىڭ ايەلى مەن 9 جاسار قىزى ەمحاناعا جاتىپ، زورعا ساۋىققان ەكەن.

ايتا كەتەرلىگى، بۇل وتباسىعا قارۋلى شابۋىل جاساعان قانىپەزەرلەر ءالى كۇنگە ۇستالماپتى.

بۇعان دەيىن حابارلاعانىمىزداي، ۇزىناعاشتا جوعالعان ءۇش جىگىتتى ولتىرگەن كۇدىكتىلەردىڭ ەسىمى بەلگىلى بولدى.

وقيعانىڭ تولىق حرونولوگياسىن مىنا جەردەن وقي الاسىز.

سونداي-اق، اتالمىش قىلمىستىق وقيعاعا بۇرىنعى پوليسيا قىزمەتكەرىنىڭ قاتىسى بار بولۋى مۇمكىن دەگەن مالىمەتتەرمەن ءبولىستى قايتىس بولعان جىگىتتەردىڭ تۋعان-تۋىستارى. ازىرگە، بۇل جايىندا ىشكى ىستەر ورگاندارى رەسمي تۇسىنىكتەمە بەرگەن جوق.