استانا قالاسىنداعى №2 ەسىل اۋداندىق سوتىندا سەيىتقازى جانە اسەت ماتايەۆتاردىڭ ءىسى بويىنشا سوت وتىرىسى ودان ءارى جالعاسۋدا. بۇگىن وتكەن تاراپتاردىڭ پىكىر سايىسىندا پروكۋرور ەرجان قۇراقبايەۆ سەيىتقازى ماتايەۆتى جەكە مۇلكىن كامپەسكەلەۋمەن جانە ءومىر بويى كاسىپكەرلىك قىزمەتپەن اينالىسۋعا تىيىم سالۋمەن قوسا 6 جىل 8 ايعا باس بوستاندىعىنان ايىرۋدى سۇرادى. سونىمەن قاتار، اسەت ماتايەۆتى كىنالى دەپ تاۋىپ، جەكە مۇلكىن كامپەسكەلەۋمەن قوسا 6 جىلعا باس بوستاندىعىنان ايىرۋدى سۇرادى.

پروكۋرور سوت تەرگەۋى ناتيجەسىندە تاعىلعان ايىپتار بويىنشا سەيىتقازى جانە اسەت ماتايەۆتاردىڭ كىناسى تولىق كولەمدە انىقتالعانىن جانە سوتقا ۇسىنىلعان ايىپتاۋلاردىڭ نەگىزىندە دالەلدەنگەنىن ايتتى. «وسىعان وراي، ماتايەۆ سەيىتقازىنىڭ قىلمىستىق ارەكەتتەرىن قىلمىستىق كودەكستىڭ 190-شى بابىنىڭ 4ء-شى تارماعىنىڭ 2ء-شى تارماقشاسى بويىنشا، ياعني الاياقتىق – الدىن-الا ءبىر توپ ادامدارمەن ءسوز بايلاسىپ، الداۋ مەن سەنىمدى تەرىس ماقساتقا پايدالانۋ جولىمەن بوتەننىڭ مۇلكىن ۇرلادى، ءوزىنىڭ قىزمەت بابىن پايدالانىپ، بىرنەشە رەت مەملەكەتتىك ساتىپ الۋ سالاسىنان ءىرى كولەمدەگى اقشا ۇرلادى جانە قىلمىستىق كودەكستىڭ 245ء-ىنشى بابىنىڭ 3ء-ىنشى تارماعى بويىنشا، ياعني اسا ءىرى كولەمدەگى دەكلاراسيا تاپسىرۋ مىندەتتى بولعان جاعدايدا دەكلاراسيا تاپسىرماۋ جولىمەن بيۋدجەتكە سالىق تولەۋدەن جالتاردى دەپ تۇپكىلىكتى بەلگىلەۋ كەرەك»،- دەدى سوتتا ەرجان قۇراقبايەۆ.

مەملەكەتتىك ايىپتاۋشى سەيىتقازى ماتايەۆقا قاتىستى ايىپتاۋشى تاراپتىڭ ەشقانداي جازاسىن جەڭىلدەتەتىن جاعدايدىڭ (مۇنداي جاعداي قىلمىستىق كودەكستىڭ 53ء-ىنشى بابى بويىنشا قاراستىرىلعان) جوقتىعىن ايتتى. «جوعارىدا ايتىلعانداردىڭ نەگىزىندە، قىلمىستىق كودەكستىڭ 58ء-ىنشى بابىنىڭ 3ء-ىنشى تارماعى بويىنشا ماتايەۆ سەيىتقازى بەيسەنعازىۇلىنا جەكە مۇلكىن كامپەسكەلەۋمەن جانە ءومىر بويى كاسىپكەرلىك قىزمەتپەن اينالىسۋعا تىيىم سالۋمەن قوسا 6 جىل 8 ايعا باس بوستاندىعىنان ايىرۋ جازاسىن تاعايىنداۋدى سۇرايمىن. جازاسىن جالپى تارتىپتەگى ەڭبەكپەن تۇزەۋ كولونياسىندا وتەسىن»،- دەپ ءسوزىن جالعادى پروكۋرور.

ايتا كەتەرلىگى، مەملەكەتتىك ايىپتاۋشى سەيىتقازى ماتايەۆتىڭ ۇلى – اسەت ماتايەۆتى دا قىلمىستىق كودەكستىڭ 190-شى بابىنىڭ 4ء-شى تارماعىنىڭ 2ء-شى تارماقشاسى بويىنشا (الاياقتىق – الدىن-الا ءبىر توپ ادامدارمەن ءسوز بايلاسىپ، الداۋ مەن سەنىمدى تەرىس ماقساتقا پايدالانۋ جولىمەن بوتەننىڭ مۇلكىن ۇرلاۋ، ءوزىنىڭ قىزمەت بابىن پايدالانىپ، بىرنەشە رەت مەملەكەتتىك ساتىپ الۋ سالاسىنان ءىرى كولەمدەگى اقشا ۇرلاۋ) كىنالى دەپ تاۋىپ، مۇلكىن كامپەسكەلەۋمەن جانە ءومىر بويى كاسىپكەرلىك قىزمەتپەن اينالىسۋعا تىيىم سالۋمەن قوسا 6 جىلعا باس بوستاندىعىنان ايىرۋ جازاسىن تاعايىنداۋدى سۇرادى. وعان دا جازاسىن جالپى تارتىپتەگى ەڭبەكپەن تۇزەۋ كولونياسىندا وتەۋ سۇرالدى.

ەرجان قۇراقبايەۆ ءوز سوزىندە سوتتان سەيىتقازى جانە اسەت ماتايەۆتاردان بيۋدجەتكە تولەنبەگەن سالىق تۇرىندەگى 216 952 683 تەڭگەنى ءوندىرىپ الۋ جونىندەگى پروكۋروردىڭ شاعىمىن، سونداي-اق «قازاقتەلەكوم» اق-نىڭ 143 960 753 تەڭگەسىن جانە بايلانىس، اقپاراتتاندىرۋ جانە اقپارات كوميتەتىنىڭ 169 000 000 تەڭگەسىن ءوندىرىپ بەرۋ تۋرالى شاعىمدىق تالاپتارىن تولىق كولەمدە قاناعاتتاندىرۋدى ۇسىندى.  ايتا كەتەلىك، سەيىتقازى جانە اسەت ماتايەۆتارعا اسا ءىرى كولەمدەگى بيۋدجەت قاراجاتىن ۇرلادى، سالىق تولەۋدەن جالتاردى دەگەن ايىپتار تاعىلدى. سوتقا دەيىنگى تەرگەۋ نۇسقاسى بويىنشا، بارلىق قىلمىستىق ارەكەتتەردى قوسا ەسەپتەگەندە مەملەكەتكە 529 ملن. تەڭگەدەن استام زيان كەلگەن.

ءامىرلان ءالىمجان