الماتى وبلىسى جامبىل اۋدانىندا قازا بولعان اعايىندى جىگىتتەردىڭ تۋىستارى جەرلەۋ ءراسىمى كەزىندە قوعامنان قايعىلى جاعدايدى قىزۋ تالقىلاماۋدى، پوليسەيلەردەن ءىستى اياعىنا دەيىن جەتكىزۋدى سۇرادى، - دەپ حابارلايدى Qamshy.kz.

الماتى وبلىسىنىڭ كوكسۋ اۋدانىندا وتكەن جەرلەۋ راسىمىنە مارقۇمداردىڭ جاقىن تۋىستارىنان بولەك، اۋدان باسشىلىعى، باسقا قالالاردان كەلگەن ازاماتتار دا قاتىستى.

«قۇرمەتتى باۋىرلار، اپكە-قارىنداستار، الماتى وبلىسىنىڭ اكىمى اماندىق باتالوۆ سىزدەرگە كوڭىل ايتادى. بۇل بارىنە ورتاق قايعى. قازا بولعان باۋىرلارىمىزدى سوڭعى ساپارعا شىعارىپ سالۋ – ءبارىمىزدىڭ مىندەتىمىز. سابىر ەتىڭىزدەر»، – دەدى «نۇر وتان» پارتياسى الماتى وبلىستىق فيليالى ءتوراعاسىنىڭ ءبىرىنشى ورىنباسارى عالياسقار سارىبايەۆ.

«قىلمىسكەرلەر ۇستالدى. ولاردى جازالاۋدى مەملەكەت پەن قۇقىق قورعاۋ ورگاندارى شەشەدى. ەكى ازامات ۇستالدى. ءوز باسىم ولاردىڭ سۋرەتتەرىن دە كوردىم. تەرگەۋ ءبىر عانا كۇنگە سوزىلمايدى. مۇمكىن ءبىر اي نە ودان دا كوپ بولار»، – دەدى مارقۇمداردىڭ تۋىسى ەركىن بەيسەكە ۇلى.

مارقۇمداردىڭ جانازاسىنا «نۇر وتان» پارتياسى الماتى وبلىستىڭ فيليالىنىڭ ءبىرىنشى ورىنباسارى عالياسقار سارىبايەۆ، وبلىستىق ىشكى ساياسات باسقارماسىنىڭ جەتەكشىسى رۋستام الپىسبايەۆ، كوكسۋ اۋدانىنىڭ اكىمى الماس ءادىل، ارداگەرلەر كەڭەسىنىڭ وكىلدەرى ت.ب. قاتىستى.

ەسكە سالا كەتەيىك، وتكەن جەكسەنبىدە باق-تا الماتى وبلىسى جامبىل اۋدانىندا مال ساۋداسىمەن اينالىسىپ جۇرگەن ءۇش جىگىتتىڭ جوعالىپ كەتكەنى تۋرالى حابارلانعان بولاتىن.

مارقۇمداردىڭ تۋىسقاندارىنىڭ ايتۋىنشا، دولدان ۇلى جارقىنبەك (1979 جىلى تۋعان)، زارلىحان ۇلى مۇقيات (1973 جىلى تۋعان)، ءالىمحان قادىلبەك شىعىس قازاقستان وبلىسىنىڭ تارباعاتاي اۋدانىنان ساتىپ العان 40 باس مالدى ەكى جۇك كولىگىمەن 17 قىركۇيەك كۇنى ۇزىناعاش بازارىنا شىعارعان. 19 قىركۇيەكتە سوڭعى رەت بايلانىسقا شىققان.

بىرنەشە كۇننەن كەيىن ولاردىڭ دەنەسى تابىلدى. ولتىرىلگەن اعايىندىلاردى ءولىم الدىندا ايۋاندىقپەن قيناعانىن حابارلاعان ەدىك.