الماتى قالاسىنداعى جامبىل اتىنداعى قازاق مەملەكەتتىك فيلارمونياسىندا قازاقستان كومپوزيتورلار قاۋىمداستىعىنىڭ ۇيىمداستىرۋىمەن تاۋەلسىزدىكتىڭ 25 جىلدىعىنا، 1916 جىلعى ۇلت-ازاتتىق قوزعالىسىنىڭ 100 جىلدىعىنا، جەلتوقسان وقيعاسىنىڭ 30 جىلدىعىنا ارنالعان «تاريحي ارمان – تاۋەلسىزدىك» اتتى سالتاناتتى كەش ءوتتى، - دەپ حابارلايدى Qamshy.kz anatili.kazgazeta.kz سايتىنا سىلتەمە جاساپ.
قازاقستان كومپوزيتورلار وداعىنىڭ ءتورايىمى بالنۇر قىدىربەك كەشتىڭ ءمان-ماعىناسىنا توقتالىپ، سان عاسىر بويى ارمانداعان تاۋەلسىزدىكتىڭ قادىر-قاسيەتىن دۇرىس تۇسىنۋگە، سول جولدا بىرلەسە ەڭبەك ەتۋگە شاقىردى.
ب.قىدىربەك «…مايقى بابامىزدان باستاپ ەل ازاتتىعى تاقىرىبى اۋەز جەلىسىنە ءوز ىقپالىن بەرگەن. ءاسىرەسە، بۇل ءۇردىس اسپاپتىق مۋزىكادان اڭعارىلادى. قورقىت، كەتبۇعا كۇيلەرى جەكە تۇلعا بوستاندىعىن دارىپتەسە، بەرى كەلە قازتۋعاننىڭ «ساعىنىش» كۇيىنەن باستاپ تاقىرىپ شەڭبەرى كەڭەيىپ، ەل تاعدىرىمەن بايلانىستىرىلادى. اقتابان شۇبىرىندى، القاكول سۇلاما كەزىندەگى شىعارمالار مۇڭعا، زارعا تولى شەرتپە ءتاسىلىن ەنگىزدى. ءحىح عاسىردا ۇلت-ازاتتىق قوزعالىسى ەلىمىزدىڭ شىعىسىنان باتىسىنا اۋدى. ەسەت كوتىبار ۇلى، اداي، بوكەي، كەنەسارى كوتەرىلىستەرى مۋزىكا شىعارماشىلىعىنا دا ارقاۋ بولدى. تاۋەلسىزدىكتى اڭساعان دۇنيەلەر قۇرمانعازى شىعارماشىلىعىندا ەڭ بيىك شوقتىعىنا جەتتى. بۇگىنگى كومپوزيتورلار شىعارماشىلىعى وسى باعىتتى جالعاستىرىپ ءجۇر» دەي كەلە، كەش بارىسىندا ورىندالاتىن شىعارمالاردىڭ تاريحىنا دا توقتالدى. «ۆلاديمير ستريگوسكيي-پاك شىعارماسىنا ەكى تاقىرىپ العان: دينانىڭ كۇيى «1916 جىل» جانە كەنەسارى مارشى. مەنىڭ «بەكبولات» اتتى پوەمام – جەتىسۋدا بولعان كوتەرىلىس جايىندا. ال بەيبىت دالدەنبايدىڭ «جەلتوقسان تولقۋى» اتتى شىعارماسى 1986 جىلعى جەلتوقسان وقيعاسىنا ارنالعان. قاي شىعارمانى الساڭىز دا تۇنىپ تۇرعان تاريح جاتىر» دەدى ب.بالعابەك قىزى.
كەش بارىسىندا ب.قىدىربەك، ا.امانجول، ب.دالدەنباي، ە.ءومىروۆ، ح.سەتەكوۆ، ۆ.ستريگوسكيي-پاك شىعارمالارى ورىندالدى. مەملەكەتتىك سيمفونيالىق وركەستر (ديريجەرلارى ەربولات احمەدياروۆ، ءماديار تىلەپوۆ)، ب.بايقاداموۆ اتىنداعى حور كاپەللاسى (كوركەمدىك جەتەكشىسى ق ر ەڭبەك سىڭىرگەن قايراتكەرى بەيىمبەت دەمەۋوۆ)، سوليستەر: حالىقارالىق بايقاۋلاردىڭ لاۋرەاتتارى جادىرا امانوۆا، اسحات مادييەۆ، بورانباي قاليبايەۆ قاتىسىپ، كورەرمەندەردىڭ ىستىق ىقىلاسىنا بولەندى.
باعداگۇل بالاۋبايەۆا
