كارىم ءماسىموۆ ۇلتتىق قاۋىپسىزدىك كوميتەتىنىڭ باسشىسى بولعان كۇنى مىنا ويلارىمدى ءبىر ازاماتتارعا ايتىپ ەدىم، ەندى كوپشىلىكپەن دە بولىسكىم كەلىپ وتىر.

نۇرسۇلتان نازاربايەۆ يسلام كارىموۆ ولگەنننەن كەيىن كوپ ۇزاماي كارىم ءماسىموۆتى ۇقك ءتوراعا ەتىپ تاعايىندادى. ونىڭ نەگىزگى سەبەبى- ۇقك كۇشەيتۋ ارقىلى پرەزيدەنت ءوزىنىڭ مۇراگەرىن ساقتاۋدى جانە وعان باسەكەلەس بولۋى مۇمكىن ادامداردى ساياسي ساحنادان الاستاۋدى كوزدەيدى.

وزبەكستاندا ۇلتتىق قاۋىپسىزدىك قىزمەتىنىڭ (سنب)، ونىڭ باسشىسى رۋستام ينوياتوۆتىڭ ارقاسىندا شاۆكات ميرزيويەۆ پرەزيدەنتتىك ورىننىڭ جالعىز ۇمىتكەرى بولىپ وتىر دەپ ەسەپتەيمىن.

كارىم ءماسىموۆ ۇقك بارعاننان كەيىن كوپ ۇزاماي بيۋدجەتتەن قۇقىق قورعاۋ ورگاندارىنا قوسىمشا 70 ملرد. تەڭگە ءبولىندى.

قىسقاشا ايتساق، وسى جىلدىڭ 02 قىركۇيەگىندە يسلام كاريموۆ كوز جۇمدى، 08 قىركۇيەكتە كارىم ءماسىموۆ ۇقك باسشىلىققا تاعايىندالدى، 13 قىركۇيەكتە وسى سالاعا  قوسىمشا 70 ملرد. تەڭگە اقشا ءبولىندى.

مەنىڭ ىشكى ەسەبىم بويىنشا بولاشاقتا پرەزيدەنتتىككە ۇمىتكەر بولۋى مۇمكىن-اۋ دەگەن ادامدار تۋرالى جاعىمسىز اقپاراتتار (كومپرومات) تاراتۋ ءىسى كارىم ءماسىموۆ تاعايىندالعاننان 2-3 اي وتكەننەن كەيىن باستالۋى كەرەك بولاتىن. ءبىراق، كارىم اكا ول ءىستى تەزىرەك باستاۋدى ءجون كورگەن سياقتى ما دەپ قالدىم.

ونىڭ ءبىر سەبەبى، سوڭعى كۇندەرى «كاراۆان» گازەتى يمانعالي تاسماعامبەتوۆتىڭ قورعانىس ءمينيسترى بولىپ تۇرعان كەزدەگى كەمشىلىكتەرىن ءتىزىپ، ونىڭ ۇلكەن قىزى اسەل تاسماعامبەتوۆا مەن كۇيەۋى كەڭەس راقىشيەۆتىڭ بايلىعى تۋرالى جازا باستادى.

ءارى قاراي وسىنداي اقپاراتتىق شابۋىلدار تاعى بىرنەشە ادامعا باعىتتالۋى مۇمكىن.

ەڭ نەگىزگىسى كارىم ءماسىموۆ پرەزيدەنت ۇسىناتىن مۇراگەردىڭ باسەكەلەستەرىن جويۋمەن عانا شەكتەلە مە، الدە «ح» ساعاتتا ءوزى نەگىزگى باسەكەلەسكە اينالا ما؟ ماسەلە وسىندا...

بۇل ارينە مەنىڭ جەكە پىكىرىم. مەن قاتەلەسكەن بولۋىم دا مۇمكىن. سىزدەر قالاي ويلايسىزدار؟

ماقسات ءىلياس ۇلىنىڭ فەيسبۋكتەگى پاراقشاسىنان الىندى