وسكەمەندىك وتباسى حالىقارالىق باعدارلامامەن شەتەل اسقان ۇلدارىن تاپپاي قالدى. اقش-تاعى ەڭ بەدەلدى ۋنيۆەرسيتەتكە 2007 جىلى تۇسكەن ەرجان ەلىكوۆ وقۋىن بىتىرەتىن جىلى ەلگە ورالماعان.

ەرجان ەلگە ورالۋىنا ەكى اي قالعاندا، اقش-تا ءىز-تۇسسىز جوعالىپ كەتىپتى،- دەپ حابارلايدى Qamshy.kz كتك ارناسىنا سىلتەمە جاساپ.

"سوڭعى رەت ول ماعان 2011 جىلى تەلەفون سوقتى. مەنى 8 ناۋرىز مەرەكەسىمەن قۇتتىقتاعان بولاتىن. سودان بەرى ۇلىمنان حابار جوق. جازباعان جەرىمىز، كىرمەگەن ەسىگىمىز قالمادى. ءبىراق بىردە-بىر مەملەكەتتىك ورگان ۇلىمدى تاۋىپ بەرۋگە كۇش سالىپ جاتقان جوق"، - دەيدى ەرجاننىڭ اناسى زياينيا ەلىكوۆا.

ءقازىر 28 جاسقا تولعان ەرجان ءتورت جىل بويىندا ۇيىنە ۇزدىكسىز قوڭىراۋ شالىپ وتىرىپتى. جازعى دەمالىس سايىن دا ەلگە كەلىپ جۇرگەن. سوندىقتان تەلەفونى ءسونىپ قالعاندا، اتا-اناسى ونشا كۇدىكتەنە قويمادى. ءبىراق ەلگە ورالاتىن ۋاقىتى جاقىنداعان ستۋدەنت سول بويى جوعالعان. ۋنيۆەرسيتەتى دە ىزدەمەگەن. قايتا قاتىسپادى دەپ ونى سىرتتاي وقۋدان شىعارىپ جىبەرىپتى. «بولاشاقتاعىلار» دا بايلانىسقا شىقپاعان ستۋدەنتكە ءجۇردىم-باردىم قاراپ ستيپەندياسىنان ايىرىپ قويا سالعان.

"كۇيەۋىم كۇدىكتەنىپ، بىردەن استاناعا جول تارتتى. بالانى «بولاشاقتىڭ» كەڭسەسىنەن بارىپ سۇرادى. ءبىراق ونداعىلار جاۋاپ بەرە المادى. ءبىلىپ بەرەمىز دەدى دە، بالانىڭ قايدا ەكەنىن سول كۇيى ايتپادى"، - دەيدى ەرجاننىڭ اناسى زياينيا ەلىكوۆا.

 «بولاشاقپەن» كەتكەن ەرجاننىڭ جوعالعانىنا وسىمەن بەسىنشى جىل. جالعىزىنان كوز جازىپ قالعان اكەنىڭ جازباعان جەرى قالماعان. ارتىنان اقش-قا ءوزى ىزدەپ بارايىن دەسە، قالتالارىندا قارجى جوق. قاراپايىم مەتالۋرگتىڭ تاپقان تابىسى، شەتەل اسۋعا جەتپەيدى. ودان قالدى وتباسى ءقازىر دالادا قالعان. ويتكەنى جالعىز پاتەرىن «بولاشاقتاعىلار» وقۋدىڭ وتەماقىسى رەتىندە سوت ارقىلى تارتىپ العان.

تاعى 20 ميلليون تەڭگە قارىز ارتىپ قويعان. ءبىراق ەلىكوۆتەر وتباسى باسپاناسىن العان «بولاشاق» بارىنەن بۇرىن بالامىزدى قايتارسا دەيدى.

«بولاشاق» باعدارلاماسىن ۇيىمداستىرۋشىلار بالامدى قايتارۋى ءتيىس. شەتەلگە جىبەرگەن سوڭ باس-كوز بولۋ كەرەك ەمەس پە؟ بەس جىل بولدى، جاۋاپ جوق. ستۋدەنتتى ىزدەۋدىڭ ورنىنا، سوت ارقىلى وقۋ اقىسىن ءوندىرىپ الدى"، - دەيدى ەرجاننىڭ اكەسى سەرىك ەلىكوۆ.

ءبىراق، بالانىڭ تاعدىرىنا الاڭداعان «بولاشاق» جوق. الەمدەگى 20-دان استام مەملەكەتكە جىل سايىن مىڭداعان قىز-جىگىتتى جونەلتەتىن مەكەمە ەرجان ەندى ءبىزدىڭ ستۋدەنت ەمەس دەپ جايباراقات وتىر.

"ەرجان ەلىكوۆ وقۋ ۇلگەرىمى ناشارلاعان سوڭ، ستيپەندياسىنان ايىرىلدى. ءقازىر ول ءبىزدىڭ ستۋدەنت ەمەس. ءقازىر ءبىز ولارعا سوت ارقىلى قالعان قارجىنى وتەۋ تۋرالى ەسكەرتۋ قاعازىن جىبەردىك. ونىڭ جوعالىپ كەتكەنىنە ءبىزدىڭ قاتىسىمىز جوق"، - دەيدى «بولاشاق» حالىقارالىق باعدارلامالار ورتالىعى اق ۆيسە-پرەزيدەنتى مەيىرجان الپىسباي.

ال اناسى جىلاي-جىلاي كوزدىڭ جاسىن تاۋىسقان. بىرنەشە رەسپۋبليكالىق وليمپيادالاردىڭ جۇلدەگەرى، قازاق-تۇرىك ليسەيىنىڭ ۇزدىگى ەرجان 18 جاسىندا الماتىداعى زاڭگەرلەر اكادەمياسىنا گرانتقا ءتۇسىپتى. سودان بىردەن «بولاشاققا» بارعان. قازاق بالاسى پەنسيلۆانيا شتاتىنداعى ەڭ بەدەلدى ۋنيۆەرسيتەتتە ساناۋلى گرانتتىڭ يەگەرى اتانىپتى. ەندى نە ءولى، نە ءتىرىسىن ەشكىم بىلمەي وتىر.