قازاقستاننىڭ اقپارات جانە كوممۋنيكاسيالار ءمينيسترى داۋرەن ابايەۆ بۇقارالىق اقپارات قۇرالدارىنىڭ قىزمەتىن ۇيلەستىرۋ جونىندەگى زاڭنامالارعا ەنگىزىلگەلى جاتقان وزگەرتۋلەر مەن تولىقتىرۋلار، وسى ماسەلەگە قاتىستى قوعامدا تالقىلانىپ جاتقان جاعدايلارعا قاتىستى پىكىر ءبىلدىردى، - دەپ حابارلايدى Qamshy.kz.
مينيستر وسى ماسەلەگە قاتىستى ويىن فەيسبۋكتەگى پاراقشاسىندا جاريالادى.
«ەكى اپتا بۇرىن «اشىق نورماتيۆتىك قۇقىقتىق اكتىلەر» پورتالىنا «اقپارات جانە كوممۋنيكاسيالار ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە تولىقتىرۋلار مەن وزگەرتۋلەر ەنگىزۋ تۋرالى» زاڭ جوباسىنا قاتىستى تۇجىرىمدامانى ورنالاستىرعانىمىزدى بىلەسىزدەر.
بۇل وسى سالانى دامىتۋدىڭ كوكەيكەستى ماسەلەلەرى بويىنشا ءوزارا پىكىر، يدەيا الماسۋ ءۇشىن جاسالعان قادام بولاتىن»، - دەگەن مينيستر زاڭ جوباسىن تالقىلاۋ قوعامنىڭ بارلىق مۇددەلى توپتارىنىڭ ۇسىنىس-پىكىرلەرى نەگىزىندە جۇزەگە اساتىنىن ايتادى.
«ارينە، جان-جاقتى ديالوگ اتالعان زاڭ جوباسى ناقتى مەحانيزمدەرىمەن نازارلارىڭىزعا ۇسىنىلعان كەزدە باستالادى. دەگەنمەن، كورىپ وتىرعانىمىزداي، وسى العاشقى كەزەڭنىڭ وزىندە قوعام مەن مەديا قاۋىمداستىقتى الاڭداتاتىن نەگىزگى ماسەلەلەر بەلگىلى بولۋدا.
ماسەلەن، بلوگەرلەر مارتەبەسىنە وزگەرتۋ ەنگىزۋ ۇسىنىسى قوعامدا قىزۋ تالقىلانىپ جاتىر. سوندىقتان، ءدال وسى ماسەلەنىڭ ءمان-جايىنا توقتالا كەتسەم دەيمىن»، - دەيدى د. ابايەۆ.
وسى ورايدا مينيستر مەملەكەتتىڭ الەۋمەتتىك جەلى قولدانۋشىلارىن قاتاڭ باقىلاۋعا الۋدى ماقسات ەتىپ وتىرماعانىن ايتادى.
«بۇل جەردە كوزدەلگەنى وتاندىق بلوگوسفەراعا قاتاڭ باقىلاۋ ورناتۋ ەمەس. ءوز باسىم، مۇنداي ارەكەت قوعام ءۇشىن ءتيىمسىز دەپ سانايمىن. ءبىز تۇجىرىمدامادا الەۋمەتتىك جەلىنىڭ بەلسەندى قولدانۋشىلارىنا ءوز قالاۋىمەن جەلىلىك باسىلىم رەتىندە تىركەۋگە تۇرۋ مۇمكىندىگىن بەرۋدى ۇسىنىپ وتىرمىز. ياعني، بۇل دەگەنىمىز ولارعا جاڭا مۇمكىندىك پەن قۇقىق بەرىلەدى دەگەن ءسوز.
ارينە، تۇجىرىمداماعا قاتىستى قوعامدىق پىكىرتالاستىڭ جاندانۋى ۋاكىلەتتى ورگان رەتىندە ءبىزدى تەك قۋانتادى. مينيسترلىك سىندارلى ۇسىنىستاردى، ونىڭ ىشىندە سىني پىكىرلەردى دە ەسكەرەتىن بولادى»، - دەيدى مينيستر.
ونىڭ ايتۋىنشا، «اشىق نقا» پورتالى ارقىلى اتالعان ماسەلەگە قاتىستى اركىم ءوز ۇسىنىستارىن جولداي الاتىن كورىنەدى.
