اقتاۋدا التى جاسار قىزدى اياۋسىز زورلاعان ەر ادامنىڭ اقىل-ەسى ورنىندا دەپ تانىلعان. كۇدىكتى تۋرالى تىڭ اقپاراتتار بەلگىلى بولدى. بۇل تۋرالى "31 ارناعا" سىلتەمە جاساپ Qamshy.kz  حابارلايدى.

بالانى زورلادى دەگەن كۇدىكپەن قاماۋعا الىنعان ەر ادامنىڭ ءوزى زورلىق قۇرباندارىنىڭ ءبىرى دەيدى ونىڭ قورعاۋشىسى ناميگ ۆەلييەۆ. ايتۋىنشا، بالا كەزىندە كۇدىكتىگە شيزوفرەنيامەن سىرقات وگەي اعاسى كوپ تيىسەتىن. بۇگىندە 32 جاستاعى كۇدىكتىنىڭ بەس جاسار ۇلى مەن ايەلى بار. قاماۋعا الىنعانىنا دەيىن جەكە تاسىمالمەن اينالىسىپ كەلگەن.

ادۆوكاتى كۇدىكتى كامەرالاستارىنان قىسىم كورگەندىكتەن، ءىستى موينىنا الدى دەپ وتىر. بۇل تۋرالى "استانا" ارناسى حابارلايدى.

"ءىستى موينىنا الماساڭ، جانۇياڭا ءزابىر كورسەتەمىز دەپ، قورقىتىپ ۇركىتكەن. تۇرعىلىقتى مەكەنجايىن، ايەلىنىڭ جۇمىس ورنىن، ءتىپتى بالاسىنىڭ قاي بالاباقشاعا بارىپ جۇرگەنىن ءبىلىپ الىپتى"، - دەيدى ناميگ ۆەلييەۆ.

ءقازىر پروكۋراتۋراعا ءتيىستى شاعىم جىبەرىلگەن. كۇدىكتىنىڭ وتباسى تاۋلىك بويى كۇزەتىلۋدە. قىلمىس جاسالعان كۇنى ول تاسىمالداۋمەن اينالىسىپ جۇرگەنىن ايتقان. ءىس ماتەريالدارىنا سايكەس شىنىندا كۇدىكتى 1ء-شى شاعىناۋداندا بولعان. بۇل جەرگە كليەنتتى اكەلىپ، كەيىن تەڭىز جاققا بەت العان. جول بويى دارەت سىندىرۋ ءۇشىن توقتاعانىن ايتادى.

ال زورلىق كورگەن ءسابي وسى جەردەن تابىلدى. ايىپتالۋشى تەڭىز جاقتان كليەنت وتىرعىزىپ، قالاعا قايتتىم دەپ انت-سۋ ءىشىپ وتىر. بۇل سوزدەرىن راستايىن كۋاگەرلەر دە بار. كولىگىندە بالانىڭ بولعانىن ايعاقتايتىن زاتتار جوق. تەك گەنەتيكالىق ساراپتاما بارلىعىن جوققا شىعارىپ وتىر. ادۆوكات ونىڭ قورىتىندىسى بۇرمالانعان دەيدى.

ەسكە سالايىق، كۇدىكتى زورلىق، ادام ۇرلاۋ جانە كىسى ولىمىنە وقتالۋ باپتارىمەن ايىپتالىپ وتىر. كىناسى دالەلدەنسە، 25 جىل جازا ارقالاۋى مۇمكىن.

ال سۇمدىق وقيعا 20 تامىز كۇنى اقتاۋدا ورىن العان. 6 جاسار ءسابيدى الدەكىمدەر ۇرلاپ اكەتىپ، ازاپتاپ زورلاعان. دارىگەرلەر ونىڭ ءومىرى ءۇشىن ءالى كۇنگە كۇرەسۋدە. استاناداعى انا مەن بالا ورتالىعىندا ەمدەلىپ جاتقان ءسابيدىڭ ءحالى اۋىر.