«يادرولىق قارۋسىزدانۋ مەن قاۋىپسىزدىككە قوسقان ۇلەسى ءۇشىن» قازاقستاننىڭ حالىقارالىق سىيلىعى تاعايىندالدى، - دەپ حابارلايدى Qamshy.kz قازاقپارات – قا سىلتەمە جاساپ.

بۇل تۋرالى بۇگىن اقوردادا ءبىرقاتار شەتەل ەلشىسىنەن سەنىم گراموتالارىن قابىلداعان ق ر پرەزيدەنتى نۇرسۇلتان نازاربايەۆ مالىمدەدى

«قازاقستان جاھاندىق يادرولىق قوزعالىسقا باستاماشى بولىپ، ونىڭ كوشباسشىسىنا اينالعانىن دۇنيەجۇزى مويىندادى، ونى بىلەسىزدەر. وسى رەتتە بۇگىن سىزدەرگە جانە حالقىمىزعا تاعى ءبىر جاڭا باستامامىزدى ايتا كەتكىم كەلەدى. مەن ارناۋلى سىيلىق تاعايىنداۋ جونىندەگى شەشىم قابىلدادىم. بۇل «يادرولىق قارۋسىزدانۋ مەن قاۋىپسىزدىككە قوسقان ۇلەسى ءۇشىن» قازاقستاننىڭ حالىقارالىق سىيلىعى بولىپ سانالادى. بيىلعى تۇڭعىش سىيلىقتىڭ العاشقى لاۋرەاتى بولىپ يوردانيا  كورولى ابدوللا ءىى تاڭدالدى»، - دەدى نازاربايەۆ.

سونىمەن قاتار مەملەكەت باسشىسى  اتالعان سىيلىقتى بەرۋ جونىندەگى ارنايى كوميتەت قۇرىلاتىندىعىن دا اتاپ ءوتتى.

«سول كوميتەتتىڭ شەشىمىمەن سىيلىقتى جىل سايىنعى يادرولىق پوليگون جابىلعان 29 تامىزدا تاپسىراتىن بولامىز»، - دەدى ەلباسى.