كولىك اپاتى
ءبىز بۇگىن زامانىمىزدىڭ قاھارمانى ءامينا انامىز جايلى ءبىر ۇزىك سىرعا توقتالايىق. ميىنا قان قۇيىلىپ ەس-تۇسسىز جاتقان ءامينا اپانىڭ اۋرۋىنا شيپا تاۋىپ، بۇگىندە قايتا كۇش-قۋاتىن جيناپ جەتىم بالار ءۇشىن ءومىر مايدانىنا كىرىسۋىنىڭ ءوزى اللانىڭ كەرەمەتى دەرسىز.
اڭگىمەنى ارىدان باستاساق، مەن ءامينا اپانى ەڭ العاش حالىقارالىق بالالار كۇنىندە الماتىداعى وقۋشىلار سارايىندا كوردىم. ءبىر قولىندا ەمىزۋلى جاستاعى ءسابي، ەتەگىندە شۇپىرلەگەن بىرنەشە بالاقايلار ەرىپ ءجۇر. بۇل كورىنىسكە تاڭ قالماۋ مۇمكىن ەمەس. ءوزىمنىڭ دە العاش قولىما قالام ۇستاپ، جۋرناليستيكا سالاسىندا الىپ-ۇشىپ تۇرعان كەزىم. دەرەۋ جانىنا جۇگىرىپ بارىپ سۇحبات بەرۋىن دە ءوتىندىم. كەلىسىم بەرگەن ءامينا اپانىڭ جاقىن ماڭداعى تالعار قالاسىندا تۇراتىنىن ءبىلىپ، تەلەفونىن دا الىپ الدىم. اراعا بىرنەشە اپتا ۋاقىت سالىپ ءامينا اپاعا حابارلاسىپ ەدىم، ول كىسى: «اينالايىن، تەليەۆيزورعا سۇحبات بەرمەي-اق قويايىنشى. وتكەندە سەن سۇحبات العاننان كەيىن ەسىگىمنىڭ الدىنا بىرەۋلەر بالالارىن تاستاپ كەتىپتى. سونداي بالالاردى الىپ كەلىپ تاستاپ كەتەتىندەر كوبەيدى»، - دەپ قىنجىلدى. راسىمەن ول جولى سۇحبات الا المادىم. ءبىراق، ءامينا اپامەن ارامىز ۇزىلگەن ەمەس. ودان كەيىن تالاي باعدارلامالار جاسالدى، ءار كەزدەسكەن سايىن «انا» دەگەن ۇلى ەسىمگە باس ءيىپ، ومىرگە دەگەن تانىمىمىزدى كەڭەيتىپ قايتامىز.
وسىدان 5 جىل بۇرىن ءامينا اپانىڭ اۋىر جول اپاتىنان ءدىن امان قالعانىنا قاراپ، وسىنشا جەتىم بالالاردى جىلاتپاي قايىرىمدى انالارىن امان قالدىرعان اللانىڭ مەيىرىمىنە ءتانتى بولاسىز. سەبەبى، استانادان الماتىعا بەت العان كولىكتىڭ ءبىر جانى وپىرىلىپ جوق بولعان سۋرەتتى كورگەندە، ونداي اپاتتان ادامنىڭ امان قالۋى مۇمكىن ەمەس دەرسىز. سوندا كولىكتە وتىرىپ تاڭ نامازىن وقىپ، ساجدەگە يىلگەن ساناۋلى مينۋتتاردا ءامينا انانى جولدىڭ قارسى بەتتىندەگى اۋىر جۇك كولىگىنە تيەلگەن تەمىرلەردىڭ وپىرىپ كەتكەن كولىك توبەسىنىڭ اراسىن ساناۋلى سانتيمەترلەر عانا ءبولىپ تۇرعان. ءتىپتى ءامينا اپا: «كوزىمدى اشقاندا جان-جاعىم جاپىرىلىپ جاتىر، نە بولعانىن بىلمەيمىن، جانىمداعىلاردىڭ ميىنا دەيىن شاشىلىپ كەتكەنىن كورگەندە ساندىراقتاپ كەتە جازدادىم»، - دەگەنى بار. سول اپاتتا كولىك جۇرگىزۋشى مەن تاعى ءبىر جولاۋشى بالا جان تاپسىرعان ەدى. ءيا، ءامينا اپا جەتىمدەردىڭ قامىمەن نە كورمەدى...
ءامينا اپا وسى كولىك اپاتىنان امان قالدى
ەس-تۇسسىز اۋرۋحاناعا ءتۇسۋ
ال بۇل جولى ءامينا اپا و دۇنيەدەن قايتا ورالعانداي... بىلتىر (2015 جىل) 23 شىلدەدە الماتى قالاسىندا سەل بولعان كەزدە بەلگىسىز بىرەۋ ءامينا اپاعا تەلەفون شالادى. «اپا، تەزدەتىپ جينالىپ، قاشىڭىز. الماتىنى سۋ الىپ جاتىر. تاۋدان اققان اعىن ءسىزدىڭ دە ۇيگە جاقىندادى»،- دەگەن داۋىستى ەستىگەندە ەسىم شىعىپ، تەلەفوندى تاستاي سالىپ ءتۇن ورتاسىندا بالالاردىڭ بارلىعىن تۇرعىزىپ، تەك قانا قۇجاتتارىن الىپ، ءوزىم ولاردى اۆتوبۋسقا مىنگىزىپ، ەكى قىزىمدى ەكى كولىكتىڭ تىزگىنىنە وتىرعىزىپ، كەرەك-اۋ دەگەن زاتتاردى عانا الىپ جولعا شىقساق، كوشەنىڭ بارلىعى كولىك كەپتەلىسى. «نە دە بولسا، «باراحولكا» جاقتاعى اسحانامىزعا قاشايىق. ول جەردى سۋ الا قويماس، بالالار دا توق بولار» دەپ سول جاققا بەت الدىم. حالقىمىزداعى «ايەلدىڭ شاشى ۇزىن، اقىلى قىسقا» دەگەن ماقالى بەكەر ەمەس ەكەن. سوندا سۋ الدى دەسە، تۇرا شاپپاي جان-جاقا، جانىمداعى سۋ كارەرىنە بارىپ قاراسامشى..."، - دەپ اپامىز ءسال ويعا شومىپ كەتتى. وسى كەزدە 6 جاستاعى مۇحامەد-حاسان ەركەلەي باسىپ، اناسىنىڭ موينىنا اسىلدى. «انااا» دەپ ءوزى ەرەكشە ەركەلەيدى. مەنىڭ ويىما 2010 جىلى ءدال رامازان ايىندا ءامينا اپانىڭ ۇيىنە كەلگەندە وسى ءبۇلدىرشىننىڭ ەسىك الدىندا قۇنداقتاۋلى كۇيدە تابىلعان كورىنىسى كوز الدىما كەلگەنى. ءامينا اپانىڭ ەمىرەنە ءسۇيىپ، قۇشاعىنا قىسقان سول شاقالاق مىنە بۇگىن مەكتەپكە باراتىن جاسقا جەتىپ، اناسىنىڭ جانىنان ءبىر ەلى شىققىسى كەلمەيدى... مۇحامەد-حاساندى ءبىر يىسكەپ العان ءامينا اپا اڭگىمەسىن ارى قاراي جالعاستىردى.
- سودان ءبىز كولىك كەپتەلىسىنەن اسحانامىزعا ارەڭ جەتسەك، وزىمىزدە بالالارعا ساباق بەرەتىن ءمۇعالىمىم تەلەفون شالىپ: «اپاا، ءسىزدى الداپتى. ءۇي جاق سۋ تاسقىنىنان تىنىش، ەشقانداي سەل جوق»، - دەگەن سوڭ ۇبىرىپ-شۇبىرىپ ۇيىمىزگە قايتا ورالدىق. سويتسەك، 3 قاباتتى بالالار ءۇيىنىڭ ەسىك-تەرەزەسى اشىق-شاشىق، كىتاپتارعا دەيىن بارلىعى اۋدارىلعان، بىت-شىت شاشىلىپ جاتىر. ويران-توپان، اقتارىلماعان جەر جوق. ءبىر قورا ادام بولعان مىندا، جالعىز ادامنىڭ ولاي جاساۋى مۇمكىن ەمەس. كىم نە ىزدەگەنىن بىلمەيمىن؟ ءالى كۇنگە تۇسىنبەيمىن... -، دەپ تاعى دا ءۇنسىز ويعا كەتكەن انامىز اڭگىمەسىن جالعاستىرىپ: - ءبىراق ول كورىنىس كوڭىلىمە قاتتى ءتيدى. البەتتە قانقىزۋىمەن ءينسۋلتتى (ميعا قان كەتۋ) دە ەلەمەپپىن، - دەدى. قايتا كەلىپ، ەرتەسىنە باقاناسقا ءشوپ شابۋعا كەتتىك. سول باقاناستان قايتىپ كەلە جاتىپ قاپشاعايدان قايتار جولدا «ءامينا» دەگەن كافە بار، سوعان ءال جيناپ الايىق دەپ كىرىپ تاماقتاندىق. سوندا ءبىر شال كىسى: «پاي-پاي، مىناۋ مەن 20 جىل بۇرىن كورگەن ءامينا، قانشا بالا باقسا دا ءالى يىلمەپتى عوي، سول كۇيى عوي»،-دەگەنى، ىشىمنەن «ءتىلىڭ تاسقا» دەدىم دە كولىككە ءمىنىپ كەتە باردىق. سودان ءبىر شاقىرىمعا جەتپەي جەلكەم، موينىم ارتىما تارتىلىپ بارا جاتتى... دەرەۋ كولىك تىزگىنىندەگى بالاما: «نۇرجان قۇران وقى، نۇرجان وقى، ءتۇس ماشينادان»،- دەدىم. بالام كولىكتى توقتاتىپ ءتۇستى دە باسىمدى ۇستاپ بىلەتىن سۇرەلەرىن وقي بەردى، وقي بەردى. سودان ۇيگە ارەڭ جەتتىك، قاتىپ ۇيىقتاپپىن. ەشنارسە سەزبەيمىن. ءبىر كەزدە كاماز كولىكتەرىمەن شوپتەرىمىز كەلدى، سولاردى جايعاستىرامىن دەپ جۇرگەندە وڭ جاعىم، كوز، اياق، قول بارلىعى ءتىل، بەت ءبارى جانسىزدانىپ كەتە باردى. بالالار بولمەمە ارەڭ جەتكىزدى. دەرەۋ جەدەل جاردەم شاقىرىپ، №4 اۋرۋحاناعا الىپ كەتتى. اۋرۋحانادا مەن 13 مينۋت ەس-تۇسىمنەن ايرىلىپپىن.
ءامينا انانىڭ الدىندا «پەرزەنت» ءۇيىنىڭ بوساعاسىندا ءبىر كۇندىك كەزىندە تابىلعان 6 جاسار مۇحامەد-حاسان
ءامينا اپانىڭ كورگەنى اللا ەلشىسى (ﷺ) مە؟
ءوزىم ەشنارسە بىلمەيمىن، ءبىر بولەك الەمدە جۇرگەندەيمىن. ءبىر اتانى كورىپپىن. بەت-الپەتىن كورمەدىم، تەك كەۋدەسىنە تۇسكەن قاپ-قارا ساقالىنىڭ ۇشىن عانا بايقادىم. سول اتانىڭ قولىنان ۇستاپ الىپپىن، جۇزىگى بار ەكەن قارا تاسى بار، قانداي تاس ەكەنىن اڭعارمادىم. ءبىراق قولىنا جارماسقان كۇيى «اعا، مەن قالايىنشى، وسى جەر جاقسى ەكەن. وسى جەردە قالايىنشى»، - دەپ ەڭىرەپ جاتىرمىن. سوندا ءبىر ۇلكەن قاقپانى كورسەتىپ جاتىر، ول جەردەن جەتكەن ءيىستى مەن قاسيەتتى مەككەگە ءتورت رەت بارعاندا دا يىسكەمەگەنمىن. كەرەمەت جۇپار ءيىس، ونى تىلمەن جەتكىزە المايمىن. ءوزىم بولسام، ەبىل-دەبىل جىلاپ جاتىرمىن، جىلاپ جاتىرمىن: "مەن بۇل ومىردە جاقسىلىق كورمەدىم، جەتىمدىكتىڭ اششى ءدامىن تاتتىم، جىلدار بويى جەتىم بالالارمەن جۇرسەم دە جاقسىلىق تاپپادىم، وسى جەردە قالايىنشى، مىنا جەر تاماشا ەكەن، قالايىنشى" دەپ جىلاپ جاتىرمىن" دەگەن ساتتە 6 جاسار مۇحامەد-حاسان: «اناشىم، ماعان شۇجىق قۋىرىپ بەرشىىى»،- دەپ قولىندا بولشەكتى شۇجىعى بار كەلە جاتتى. ونىڭ قارنى اشىپ تۇرعانى ەمەس، ءجاي سىلتاۋمەن ءامينا اپانىڭ جانىننان ءبىر ەلى ايرىلماۋ ەكەنى دە بايقالىپ تۇر. اڭگىمەسىن ارى قاراي جالعاستىرىپ: «قالايىنشى، شارشادىم، بالالارىم ءوستى، 20 جىلدان بەرى شارشادىم. ومىردەن شارشادىم" دەگەنىم سول:
- جوق، سەنىڭ قايتۋىڭ كەرەك. سەنىڭ مەشىتىڭ سالىنعان جوق. مەشىتىڭدى 4 كۇمبەزدى ەت، استىن جاۋىپ تاستا. مىنالار كىرىپ كەتەدى دەپ ءبىر توپ ادامداردى نۇسقادى. ءقازىر الگى «ۋاحابيست» دەپ ءجۇرمىز عوي، ساقالدارى قالاي بولسا، سولاي، بالاقتارى قىسقا. ءبىراق مىنالاردىڭ باستارىندا وراسان كۇمبەزدەي سالدەلەرى بار. ىلعي قازاقتىڭ جاس جىگىتتەرى ەكەن. مەن بولسام «وسىنداي دا سالدە بولا ما ءوزى، مىنالارعا نە كورىنگەن، كىمدەر ءوزى؟» دەپ قويامىن... ءبىر كەزدە وسى بالالار ءۇيىنىڭ جانىنداعى مەشىت سالامىز دەپ جۇرگەن جەردە تۇرمىز. سونى نۇسقاپ اتا: «استىن جاپ مىنانىڭ» دەپ ءبىز 300-400 ادامعا ارناپ قويعان جوبامىزدىڭ جەرتولەسىن نۇسقادى. «ايتپەسە مىنالار كىرىپ كەتەدى»،- دەپ الگى ءبىر توپتى كورسەتتى. مەن سوندا دا جىلاپ ءجۇرمىن.
وسى جەتىمدەر ءۇيىن سالعاندا كوپ قيانات جاساعان شەندى داۋلەتتى ادام بولعان، سول ءقايبىر جىلى قايتىس بولىپ، مەن جانازاسىنا بارماي قويعانمىن. مەنى جەتەلەپ جۇرگەن اتام «كەشىرىمدى بول» دەپ كۇيىپ جاتقان بىرەۋدى كورسەتتى. مەن دە «كەشىردىم، اللا كەشىرىمدى، مەن نەگە كەشىرمەيمىن» دەگەنىم سول، الگى كۇيىپ جاتقان كىسى ورنىنان تۇرىپ، «راحمەت» دەگەندەي باسىن ءيدى دە ءبىر ەسىككە كىرىپ عايىپ بولدى. سودان «انا، ماما» دەپ جىلاعان بالالارىمدى كورسەتتى...
اۋرۋحانادا «مەشىت» دەپ ايقايلاپ كوزىمدى اشىپپىن. سويتسە، رەانيماتور ورىس كەلىنشەك: «ۋح تى، مۋجا زوۆەت»، - دەسە، جانىنداعى قازاق كەلىنشەك: «كاكوي مۋج، ونا ەگو داۆنو ۆىگنالا، ونا گوۆوريت و توم، ۆوت ۋ ۆاس ەست جە كرەست كوتورىي سەركوۆ، ۋ ناس پولۋمەسياس، مەچەت مۋسۋلمانسكيي، ونا گوۆوريت پرو ەتو»، - دەپتى. ول قازاق كەلىنشەك مەن جايلى بارلىعىن بىلەدى ەكەن. سوندا «مەشىت» دەپ ايقايلاعاندا سالدانىپ قالعان اۋزىمنىڭ قالاي سويلەگەنىن دە بىلمەيمىن، - دەيدى اپامىز.
- كوزىمدى اشقانىم سول قىزدارىم «بۇل جەردە دۇرىس قارامايدى» دەپ دەرەۋ جەدەل جاردەمگە سالىپ سوۆمين اۋرۋحاناسىنا (ق ر پرەزيدەنتى ءىس باسقارماسىنىڭ مەديسينالىق ورتالىعى) الىپ كەتتى. ەمدەلىپ جاتقان ءبىر كۇنى اۋرۋحانا تەرەزەسىنىڭ سىرتىنان بالالارىم «ماما، ماما» دەپ ايقايلاعاندا جان-جاعىمداعى اسپالى ۋكولداردى الىپ تاستاپ سىرتقا شىعىپ كەتىپپىن. دارىگەرلەر «مىنا كىسى جىندى بولىپ قالدى ما؟» دەپ شوشىپتى. ويتكەنى ميىمنىڭ ەكى جەرىنەن جارىلعان ەكەن. اۋرۋحانادا 13 كۇن جاتىپ شىققان سوڭ، ءسال ءال جيناپ الماتىداعى ورتالىق مەشىتكە، ءمۇفتياتقا باردىم. اۋىرماي تۇرعان كەزىمدە باس ءمۇفتي ەرجان قاجىمەن جولىعۋدىڭ ءساتى ءتۇسىپ، ءمۇفتي جاقسى لەبىزىن بىلدىرگەن ەدى. ەندى مەشىت سالۋ ءۇشىن باس مۇفتيمەن سويلسەيىن دەپ بارسام، ول كىسى جوق ەكەن. سول جەردەگى بالالار «اپا، جاعدايىڭىز قالاي؟ ارىقتاپ كەتىپسىز، وزگەرىپ كەتىپسىز؟،-دەگەنى، مەن دە «وسىلاي وسىلاي، اۋرۋحاناعا ءتۇسىپ قالدىم» دەپ ەس-تۇسسىز جاتقاندا كورگەنىمدى ايتقانىم سول، ولار باس سالىپ مەنى قۇشاقتاپ «قاجى اپا، قاجى اپا! پايعامبارىمىزدى (ﷺ) مىڭ-ميلليونداعان ادامنان بىرەۋ كورسە كوردى، كورمەسە ول دا جوق، ءسىز كورىپسىز. ءسىز كورگەن كىسىڭىزگە نە دەدىڭىز؟» - دەيدى جابىلىپ ءبارى.
- وي قولىنان ۇستاپ الىپ "ولەم، ولەم" دەپ ايتا بەرىپپىن. ول بولسا: «ولمەيسىڭ، مەشىتىڭدى سال، بالالارىڭا ءۇي سال»،- دەدى. سودان ورتالىق مەشىتتەگى قىزمەتكەرلەردىڭ بارلىعى جىلاپ: «ءسىز پايعامبارىمىزدى (ﷺ) كورىپسىز، ەندى مەشىتتى سالماساڭىز بولمايدى»،- دەيدى. ءبىراق، ايشاجان، اللا كۋا، ول اتانىڭ ءجۇزىن كورمەدىم. تەك قولىن ۇستاپ جىلاي بەرىپپىن. سونىمەن، سول مەشىتتى باستاپ سالايىق دەپ ءمۇفتياتقا كوكتەمدە قۇجاتتاردى وتكىزدىك. ءقازىر قۇجاتتاردى قايتا جاساپ، مەشىت سالۋدى باستاماقشىمىز. بۇگىن عانا تەمىرلەردى كەسىپ، اۋلاعا اكەلىپ تاستادىم، - دەگەن ءامينا اپاعا كومادا جاتىپ كورگەنى جايلى ايتا ءتۇسسىن دەپ:
- سوندا ونداي ءيىستى بۇرىن-سوڭدى يىسكەمەدىم دەدىڭىز بە؟
- مەن ونداي جۇپار ءيىستى ەشۋاقىتتا سەزبەگەنمىن. ورتالىق مەشىتتەگى بالالار دا «اپا، ءبىر قاپقا سالىپ اكەلسەڭىز بولمايدى ما ەكەن؟» - دەيدى عوي ءبارى ازىلدەپ. سودان، سول ءيىس كەلەتىن ۇلكەەەن قاقپا، جان-جاعىنا نۇر شاشىلىپ تۇر. ساپ-سارى التىنمەن قاپتالعانداي ما؟ اتانىڭ قولىنا جارماسىپ: «مەن قالايىنشى، انا ەسىككە كىرگىم كەلەدى» دەپپىن. ول كىسى: «كىرەسىڭ، سەنىڭ ءالى كوپ جۇمىسىڭ بار» - دەدى، الگى ەسىككە كىرگىم كەلىپ بارادى. تاعى ءبىر كۇيگەن سەكىلدى ەسىك تە كورىندى... ەندى سول مەشىتتىڭ جۇمىسىمەن ءجۇرمىن. «مىڭ ادامدىق ەتىپ جاسا، مۇنارالارى بيىك، جەرتولەسىز بولسىن» دەگەن. كوپ جوبالار قارادىم، دارەتحاناسىن سىرتقا، وعان كەڭ دالىزبەن باراتىنداي ەتىپ سالامىن. ەندى دۇيسەنبىدەن باستاپ ۇلكەن تاستار تاسىپ، سول قازىرگى بار جەرتولەسىن تولتىرىپ جاۋىپ تاستاماقشىمىن. ءمايىت جۋاتىن جەرىن دە سالۋ كەرەكپىن. اسحاناسى دا كەڭ بولۋ كەرەك.
- سىزگە كەمى 100 جىلدان اسا ءومىر ءسۇرۋ كەرەك قوي، - دەپ مەن دە ازىلمەن تىلەگىمدى ءبىلدىرىپ، ءامينا اپانى قۇشاقتاي بەرىپپىن، قۇشاقتاي بەرىپپىن.
ءيا، قاراپ تۇرساڭىز ومىردە بايقامايتىن كەرەمەتتەر وتە كوپ. ال ءامينا اپانىڭ ءار كۇنى حيكمەتكە تولى. مەن وسى زياراتىمدا «پەرزەنت» ۇيىنە كىرگەن كەزدە كەشكى داستارحاندا وتىرعان بالالاردىڭ جاۋدىرەگەن جانارلارى ءالى كوز الدىمنان كەتەر ەمەس. ءامينا اپانىڭ ءوزى قازاننان ءارقايسىسىنا جەكەلەپ تاماقتى ۇلەستىرىپ جاتىر. التىن قولىمەن ماعان دا قۇيىپ بەردى. قولدان تۇيىلگەن ءتۇشپارا، مەن مۇنداي ءتىل ۇيىرگەن ءتۇشپارانى الماتىنىڭ ءبىر دە ءبىر ءدامحانا، مەيرامحانا، اسحاناسىنان ىشپەپپىن. وسى جەتىمدەردىڭ نەسىبەسىنە ءامينا اپاعا اللانىڭ بەرەكە بەرىپ قويعان تاڭداۋلى ق ۇلى ەكەندىگىنە كۇمان دە كەلتىرمەسسىڭ. تاماقتان سوڭ بالالار اللاعا شۇكىرشىلىكتەرىن ايتىپ، دۇعا جاسادى. كۇندەلىكتى قالىپتاسقان جاعداي. وسى كەزدە بارلىعى بولا تۇرا شۇكىرى جوق قانشا پەندەلەر ءجۇر دەگەن وي دا كوكەيدە قىلاڭ بەرەدى ەكەن. ءبىر كەزدە وسى كەشكى اس الدىندا عانا «باراحولكادان» الىپ كەلگەن اياق كيىمدەردى رەتتەپ، بالالارعا شۇلىقپەن بىرگە تاراتىپ بەردى.
ءامينا اپا بالالارىنا تاعامدى ءوزى قۇيىپ بەرۋدە
حيكمەت پەن يماندىلىققا، بىر-بىرىنە جات بولسا دا ءبىر ءۇيدىڭ بالاسىنداي بولىپ كەتكەن بالالاردىڭ ءبىر شاڭىراق استىندا ءاميناداي انانىڭ قامقورلىعىمەن تاربيەلەنۋىنە قاراپ، مەن دە جەر بەتىندەگى جۇماقتا وتىرعانداي اسەردە بولدىم. ءبىر كەزدە: «ايشا، مىنا جاقتا «ساۋمالحانا» اشتىم»، - دەپ، ءامينا اپا مەنى تەرەزەنىڭ جانىنا شاقىردى. تۇنگى تىنىشتىقتا «پەرزەنت» جەتىمدەر ءۇيىنىڭ جانىندا جاڭادان اشىلعان ساۋمالحانانىڭ ءوزى نۇر شاشىپ تۇرعانداي. ول جاعىن الداعى ۋاقىتتا جازامىز.
بالالارعا ءتاتتى كامپيت ۇلەستىرۋ ءساتى. بارلىعى تارتىپپەن 1 دانادان عانا الىپ جاتىر.
جاۋاپسىز قالعان سۇراقتار
ال وسى سان ءتۇرلى اسەرگە تولى ساناۋلى ساعاتتاردان كەيىن كوكەيىمە مىنا ويلار قۇيىلدى: ءامينا اپامىزدىڭ ەس-تۇسسىز اۋىر حالدە جاتقاندا كورگەنى كىم بولدى ەكەن؟ الماتى ورتالىق مەشىتىندەگىلەر ونىڭ پايعامبارىمىز (ﷺ) ەكەندىگىنە ءشۇبا كەلتىرمەگەن. مەنىڭ دە ەش كۇمانىم جوق. سەبەبى، ارامىزدا وسىنداي اللانىڭ تاڭداۋلى قۇلدارى بولماسا، بۇل ءومىر نە بولىپ كەتەتىنىن ەلەستەتۋدىڭ ءوزى قيىن. ءبىر عانا مىسال، الماتىدا تاۋدان سەل قۇيىلعان ساتتە ءامينا اپاعا تەلەفون شالىپ، الداعان كىم؟ ەسىگى قۇلىپتالعان «پەرزەنت» بالالار ءۇيىن اقتارىپ كەتكەن كىمدەر؟ بۇل سۇراقتار جاۋابى جۇمباق كۇيىندە قالدى. مۇسىلمان ءۇشىن بارلىق نارسە حايىرلى دەمەكشى، ونىڭ ناتيجەسى ءامينا اپانىڭ قاتتى كۇيزەلىستەن ەس-تۇسسىز حالدە پايعامبارىمىزدى (ﷺ) كورۋىنە سەبەپ بولدى ما ەكەن؟
ءامينا اپا 300-400 ادامعا دەپ جوسپارلاعان مەشىتىن 1000 ادامدىق ەتىپ قايتا قولعا الىپتى. بۇل جەتىم بالالار ءۇيى بولعاندىقتان قاشاندا قامقورلىق ارتىق ەتپەيدى. سوندىقتان مەشىت قۇرىلىسىنا كومەك كورسەتۋ نيەتى بارلار ءۇشىن ءار كەز بۇل ەسەلەگەن ساۋاپ كوزى بولارى ءسوزسىز. ءامينا اپانىڭ تەلەفونى: 8701 345 67 4
ايشا كەڭەسباي،
يسلامتانۋشى-جۋرناليست
