وڭتۇستىك قازاقستان وبلىسىندا ماقتا تەرىمى باستالدى. قازىرگى تاڭدا ماقتارال اۋدانى مەن تۇركىستاندىق ديقاندار ءونىم جيناۋعا كىرىستى. جەردى وڭدەۋدىڭ جاڭا ءارى ءتيىمدى ءتاسىلىن قولدانۋدىڭ ارقاسىندا وڭىردەگى 109 مىڭ گەكتاردان استام جەرگە سەبىلگەن شيت بىتىك شىققان.

ءبىرىنشى تەرىم قولمەن جينالادى. «ول ءونىمنىڭ ساپالى ءارى ىسىراپسىز جينالۋىنا مۇمكىندىك بەرەدى»، - دەيدى ديقاندار.

حايرۋللا رۋستاموۆتىڭ جەكە قوجالىعىندا التى گەكتار جەرى بار. ونىڭ باسىم بولىگىنە كوكونىس پەن باقشا ونىمدەرىن ەگىپتى. ودان مول ءونىم العان. ەندى ماقتاسىن تەرۋگە كىرىستى. ساۋىردە سەبىلگەن ءشيتتىڭ كوسەگى تولىق اشىلىپتى. جەردى وڭدەۋدىڭ ءتيىمدى ءتاسىلىن قولدانىپ، اگروتەحنيكالىق تالاپتاردى قاتاڭ ساقتاعان ديقان گەكتارىنان 35 سەنتنەرگە دەيىن ءونىم الىپ جاتىر.

حايرۋللا رۋستاموۆ، شارۋا:

- باعاسى ەستۋىمىزشە، كەلىسى 150 تەڭگە اينالاسىندا بولادى. بۇل شىعىننىڭ ءبارىن وتەيدى. قالتاعا دا جاقسى قالادى. كوسەگى دە جاقسى، 9-11-گە دەيىن سالعان. بۇرىن 6-7-دەن اسپاۋشى ەدى. ءشيتى ءىرى سالماقتى. تەرىمشىلەر دە قۋانىپ تەرىپ جاتىر.

شارۋا جيىن-تەرىمدى بيىل جىلداعىدان بىرنەشە كۇن ەرتە باستاپتى. ويتكەنى ماقتاسى ەرتە اشىلعان. اق التىنعا جاۋىن تيسە سارعايىپ، سورتى تومەندەپ كەتەدى. سوندىقتان ونى سۋىققا ۇرىندىرماي جيناپ الۋ قاجەت. ءبىرىنشى تەرىمگە اۋىل ادامدارىنىڭ كۇشىن جۇمىلدىرىپ جاتىر. ءار كەلىسىنە 15 تەڭگەدەن اقى تولەيدى. ماۋسىم كەزىندە وسىلايشا جۇرتقا قوسىمشا جۇمىس تاۋىپ بەرەدى.

ديلميرا رازيقوۆا، يحان اۋىلىنىڭ تۇرعىنى:

- تاڭەرتەڭ وسى جەرگە ەرتەلەپ كەلەمىز. بيىل ماقتا جاقسى. كۇنىنە 100 كەلىگە دەيىن تەرىپ جاتىرمىز. كىشكەنە جۇرسەڭ بولدى، قاپ جاقسى تولادى. كەلىسىن 15 تەڭگەدەن تەرەمىز. وسى جەردەن ناپاقا تاۋىپ، بالا-شاعامىزعا كيىم-كەشەك الامىز.

تەرىم جۇمىستارى ماقتارال اۋدانىندا دا باستالدى. اق التىننىڭ باسىم بولىگى ەگىلگەن ءمىرزاشول وڭىرىندە بيىل ونىمدىلىك ءبىرشاما تومەن بولاتىن ءتۇرى بار. ويتكەنى شىلىڭگىر شىلدەنىڭ اپتاپتى ىستىعىندا ءبىرقاتار ماقتا القاپتارى قۋاڭشىلىققا ۇرىندى. سەبەبى قىرعىزستان مەن تاجىكستان جانە وزبەكستان ارقىلى اعىپ وتەتىن «دوستىق» كانالىنداعى سۋ دەڭگەيى تومەندەپ، ەگىستىك القاپقا دەيىن جەتپەي قالدى. سالدارىنان 28 مىڭ گەكتار جەردەگى ماقتا قانىپ سۋ ىشپەدى.

كەڭەسبەك الپىسبايەۆ، وبلىستىق اۋىل شارۋاشىلىعى باسقارماسىنىڭ ءبولىم باسشىسى:

- ءبىزدىڭ وبلىستاعى ەڭ نەگىزگى ەگىس ەگىلەتىن – ماقتارال اۋدانى. وزدەرىڭىزگە ءمالىم، شامالى سۋ تاپشىلىعى بولعان. ءبىراق بۇل ماسەلەدە وسى اۋداندا تەرەڭ قوپسىتۋ ءتاسىلىن ەندىرۋ ناتيجەسىندە جانە دە مينەرالدى تىڭايتقىشتاردى ۋاقتىلى قولدانۋدىڭ ارقاسىندا ءوز شەشىمىن تاپتى. دەگەنمەن دە بۇل ماسەلە بويىنشا ءبىراز پروبلەما بار.

وڭتۇستىك قازاقستان وبلىسى ەلىمىزدەگى اق ماقتانىڭ نەگىزگى وتانى سانالادى. وڭىردە بيىلعى جىلى 109600 گەكتار جەرگە ماقتا ءشيتى سەبىلگەن. ءونىم جامان ەمەس. شىعىم دا جاقسى. ءتىپتى كەيبىر جەرلەردەگى ماقتا ادام بويىنا جەتەدى. شارۋالار قارا كۇزگە دەيىن ونى توكپەي-شاشپاي جيناپ الۋعا تىرىسىپ جاتىر. باستىسى اۋا رايى بۇزىلىپ كەتپەسە بولعانى.

24.kz ارناسى