تۋىسقاندارىنىڭ ايتۋى بويىنشا

جۇرگەن ءجۇرىسى، كيگەن كيىمىنە قاراپ ونى كورگەن بازبىرەۋلەر ىشكىش نەمەسە قايىر-ساداقى سۇراعىش دەپ قاتە ويلاپ قالۋى مۇمكىن.  ءبىزدىڭ قوعام شۇبەرەككە قاراپ ادامعا باعا بەرەتىن بولعان. شىن مانىندە، ول قيسالاڭ جۇرسە دە ىشكىش ەمەس، جۇپىنى كيىنسە دە الاقان جايىپ جۇرگەن جوق. بالقاش مامىتبەك ۇلى كەڭەس ارمياسىنىڭ ءىى توپتاعى مۇگەدەگى. ولاردىڭ بەلگىلى ءبىر تاپسىرمامەن باسشىلىق تايگاگا جىبەرگەن. جىبەرگەن دە ولاردىڭ بارى جايلى 34 كۇنگە ۇمىتىپ كەتكەن. 1 ايدان استام ۋاقىت بويى ىشەر تاماقسىز، جاتىن ورىنسىز، جىلى كيىمسىز قالعان ول اياعىن ءۇسىتىپ الادى. ارميادان ءبىر اياقسىز، ەكىنشى اياعىنىڭ بارماقتارىنان ايىرىلىپ، قاتتى سترەسس الىپ كەلەدى. مۇگەدەككە اينالعان بالحاش ەشكىمگە كەرەك بولماي قالدى. ءومىر باقي جۇمىس ىستەمەدى. ءتورت قابىرعادان شىقپادى. ارماندارى قۇر ارمان بولىپ قالدى. كۇيزەلىستەن شىعا المادى. ونى الماتى قالالىق پسيحيكالىق ساۋىقتىرۋ ورتالىعى ەسەپكە الدى.

30 تامىز كونستيتۋسيا كۇنى بالقاش ءوز ۇيىنەن نان ساتىپ الۋ ءۇشىن دۇكەنگە شىعادى. ول نەگىزى ەشقايدا شىقپايتىندىقتان قالانى بىلمەيدى. الايدا ءوز ۇيىنەن دۇكەنگە اپارار جولدى بىلەتىن. 15 مينۋتتا ورالۋى كەرەك ەدى. ءبىراق ورالمادى. دۇكەن ساتۋشىسى جەتپىسبايەۆتى ميليسيا ءوز ماشيناسىنا وتىرعىزىپ، الىپ كەتىپ بارا جاتقانىن كوزبەن كورىپتى. ولار ونىڭ ءاتى-جونىن انىقتاماقشى بولعان. ءوز ويىن ناقتى جەتكىزە الماي، اسىپ-ساسىپ، دىرىلدەپ قورىققان بالحاشتى اۋەزوۆ اۋدانىنىڭ ۋچاسكەلىك ينسپەكتورى شايكەنوۆ زاڭسىز تۇردە ءبىر تاۋلىككە تەمىر تورعا قامايدى. كەلەسى كۇنى پسيحيكالىق ساۋىقتىرۋ ورتالىعىنا اپارىپ تاستايدى. جەتپىسبايەۆتىڭ پسيحيكالىق دەنساۋلىعىنا دارىگەرلەر «گوسپيتيليزاسيا كەرەك ەمەس» دەگەن قورىتىندى شىعارادى. كابلۋكوۆادان شىققان ول ۇيگە اپارار جول تابا الماي ءىزى-قايىم جوعالىپ كەتەدى. سودان بەرى حابار جوق...

پوليسيانىڭ ايتۋى بويىنشا

30 تامىزدىڭ 31 تامىز كۇنىنە قاراعان ءتۇنى الماتى ءىىد جەدەل باسقارۋ ورتالىعىنا الماتى قالاسىنىڭ تاۋگۇل ىقشام اۋدانىنىڭ ءجانتورين كوشەسىنىڭ بويىندا ورنالاسقان تۇرعىن ءۇيدىڭ ماڭىندا بەلگىسىز ءبىر ەر ازاماتتىڭ جۇرگەنى جايلى مالىمەت كەلىپ تۇسەدى. اتالعان مەكەنجايعا جول پاترۋلدىك پوليسياسىنىڭ «بۋران» ەكيپاجى كەلىپ، بەلگىسىز ادامنىڭ جەكە باسىن انىقتاۋ ماقساتىندا اۋەزوۆ اۋداندىق ءىىب قاراستى پوليسيا باسقارماسىنا جەتپىسبايەۆتى وزدەرىمەن بىرگەن الىپ كەتەدى. سول ءتۇنى كەزەكشىلىكتە بولعان ۋچاسكەلىك ينسپەكتور تەكسەرۋ بارىسىندا ازاماتتىڭ قالتاسىندا ەشبىر قۇجاتتىڭ جوقتىعىن، تىلىندە مۇكىس بار ەكەندىگىن انىقتايدى. ءوزىنىڭ كىم جانە قايدان ەكەنىن ايتىپ بەرە الماعان بالحاشتى بەلگىلەنگەن ەرەجە بويىنشا 103 تەلەفونىنا حابارلاسىپ، №9  بريگادانى شاقىرتادى. ولار ونى پسيحيكالىق ساۋىقتىرۋ ورتالىعىنا الىپ كەتەدى. قىركۇيەكتىڭ 10 كۇنى جەتپىسبايەۆتىڭ تۋعان اعاسى نۇربەك مامىتبەك ۇلى بوستاندىق اۋدانىنىڭ ءىىب-نا تۋعان ءىنىسىنىڭ ءىز-تۇزسىز جوعالۋىنا بايلانىستى ارىز تۇسىرەدى. قازىرگى كەزدە جوعالعان ادامدى ىزدەۋگە اۋداندىق ءىىب قىزمەتكەرلەرى عانا ەمەس، قالالىق كريمينالدىق پوليسيا باسقارماسى قىزمەتكەرلەرى جۇمىلدىرىلدى. ارنايى ىزدەۋ توبى قۇرىلدى. ىزدەۋ ءىسى قوزعالدى. بارلىق پوليسيا بولىمشەلەرىنە، ادام كوپ جۇرەتىن قوعامدىق جەرلەرگە بالحاشتىڭ باعىتتاماسى (وريەنتيروۆكاسى) بەرىلگەن. ىزدەستىرۋ ءىسى اياسىندا دجەتپيسبايەۆ بالحاشتىڭ ەسەپتە تۇرعانى، دياگنوزى جايلى اقپاراتتى قالالىق پسيحيكالىق  ساۋىقتىرۋ ورتالىعى ءىىب-نا بەرۋى مۇمكىن. ءبىراق ءدال ءقازىر ءىىب پرەسس-سلۋجباسى ونداي اقپارات سۇراي المايدى.

قالالىق پسيحيكالىق ساۋىقتىرۋ ورتالىعىنىڭ ايتۋى بويىنشا

پاسيەنتكە بايلانىستى قانداي ءبىر دەرەك زاڭمەن قورعالعان جابىق اقپارات بولىپ سانالادى. ونى تەك رەسمي سۇراۋ بويىنشا ءىىب-نا، پاسيەنتتىڭ قورعاۋشىسىنا عانا بەرە الامىز. ال، جۋرناليستەر بۇل كاتەگورياعا جاتپايدى. سول سەبەپتى مالىمەت الا المايدى.

مەنىڭشە

ول – تاعدىر تالكەگىنە تۇسكەن ادام.

ول – توماعا-تۇيىق، وز-وزىنە سەنىمسىز جان.

ول – وتباسىن قۇرا الماعان ءسۇربويداق.

ول – جۇمىسقا جارامسىز.

ول – ۇلى ءجۇزدىڭ شاپىراشتىسى.

ول – ءدال ءقازىر كومەككە مۇقتاج قازاق.     

جازيرا بايدالى