سايرام اۋدانى – مال بورداقىلاۋدان وڭتۇستىك قازاقستان وبلىسى بويىنشا الدىڭعى قاتارداعى اۋدانداردىڭ ءبىرى. بۇگىنگى تاڭدا، ونداعى ءىرى قارا مال باسى 176 مىڭنان اسىپ جىعىلسا، ونىڭ 32 مىڭنان استامى بورداقىلانادى. وسىلايشا، ءىرى قارانى ەتتى باعىتتا باعىپ وتىرعان سايرامدىقتار بۇگىنگە دەيىن 100 مىڭ تونناعا جۋىق مال ەتىن ءوندىرىپ، رەسپۋبليكانىڭ بارلىق قالالارى مەن كورشىلەس رەسەي مەن وزبەكستاننىڭ نارىعىنا ەكسپورتتادى.
اتالعان ءىستى كاسىپ كوزىنە اينالدىرىپ، پايداعا كەنەلىپ جۇرگەن شارۋانىڭ ءبىرى – زاكىرجان ابدۋللايەۆ. اقسۋكەنت اۋىلىنىڭ تۇرعىنى مال بورداقىلاۋدى كاسىپكە اينالدىرعانىنا 6 جىلدىڭ ءجۇزى بولدى. العاشىندا 5-6 ءىرى قارانى سەمىرتۋدى باستاعان ول بۇگىندە مال سانىن 100-گە جەتكىزدى.
3 اي بۇرىن «ماكسيمۋم» ايماقتىق-ينۆەستيسيالىق ورتالىعىنان جىلدىق 7 پايىزبەن 15 ملن. تەڭگە نەسيە الىپ، كاسىبىن جانداندىرعان جك «ابدۋللايەۆ» ەڭبەك ۇجىمىنىڭ اۋداندىق كاسىپكەرلەرگە قىزمەت كورسەتۋ ورتالىعىنا ايتار العىسى مول.
كاسىپكەرلەر پالاتاسى اۋداندىق فيليالىنىڭ كونسۋلتانت-مەنەدجەرى ق.اسىلبولاتوۆ «ماكسيمۋم» ورتالىعىنان از مولشەردەگى پايىزبەن نەسيە الۋىنا قۇجاتتارىن راسىمدەۋگە زاڭ اياسىندا قىزمەت كورسەتىپ، ءجون سىلتەگەن.
«نەگىزىنەن، ءتىس دارىگەرى مامانىمىن. ماماندىعىم بويىنشا 1 جىلداي جۇمىس ىستەدىم. بۇل كاسىپتى اعالارىمنان ۇيرەندىم. وتباسىمىزدىڭ بۇل كاسىپپەن اينالىسىپ جۇرگەنىنە 15 جىلدان استى. وسى سالادا جەتىستىككە جەتەتىنىمە كوزىم جەتىپ، جەكە اينالىسۋدى ءجون كوردىم»، - دەيدى 29 جاستاعى كاسىپكەر.
ونىڭ اقسۋكەنتتە جەكە مال سوياتىن ورنى بار. كۇنىنە 2-2،5 توننا ەتتى الماتىعا جونەلتەدى ەكەن. وسىلايشا، جانىنا جاقىن كاسىپتى تابىس كوزىنە اينالدىرعان شارۋا وزىنە عانا ەمەس، اينالاسىنداعى 8 ادامدى جۇمىسپەن قامتۋعا سەپتىگىن تيگىزىپ وتىر.
