ءتۇرلى جاڭا تەحنولوگيالار ارقىلى بۇگىندە باۋ-باقشانى جايقالتىپ وتىرعان ازاماتتار از ەمەس. سونىڭ ىشىندە قارجى ماسەلەسىنىڭ شەشىمىن قازاقستانداعى بۇۇ-نىڭ «دامۋ» باعدارلاماسى اياسىندا ارنايى گرانت ارقىلى شەشىپ، شارۋاسىن جولعا قويعان تۇركىستاندىق كاسىپكەر الداعى ۋاقىتتا كوپتەگەن جوبالاردى ىسكە اسىرماق نيەتتە. دەپ حابارلايدى،-تۇركىستان قالاسى اكىمىنىڭ باسپا ءسوز قىزمەتى 

تاراتىپ ايتساق، تۇركىستان قالاسىنا قاراستى ورانعاي اۋىلىنداعى «بيوگەن» قوعامدىق قورىنىڭ مەنشىگىندەگى جەردە «كليماتتىڭ قۇرعاقشىلىعى جاعدايلارىندا «جاسىل» سۋ ۇنەمدەۋ تەحنولوگيالارىن ىلگەرىلەتۋ ماقساتىندا ۇساق شارۋا قوجالىقتارى كووپەراسياسىنىڭ وڭ تاجىريبەسىن كورسەتۋ» جوباسى جۇزەگە اسىرىلۋدا. اتالعان اۋىلدا 0،78 گا جەرگە تامشىلاتىپ جانە جاڭبىرلاتا سۋارۋدى پايدالانا وتىرىپ، 20 پارنيكتەن تۇراتىن يننوۆاسيالىق جۇيە ەنگىزىلگەن. پارنيكتەردە بۇگىنگى تاڭدا قىزاناق پەن بۇرىش جايقالا ءونىم بەرىپ تۇر.

«جىلىنا ەكى رەت ءونىم الامىز. وسى جوبا اياسىندا گرانتتى جەڭىپ الىپ، جۇمىسىمىزدى جىلدامداتۋدامىز. ءقازىر العاشقى ءونىم بىتۋگە تايادى. ەندى كوپ ۇزاماي كەلەسى ماۋسىمعا دايىندىق جاسايمىز. اۋىل شارۋاشىلىعىنداعى باقشا ونىمدەرىن وسىرۋدە وسىنداي گرانتتار بولىپ تۇرسا، كاسىپكەر شارۋالار ءونىمدى مولىنان الادى دەپ ويلايمىن»،- دەيدى شارۋاسىن دوڭگەلەتىپ وتىرعان كاسىپكەر س.ماقاشيەۆ.  

پارنيكتەردە قىزاناق پەن بۇرىشتىڭ ءتۇرلى سورتتارى وسىرىلەدى. ولاردىڭ دەنى جولعا ءتوزىمدى تۇقىم تۇرلەرىنەن. باستىسى ەكولوگيالىق تازالىقتى ۇستاعان كاسىپكەر الداعى ۋاقىتتا وسىنداي تازا، ساپالى ونىمدەردىڭ ءدامىن ەلىمىزدىڭ وزگە ايماقتارىنا كوبىرەك تاتتىرسام دەگەن نيەتتە.