ىنتالى اۋىلىنىڭ تۇرعىنى ا.ۇسەنباي اۋلاسىنداعى 2 سوتتىق جەرگە قولدا بار جابدىقتارمەن جىلىجاي قۇراستىرىپ، بۇگىندە پايداسىن كورۋدە. بۇل تۋرالى ورداباسى اۋداندىق اكىمدىگىنىڭ باسپا ءسوز قىزمەتى حابارلادى.كاسىپكەردىڭ مالىمدەۋىنشە، ازىرگە جىلىتۋ قازاندىعى ورناتىلماعان، ايتسە دە ەرتە كوكتەمدە قىزاناق ەگىپ، 2 تونناعا جۋىق ءونىم العان. ەندىگى كەزەك قيار وتىرعىزىپ، باپتاۋ.
"4،5 گەكتار جەرىم بار. ونىڭ 1 گەكتارىنا قىزاناق، 1 گەكتارىنا باۋ، 1 گەكتارىنا جوڭىشقا، قالعان جەرگە جۇگەرى ەكتىم. قىزاناقتارعا سۇرانىس وتە جوعارى، 8-10 ادامدى جۇمىسپەن قامتىدىم"، - دەدى ا.ۇسەنباي.
قولدا باردى ۇساتىپ، زامان تالابىنا وراي كاسىپكە بەيىمدەلگەن ازامات مەملەكەت تاراپىنان نەسيە دە الماعانىن اتاپ ءوتتى. "بەينەتسىز زەينەت قايدان بولسىن. كەدەيلىككە اپاراتىن جول - ەرىنشەكتىك" دەپ ويىن تۇيىندەدى.
ايتا كەتەرى، اۋىل شارۋاشىلىعى سالاسىنىڭ جانە قازاقستاننىڭ جالپى ەكونوميكاسىنىڭ باسەكەگە قابىلەتتىلىگىن ارتتىرۋعا باعىتتالعان 2013–2020 جىلدارعا ارنالعان اگوروونەركاسىپتىك كەشەندى دامىتۋ بويىنشا «اگروبيزنەس-2020» باعدارلاماسى اياسىندا سوڭعى جىلدارى جىلىجاي شارۋاشىلىعى جاقسى دامىپ كەلەدى. رەسپۋبليكاداعى جىلىجايلاردىڭ باسىم بولىگى تابيعاتى جىلى وڭتۇستىك قازاقستان وبلىسىنىڭ اۋماعىندا ورنالاسقان. جىلىجاي اشىپ، كاسىبىمدى كوركەيتەم دەگەن شارۋالارعا مەملەكەت تاراپىنان كومەك تە بار. «اگروبيزنەس - 2020» باعدارلاماسىنا سايكەس، وزىق تەحنولوگيالار نەگىزىندە وندىرىستىك جىلىجاي قۇرىلىسىن جۇرگىزىپ، ىسكە قوسقان كاسىپكەرلەرگە ينۆەستيسيالىق سۋبسيديا تولەنەدى.
