تۇركىستان قالاسىندا اسىل تۇقىمدى ءىرى قارا مال سانىن كوبەيتىپ، ەت ەسپورتىن ەسەلەۋگە باعىتتالعان «سىباعا» مەملەكەتتىك باعدارلاماسى اياسىندا «قازاگرونەسيە كورپوراسياسى» اكسيونەرلىك قوعامى جانە «تۇركىستان نەسيە سەرىكتەستىگى»، «ياسسى نەسيە سەىكتەستىگى» جاۋاپكەرشىلىگى شەكتەۋلى سەرىكتەستىكتەرى مال شارۋاشىلىعى سالاسىنداعى كاسىپكەرلەرگە قارجىلاي قولداۋ كورسەتىپ كەلەدى. تۇركىستان قالالىق اكىمدىگى تاراتقان مال شارۋاشىلىعى بويىنشا مەملەكەتتىك باعدارلامالاردىڭ ورىندالۋى تۋرالى مالىمەتكە سۇيەنسەك، اتالعان قارجى ينستيتۋتتارىنىڭ نەسيەلەندىرۋلەرىمەن مۇندا جىل باسىنان بەرگى جەتى ايدا جالپى جيىنتىعى 279 ميلليون تەڭگەگە جيىرما ءۇش جوبا جۇزەگە اسىرىلعان. ناتيجەسىندە 1491 ءىرى قارا مالدىڭ انالىعى ساتىپ الىنىپتى. سونىمەن قاتار، 79 بۇقا تۇركىستان اۋماعىنا جەتكىزىلگەن.
اتا كەتەيىك، «قازاگرونەسيە كورپوراسياسى» اكسيونەرلىك قوعامى 8،5 ميلليون تەڭگەدەن جوعارى، «تۇركىستان نەسيە سەرىكتەستىگى» ءجشس-ى بير ميلليون تەڭگەدەن باستاپ جەتى جىلعا دەيىن 7 پايىزبەن اقشالاي نەسيە بەرەدى. قاراستىرىلعان قارجىلاي قارىزداردى كاسىپكەرلەر ەكى جىل جەڭىلدىكپەن پايدالانا الادى. نەسيە قارجىنى وتەۋدى كەلىسىم بويىنشا وتىز كۇن سايىن ەمەس، ءۇش ايدا، جارتى جىلدا، ءتىپتى ون ەكى ايدىڭ قورىتىندىسىندا ءبىر-اق رەت وتەۋگە بولادى. ەكى جىل جەڭىلدىكپەن بەرىلگەن جاعدايدا سىياقى اي سايىن تولەنەدى. ال نەگىزگى قارىزدى ءۇشىنشى جىلدان باستاپ وتەۋگە بولادى. شارۋالارعا وسىنداي كەڭ مۇكىندىك سىيلاعان «سىباعا» باعدارلاماسى حالىقتى جۇمىسپەن قامتۋدا، اسىل تۇقىمدى مال باسىن ارتتىرۋدا ناتيجەلى اسەرىن تيگىزىپ جاتقانى ءسوزسىز.
