تۇركىستان اۋماعىندا جىلقى شارۋاشىلىعىن دامىتۋ ارقىلى تومەن پايىزدى نەسيە بەرۋ بويىنشا ىسكەر ازاماتتاردى قارجىلاي قولداپ، ەلدىڭ الەۋمەتىن جاقسارتۋدى ماقسات تۇتقان «قۇلان» مەملەكەتتىك باعدارلاماسىن جۇزەگە اسىرۋدا «قازاگرونەسيە كورپوراسياسى» اكسيونەرلىك قوعامىمەن قاتار «تۇركىستان نەسيە سەرىكتەستىگى» جاۋاپكەرشىلىگى شەكتەۋلى سەرىكتەستىگى دە بەلسەندى ارەكەت ەتىپ كەلەدى. تۇركىستان قالالىق اكىمدىگىنىڭ مال شارۋاشىلىعى بويىنشا مەملەكەتتىك باعدارلامالاردىڭ ورىندالۋى تۋرالى مالىمەتتەرىنە سۇيەنسەك، اتالعان قارجى ينستيتۋتتارىنىڭ نەسيەلەندىرۋلەرىمەن مۇندا جىل باسىنان بەرگى جەتى ايدا جالپى جيىنتىعى 40 ميلليون 600 مىڭ تەڭگەگە ءتورت جوبا قارجىلاندىرىلعان. وعان 142 جىلقى ساتىپ الىنعان. ونىڭ سەگىزى – ايعىر.
جىلقى مالىن اسىلداندىرۋ بويىنشا جەڭىلدىكپەن نەسيە قارجى بەرۋ ارقىلى حالىقتى جۇمىسپەن قامتۋدى كوزدەيتىن «قۇلان» باعدارلاماسىنا قاتىسۋشىلارعا «كازاگرونەسيە كورپوراسياسى» مەن «تۇركىستان نەسيە سەرىكتەستىگى» جەتى جىلعا دەيىن 7 پايىزبەن نەسيە بەرەدى. كاسىپكەرلەرگە قارجىلاي قارىزعا قول جەتكىزگەننەن كەيىنگى العاشقى ەكى جىلىندا جەڭىلدىك قاراستىرىلادى. نەسيە قارجىنى وتەۋدى كەلىسىم بويىنشا وتىز كۇن سايىن ەمەس، ءۇش ايدا، جارتى جىلدا، ءتىپتى ون ەكى ايدىڭ قورىتىندىسىندا ءبىر-اق رەت وتەۋگە بولادى. ەكى جىل جەڭىلدىكپەن بەرىلگەن جاعدايدا سىياقى اي سايىن تولەنەدى. ال نەگىزگى قارىزدى ءۇشىنشى جىلدان باستاپ وتەۋگە بولادى.
«قۇلان» باعدارلاماسى بويىنشا ون بەس باس جىلقى انالىعىنا (بيەگە) ءبىر باس اسىل تۇقىمدى ايعىر ساتىپ الىنۋى ءتيىس. ساتىپ الىنعان اسىل تۇقىمدى جىلقىنىڭ ءاربىر باسىنا قىرىق مىڭ تەڭگەدەن سۋبسيديا بەرىلەدى.
