شىمكەنتتەگى «كورمە» ورتالىعىندا «تاماق ونەركاسىبى سالاسىنداعى جابدىق پەن تەحنولوگيالار» - AgroProm Shymkent 2016 كورمەسى ءوتىپ جاتىر.
كورمەنى ق ر اۋىل شارۋاشىلىعى مينيسترلىگى، «اتامەكەن» ۇلتتىق كاسىپكەرلەر پالاتاسى جانە «وڭتۇستىك» يندۋستريالدىق اۋماقتى باسقارۋ كومپانياسى» ج ش س قولداۋىمەن، وڭتۇستىك قازاقستان وبلىسىنىڭ اكىمدىگى ۇيىمداستىرىپ وتىر.
ماقسات – اگروونەركاسىپ كەشەنىنە ينۆەستيسيا تارتۋ، جاڭا تەحنولوگيالاردى جانە جابدىقتاردى تانىستىرۋ، شاعىن جانە ورتا بيزنەستى دامىتۋ.
«مۇنداي كورمەلەر تاماق سەكتورى ءىرى وندىرۋشىلەرىنىڭ اراسىنداعى بيزنەس بايلانىستى نىعايتۋعا، جالپى يندۋستريادا تاجىريبە الماسۋعا سەپ بولادى. ءقازىر ءبىزدىڭ وڭىردە تاماق ونەركاسىبىن دامىتۋعا ەرەكشە نازار اۋدارىلۋدا. ەتتى قايتا وڭدەيتىن 43، ءسۇتتى قايتا وڭدەيتىن 38، جەمىس-كوكونىس ونىمدەرىن قايتا وڭدەيتىن 35 كاسىپورىن جۇمىس ىستەيدى. ينۆەستورلار تارتىلىپ، وزگە دە جۇمىستار ءتيىستى دەڭگەيدە اتقارىلۋدا»، - دەيدى وقو كاسىپكەرلىك يندۋستريالدى-يننوۆاسيالىق دامۋ جانە تۋريزم باسقارماسىنىڭ باسشىسى مارات قارابايەۆ.
كورمەدە ازىق-تۇلىك، سۋسىن، جەمىس-جيدەك، ەت جانە شۇجىق ونىمدەرى ارقىلى تۇتىنۋشىلاردىڭ كوڭىلىنەن شىعىپ جۇرگەن 60-قا جۋىق كومپانيا قالا تۇرعىندارىنا ءوز تاۋارىن ۇسىندى. ولاردىڭ اراسىندا وڭتۇستىك قازاقستان وبلىسىنان بولەك، جامبىل، الماتى وڭىرلەرىنەن كەلگەن كومپانيالار دا بار.
ءبىرى ءارى بىرەگەيى – كورشى جامبىل وبلىسىنىڭ 80 جىلدىق تاريحى بار «مەركى سىر زاۋىتى».
«40 ءتۇرلى ءسۇت ءونىمىن شىعارىپ، 140 ادامدى جۇمىسپەن قامتىپ وتىرمىز. زاۋىت اشىلعان كۇننەن باستاپ تۇتىنۋشىلارىمىزعا تەك تابيعي ءونىم ۇسىنىپ كەلەمىز. قارجىلىق جاعدايعا قاراماستان جۇمىس تۇراقتىلىعىن ساقتاپ قالدىق. ال باعاسى حالىقتىڭ قالتاسىنا ءتيىمدى. وڭتۇستىك قازاقستان وبلىسى تۇرعىندارى دا ءبىزدىڭ ونىمدەرىمىزدىڭ تۇراقتى تۇتىنۋشىلارىنا اينالعانىن قالايمىز»، - دەيدى ديرەكتورى داستان ايتولەنوۆ.
قالا تۇرعىندارى مەن قوناقتارى وتاندىق ءونىم وندىرۋشىلەردىڭ تاۋارىن ارزان باعادا ساتىپ الۋلارىنا بولادى.
