شاردارالىق شارۋالار بيىل باۋ-باقشادان مول ءونىم الىپ وتىر. اۋدان بويىنشا وسى ماۋسىمدا 59 مىڭ گەكتار جەرگە اۋىل شارۋاشىلىعى ونىمدەرىن ەكتى، ونىڭ 11 مىڭ گەكتارعا جۋىعى باۋ-باقشا داقىلدارى.
اسىرەسە، كۇننىڭ كوزى جىلىنىسىمەن ەگىستىك القاپقا شىعىپ كەتكەن ديقاندار قاۋىمى قاۋىن-قاربىز سەكىلدى ەرتە پىسەتىن ونىمدەرىن پۇلداپ ۇلگەردى.
اۋداندىق اۋىل شارۋاشىلىعى جانە جەر قاتىناستارى ءبولىمىنىڭ مالىمەتىنە سۇيەنسەك، بۇگىنگە دەيىن شاردارالىق شارۋالاردىڭ 3338 گەكتار ەگىس القابىنان 83 450 توننا قاۋىن-قاربىز ساۋداعا شىعارىلعان. ونىڭ ىشىندە، ءوزىمىزدىڭ نارىقتان بولەك، 50 000 تونناسى رەسەي مەملەكەتىنە ەكسپورتتالعانىنىڭ ءوزى ۇلكەن كورسەتكىش. قالعانى ءوزىمىزدىڭ سولتۇستىك وبلىستارعا جونەلتىلىپتى. مۇنىڭ ءوزى ايماقتىڭ قارقىندى دامىپ، العا ۇلكەن ماقساتتار قويعانىن اڭعارتسا كەرەك. جالپى ءونىمنىڭ ەكسپورتتالۋى ونىڭ ساپاسىنىڭ جوعارىلىعىن، باسەكەگە قابىلەتتىگىن بىلدىرەتىنى اقيقات قوي. مۇنداي جەمىستى جوبالار الداعى ۋاقىتتا جالعاسىن تاپسا، ءوڭىردىڭ ەكونوميكالىق الەۋەتى ارتا تۇسەتىنى دە بار.
مامانداردىڭ ەسەبى بويىنشا گەكتارىنان ورتاشا 250 سەنتنەردەن ءونىم العان اۋدان ديقاندارىنىڭ كوڭىلدەرى توق دەپ ايتۋعا بولادى. باۋ-باقشا ونىمدەرىنىڭ باسىم بولىگى ەندى ءپىسىپ جاتقانىن ەسكەرسەك، بۇل كورسەتكىش كۇن سايىن ارتا تۇسپەك
