تاۋەلسىزدىك جىلدارىندا وڭتۇستىك قازاقستان وبلىسىنىڭ اۋىل شارۋاشىلىعى دا باسقا سالالارمەن قاتار قارقىندى دامۋ ۇستىندە.
وسى جىلدار ىشىندە سالا بۇرىنعى ۇجىمشار-كەڭشار جۇيەسى نەگىزىن قۇراعان ەجەلگى قاتىناستاردان اگرارلىق سەكتور تولىعىمەن جەكە مەنشىككە ءوتتى.
اگروونەركاسىپ كەشەنىن رەفورمالاۋ 1991 جىلى باستالعان بولاتىن جانە ول بۇرالاڭ جول تۇرىندە، ياعني 1992-1994 جىلدارى نارىقتىق قاتىناستارعا كوشۋدىڭ اۋىرتپالىق كەزەڭىن وتكىزدى. وسىنىڭ اسەرىنەن اۋىل شارۋاشىلىعى سالاسىنىڭ كورسەتكىشتەرى 1996 - 1997 اناعۇرلىم تومەندەدى. اتاپ ايتقاندا 1991 جىلمەن سالىستىرعاندا بارلىق ەگىس كولەمى 40 %، مال باسى 30-40 پايىزعا، قۇس باسى 78 پايىزعا كەمىپ، اۋىل شارۋاشىلىعى ونىمدەرىن ءوندىرۋ كولەمى ەداۋىر ازايدى.
1999 جىلدان باستاپ اۋىل ومىرىندە تۇبەگەيلى وزگەرىستەر جانە ونى قارجىلىق ساۋىقتىرۋ باستالدى. ءاربىر اۋىلدا جۇمىس جاساۋشىعا ونىڭ مۇلىكتىك پايى مەن شارتتى جەر ۇلەسىنە قۇقىق بەرەتىن كۋالىك بەرۋ ارقىلى ۇجىمدىق مەنشىك قالىپتاسىپ، جۇمىس جاساۋشى ادام شارۋاشىلىق جۇزگىزۋ ءتۇرىن دەربەس تاڭداۋ مۇمكىندىگىن الدى.
اۋىلدى رەفورمالاۋ باستالعالى بەرى اۋىل ازاماتتارىنىڭ كوز قاراسى وزگەرىپ، ولار نارىقتىق ەكونوميكانىڭ جاعدايلارىنا كوندىگە باستادى. ءوزىنىڭ اۋىل شارۋاشىلىق ءوندىرىسى ماسەلەلەرىن دەربەس شەشەتىن ناعىز جەر يەسى پايدا بولدى. وزدەرىنىڭ پايلارى مەن ۇلەستەرىن العان جاڭا مەنشىك يەلەرى دەربەس شارۋا قوجالىقتارىن قۇرىپ، ءوز قالاۋلارىمەن وندىرىستىك كووپەراتيۆتەرگە، اكسيونەرلىك قوعامدارعا جانە ءتۇرلى سەرىكتەستىكتەرگە بىرىكتى.
ناتەجيەسىندە، 1999 جىلدىڭ اياعىندا بۇرىنعى 182 ۇجىمشار-كەڭشار جانە مەملەكەتتىك شارۋاشىلىقتار بازاسىندا جەكە مەنشىككە نەگىزدەلگەن 20،0 مىڭنان استام اۋىل شارۋاشىلىعى قۇرىلىمدارى پايدا بولدى. بۇگىنگى كۇنگە ولاردىڭ سانى 70،0 مىڭنان استى. بۇل باسقا وڭىرلەرمەن سالىستىرعاندا ەڭ جوعارعى كورسەتكىش.
