روزا باقتىعالييەۆانىڭ جاسى 40-تا. 3 بالانىڭ باقىتتى اناسى.
ول قانشا ۋاقىت وتسە دە 1999 جىلدىڭ كۇزىن، سول ءبىر قارالى ءتۇننىڭ ەستەن كەتپەگەندىگىن ايتتى. روزا ول كەزدە ا.مۇحامەدي ۇلى باسقارعان پرەزيدەنت وركەسترىندە فلەيتادا وينايتىن.
روزا: ءمينيستردىڭ سول ۋاقىتتا وتباسى، بالا-شاعاسى بولاتىن. بالالارى كىشكەنتاي ەدى، قاتەلەسپەسەم. ءبىز ءبارىمىز ءتورت پودەزدەن تۇراتىن ءبىر عيماراتتا پاتەر جالداپ تۇراتىنبىز. ءبىر كۇنى تۇندە ا.مۇحامەدي ۇلى بولمەمە كىرىپ، ونىمەن بىرگە قىزمەتتىك بولمەگە بارۋعا ۇسىنىس جاسادى. تۇسىنگەنىم، ول جاقتا بازبىرەۋلەر مەنى تاعاتسىزدانا كۇتىپ وتىر ەكەن. ساعاتقا قاراسام، تۇنگى ءتورت. وعان ەشقايدا بارمايتىنىمدى ايتتىم. ول قويار دا قويماي «ءجۇر، كيىن، دايىندال!» دەدى. يىعىما قولىن قويدى. قولىن قاعىپ جىبەرىپ، ىزالاندىم. «جارايدى» دەپ ەسىكتەن شىققان مينيستر مەنىڭ شىقپاسىمدى تۇسىنگەن سوڭ قايتا كىرىپ بۇل ارەكەتىمە ءالى وكىنەتىنىمدى جەتكىزدى.سول كۇننەن باستاپ قۋدالاۋعا ءتۇستىم. مەنى قالاي جۇمىستان شىعارارىن بىلمەي ءجۇردى. ۇزىنقۇلاقتان ەستىگەنىم – مەنىڭ كاسىبي بىلىكتىلىگىم ناشار ەكەن.
2000 جىلدىڭ 10 قازانىندا مۇحامەدي ۇلى ۇرمەلى وركەستر مۋزىكانتتارىنا ۇيىمداستىرعالى جاتقان كونكۋرس جايلى ايتادى. ەرەجە بويىنشا، مۇنداي ءىس-شارانىڭ بولاتىندىعىن ءبىر جەتى بۇرىن ەمەس، ەكى اي بۇرىن ەسكەرتۋى ءتيىس. 17 قازان كۇنى نارازىلىعىمىزعا قاراماستان كونكۋرس باستالىپ كەتتى. ماعان ءبىر نوتا دا ورىنداۋعا مۇمكىندىك بەرىلمەدى. قىسقاسى، اۋزىمدى اشتىرمادى. الدى دا جۇمىستان بوساتتى. ول ازداي «جۇمىستان ءوز قالاۋىڭمەن كەت» دەپ كەڭەس بەرىلدى. مەن بولسام ۇزىلدى-كەسىلدى ودان باس تارتتىم. ماقساتى – مەنى كەتىرىپ، ورنىما ءوز ادامىن الىپ كەلۋ. ناتيجەسىندە زاڭ بويىنشا مەنى جۇمىستان شىعارۋ ءۇشىن نەشە ءتۇرلى امالدار قاراستىرىلا باستادى.
روزانىڭ ايتۋى بويىنشا، مۇنداي ادام مادەنيەت جانە سپورت مينيسترلىگىن باسقارا المايدى. باسقارماۋى ءتيىس. سەبەبى العانى – پارا، سويلەگەن ءسوزى – داقپىرت مەن ماداقتاۋ، اتقارعان ءىسى – قىزمەتتىك باسىن اسىرا پايدالانۋ. جالپى، مۇحامەدي ۇلىنىڭ مۇنداي لاۋازىمعا تاعايىندالۋى شىعارماشىلىق ورتادا تاڭ قالىس، نازارىلىق تۋعىزدى. تاعى ءبىر جازىقسىز جان جاپا شەكپەسىنشى دەپ شىندىقتى ايتۋدى ءجون سانادىم. ول قىزمەتتەن بوساتىلۋى، لايىقتى جازاسىن الۋى ءتيىس.
پرەزيدەنت وركەسترىنە كەلسەك، ءبىز «تاپسىرىس بويىنشا ايتقان جەرلەرىنە بارىپ، ونەر كورسەتەتىنبىز». ءوزىمىزدى بارىپ كەل-شاۋىپ كەل سەزىنەتىنبىز. پرەزيدەنت وركەسترى دەگەن ادەمى اتاۋى عانا. مەرەكەلىك كوستيۋم كيگەنمەن كوڭىل-كۇيىمىز مەرەكەلىك ەمەس ەدى. بارماعان جەرىمىز جوق. «كولگەيت – الەمدەگى №1 ءتىس پاستاسى» دەگەن جيىنسىماق ءوتىپ جاتسا، ءبىزدىڭ بارماۋىمىز مۇمكىن ەمەس ەدى. ستوماتولوگتار دالىزدە ءبىزدى ۋرالاپ قارسى الاتىن. تەك تۋعان كۇندەردە عانا بوي كوتەرمەپپىز. تاپسىرىس بەرۋشى ستوماتولوگتار مىسالى «وزگەشە ءبىر دۇنيە» ورىنداپ بەرىڭىزدەر دەسە، وركەستر تاڭ قالعاننان ءبىر ورىندا قاتىپ قالاتىن. مۋزىكانتتار سەبەبى مارشتان باسقا ەشتەڭە ويناي المايدى. بىزدەن كلاسسيكالىق تۋىندى، ۆالس اۋەنىن كۇتەتىن. مينيستر: «ايتەۋىر ءبىر نارسە ويناڭدار!» دەپ بۇيىراتىن. مۇنداي جاعدايلار ءجيى ورىن الۋشى ەدى.
روزا: مەن مۇنى كەك قايتارۋ ءۇشىن ايتىپ جاتقان جوقپىن. جاپا شەككەن قىزدىڭ جالعىز ەمەستىگىن دالەلدەگىم كەلەدى. ءاتى-جونىمدى، وزىمە قاتىستى بارلىق دەرەكتەردى اشىق جازىپ وتىرمىن. 1999-2000 جىلدارى كىلەڭ ەركەكتەن تۇراتىن وركەستر كوللەكتيۆىندە قىزمەت ىستەگەن جالعىز ايەلدى ەسكە ءتۇسىرۋ قيىن بولمايدى. بولمەگە كىرمەگەنىن، جۇمىستان سەبەپسىز شىعارعانىن راستاماي كورسىن...
وتكەن-كەتكەندى ۇمىتقانىم قاشان. ىزا-وكپەگە ورىن جوق. سول كەزدە جۇمىسسىز، ۇي-كۇيسىز قالعانىم جانىما قاتتى باتقان ەدى. مەن تەك ا.مۇحامەديۇلىن جان-جاقتى تەكسەرىپ شىققانىن قالايمىن. قۇقىق قورعاۋ ورگاندارى بۇل ىسپەن اينالىسسا، نەشە ءتۇرلى بىلىق اڭگىمە شىعاتىنىن، «قىزىقتىڭ كوكەسى» ەندى باستالاتىندىعىنا سەنىمدىمىن. روزا ءاربىر ايتقان سوزىنە جاۋاپ بەرۋگە دايىن ەكەنىن جەتكىزدى. سوتتان دا قاشپايدى. وسى مالىمدەمەسىنەن باس تارتپايدى.
«ەڭلىككە ءبارى تارتپا باس سالدى. ونى قورقىتىپ، ۇرەيلەندىرىپ، قىسىم جاساۋدا. جاس قىز ءوزىن قالاي قورعارىن بىلمەۋى مۇمكىن. مەن شىندىق دەتەكتورىنان (پوليگراف) دا مالىمدەمەمدى قايتالاۋعا دايىنمىن. قايتالاپ ايتايىن، ايتقانىم شىندىق بولعاسىن اۋزىمنان شىققان ءار سوزگە باسپەن جاۋاپ بەرە الامىن» دەيدى روزا.
سونىمەن قاتار روزا باقتىعالييەۆا ەڭلىككە قۇقىق قورعاۋ ورگاندارى تاراپىنان قولداۋ مەن قورعاۋ كورسەتىلسە دەپ ءوتىنىش ايتتى. سەبەبى قوعام تارىپىنان بولسىن، جاقىندارىنان بولسىن ەڭلىككە ءقازىر قىسىم جاسالۋدا. ءمينيستردىڭ نازارىنا ىلىككەن ەڭلىك ەكەۋى عانا ەمەس ەكەندىگىنە سەنىمدى.
ەسكە سالايىق، ق ر مادەنيەت جانە سپورت ءمينيسترى ارىستانبەك مۇحامەديۇلىنا كەزىندە ءوزى باسشىلىق جاساعان وقۋ ورنىنىڭ تۇلەگى ەڭلىك سىدىقوۆا ەسىمدى ازاماتشا «قىرىندادى» دەپ ۆيدەومالىمدەمە جاساۋ ارقىلى ايىپ تاققان بولاتىن.
