كەشە ۇلتتىق قاۋىپسىزدىك كوميتەتىنىڭ قىزمەتكەرلەرى الماتىدا تەراكت جاساماق بولدى دەگەن كۇدىكپەن قولعا تۇسىرگەن ءۇش ازاماتتىڭ ءبىرى كاملەتتىك جاسقا تولماعانى بەلگىلى بولدى، - دەپ حابارلايدى Qamshy.kz NewTimes.kz-كە سىلتەمە جاساپ.  سەنىمدى دەرەككوزدىڭ حابارلاۋىنشا، كۇدىكتىلەردىڭ ءبىرىنشىسى 10 قازان كۇنى ساعات تاڭعى سەگىز جارىمدا الماتىداعى چايكوۆسكيي كوشەسىندەگى ءبىر جالدامالى پاتەردە ۇستالعان. ۇقك دەپارتامەنتى مەن الماتى ءىىد ەكسترەميزممەن كۇرەس باسقارماسى قىزمەتكەرلەرى ۇستاعان ازامات 1982 جىلى تۋعان الماتى وبلىسىنىڭ تۇرعىنى بولىپ شىقتى. پاتەردەن ەرىتكىش سۇيىقتىق قۇيىلعان شىنى بوتەلكە، ديامەترى 9-12 مم بولاتىن پودشيپنيكتەر تولتىرىلعان پلاستيك قۇتى، 9 قوراپ گيدروپەريد، SIM-كارتالارى جوق، الايدا، مەتالل سىممەن گايكا، گەلەر مەن بولتتار سالىنعان پاكەتكە جالعانعان ەكى قالتا تەلەفونى، 6 پاكەت سەليترا، 2 بەتپەردە، قارا ءتۇستى ءدىني سيمۆوليكاسى بار تۋ مەن ۇقكد، ءىدد ورنى بەلگىلەنگەن الماتى قالاسىنىڭ كارتاسى تاركىلەنگەن.

كەلەسى كۇدىكتى دە ءدال سول ك.ءنى ساعات 14.30-دا قولعا تۇسكەن. ونى پوليسيا كورچاگين كوشەسىندەگى ۇيدە ۇستاعان. كۇشتىك قۇرىلىمدار ول جەردەن دە ءدىني سيمۆوليكا بەلگىلەنگەن قارا ءتۇستى تۋ مەن 16-كاليبرلى 4 پاترون تاپقان. ۇستالعان كۇدىكتى 17 جاستا ەكەنى ايتىلادى.

ءدال وسى ۋاقىتتا العاباس ەلدى مەكەنىندە 1996 جىلى تۋعان ءۇشىنشى كۇدىكتى قولعا تۇسكەن.

ۇستالعانداردىڭ ۇشەۋى دە ءقازىر ۇقكد تەرگەۋ يزولياتورىنا قامالعان.

ەستەرىڭىزگە سالساق، بۇعان دەيىن ۇقك الماتى اۋماعىندا قۇقىققورعاۋ ورگاندارى قىزمەتكەرلەرىنە قارسى لاڭكەستىك ارەكەت ۇيىمداستىرۋدى جوسپارلاعان راديكالدى توپتىڭ ءۇش مۇشەسى ۇستالعانىن حابارلاعان بولاتىن.