وڭتۇستىك قازاقستان وبلىسىندا جازعى ءداندى داقىلداردى جيناۋ جۇمىستارى تولىعىمەن اياقتالدى. بيىل وبلىس ديحاندارى استىق وسىرۋدە وزىق تەحنولوگيالاردى، ونىڭ ىشىندە تەرەڭ قوپسىتۋ ءادىسىن قولدانا وتىرىپ، ۇلكەن كورسەتكىشتەرگە قول جەتكىزدى دەپ حابارلايدى وبلىستىق اكىمدىگىنىڭ باسپا ءسوز قىزمەتى.
وڭتۇستىكتىڭ شارۋالارى 214،4 مىڭ گا جەرگە ەگىلگەن ماساقتى ءداندى داقىلداردىڭ ءار گەكتارىنان 22 سەنتنەردەن، بارلىعى 470 مىڭ توننا ءونىم جينادى. بۇل قازاقستاننىڭ ەگەنمەندىك العان جىلداردان بەرگى ءوڭىر ديحاندارىنىڭ جەتكەن جەتىستىگى دەپ بىلەمىز.
ماسەلەن، قازىعۇرتتا 42 مىڭ گا جەرگە ەگىلگەن استىقتان گەكتارىنا 26،5 ست، تولە بي اۋدانى 20،6 مىڭ گا استىقتىڭ ءار گەكتارىنان 26 سەنتنەردەن ءونىم السا، تۇلكىباستىق شارۋالار 24،8 مىڭ گا القاپتان 25،2 سەنتنەردەن ءونىم العان.
سونىمەن قاتار، وبلىستا داندىك جۇگەرىنى ورۋ ناۋقانى باستالىپ، 40،1 مىڭ گەكتار جەرگە ەگىلگەن جۇگەرىنىڭ بۇگىندە 3،3 مىڭ گا ورىلدى. ونىڭ گەكتارىنان 42،4 سەنت، بارلىعى 13،8 مىڭ توننا ءونىم جينالدى. ال 74 مىڭ گەكتار جەرگە ەگىلگەن ماقسارىنىڭ بۇگىندە 28،7 مىڭ گا ورىلىپ، ودان 20،1 مىڭ توننا ءونىم جينالىپ وتىر. الدىن-الا ەسەپ بويىنشا ديقاندار ءار گەكتارىنان 7 سەنتنەردەن جالپى 52 مىڭ توننا ءونىم جيناۋدى جوسپارلاۋدا. جالپى العاندا وبلىستا وسى جىلى ءداندى داقىلداردان 660 مىڭ توننا ءونىم جينالادى دەپ كۇتىلۋدە.
ايتا كەتەيىك، وڭتۇستىك ديقاندارىنىڭ مول استىققا كەنەلۋىنە مەملەكەتتىك "اگروبيزنەس 2020" باعدارلاماسى سەپ بولىپ وتىر. قازاقستان رەسپۋبليكاسىندا اگروونەركاسىپتىك كەشەندى دامىتۋ جونىندەگى 2013-2020 جىلدارعا ارنالعان «اگروبيزنەس-2020» باعدارلاماسى ەلىمىزدىڭ اگروونەركاسىپتىك كەشەنى سۋبەكتىلەرىنىڭ باسەكەگە قابىلەتتىلىگىن ارتتىرۋعا جانە قازاقستاندا جالپى اۋىل شارۋاشىلىعى سالاسىن دامىتۋعا باعىتتالعان. اگروونەركاسىپ كەشەن سۋبەكتىلەرىن سۋبسيديالاۋ ەسەبىنەن اۋىل شارۋاشىلىعىن مەملەكەتتىك قولداۋ كولەمىن 2020 جىلى 4،5 ەسە ۇلعايتۋ كوزدەلگەن. باعدارلامانى 2013 – 2020 جىلدارى ىسكە اسىرۋعا رەسپۋبليكالىق جانە جەرگىلىكتى بيۋدجەتتەردە كوزدەلگەن جالپى شىعىستار بارلىعى 3 122،2 ميلليارد تەڭگەنى قۇراسا، ونىڭ ىشىندە 2016 جىلى – 340،7 ميلليارد تەڭگە ءبولىنىپ وتىر.
