اتىراۋداعى №2 قىلمىستىق ىستەر بويىنشا سوتىندا بۇگىن ازاماتتىق بەلسەندىلەر ماكس بوقايەۆ پەن تالعات اياننىڭ ۇستىنەن قوزعالعان قىلمىستىق ءىس بويىنشا سوتتىڭ الدىن الا تىڭداۋى باستالدى، - دەپ حابارلايدى Qamshy.kz ازاتتىققا سىلتەمە جاساپ.

ازاتتىق ءتىلشىسىنىڭ حابارلاۋىنشا، سوتقا سۋديا گۇلنار داۋلەشوۆا ءتوراعالىق ەتىپ جاتىر. سوتقا وزگە دە ايماقتاردان قۇقىق قورعاۋشىلار، وبلىس تۇرعىندارى، قۇلسارى مەن بىرەنەشە اۋداننان ادامدار قاتىسۋعا كەلدى. سوت وتەتىن عيماراتتا باقىلاۋ كۇشەيتىلدى. ب ا ق وكىلدەرىنە سوت زالىنان فوتو جانە بەينە جازبا تۇسىرۋىنە بەس مينۋتقا عانا رۇقسات بەرىلىپ، ودان سوڭ بولەك بولمەگە شىعارىپ جىبەردى.

سوت باستالعاندا بوقايەۆ پەن اياننىڭ ادۆوكاتى تولەپقالي ايانوۆ سۋديا گۇلنار داۋلەشوۆانى ىستەن شەتتەتۋ تۋرالى ءوىتىنىش جاسادى. تولەپقالي ايانوۆ سوت تەرگەۋىنىڭ ايىپتاۋ اكتىسى 30 قىركۇيەكتە دايىن بولعانىمەن، ول سول كۇنى ەمەس، 3 قازاندا جاريالانعانىن، ال ءىس ماتەريالدارى 73 تومنان تۇراتىندىقتان ونى وسى ارالىقتا سوتتىڭ ونىمەن تانىسىپ شىعۋى مۇمكىن بولماعانىن ايتتى.

«سۋديا ايىپتاۋ اكتىسى شىققان سوڭ ونى بىردەن رەەسترگە ەنگىزۋى ءتيىس ەدى، ءبىراق ونى ۋاقىتىندا ەنگىزبەگەن. بۇل دەگەنىمىز سوت ءىسىن فالسيفيكاسيالاۋ دەپ سانالاتىندىقتان سۋديانى ىستەن شەتتەتۋدى سۇرايمىن»، - دەدى ادۆوكات.

بۇدان سوڭ سۋديا وتىنىشكە قاتىستى شەشىم قابىلداۋ ءۇشىن بەس مينۋتتىق ءۇزىلىس جاريالادى. ۇزىلىستەن سوڭ سوتقا وزگە دۇيسەبالييەۆا دەگەن سۋديا كەلىپ، ادۆوكاتتىڭ ءوتىنىشى قاناعاتتاندىرىلمايتىنىن ايتىپ، سوت زالىنان شىعىپ كەتتى. وسى كەزدە ماكس بوقايەۆ «ەشنارسە ەستىلگەن جوق، سۋديا دۇرىس وقىمادى» دەپ نارازىلىعىن ءبىلدىردى. بۇل سۋديا اقىرىن سويلەگەندىكتەن نە ايتقانى سوت بارىسىن وزگە بولمەدە مونيتور ارقىلى تىڭداپ وتىرعان جۋرناليستەرگە دۇرىس ەستىلمەدى.

سوتقا كەلگەن قۇقىق قورعاۋشى امانگەلدى شورمانبايەۆ «ەگەر سوتتىڭ الدىن الا وتىرىسىنىڭ ءوزى وسىنداي جاعدايدا وتسە، وندا بۇل پروسەستىڭ شىنايى وتەتىنىنە كۇمانىم زور»، - دەدى.

بۇدان سوڭ سوتتا تۇستەن كەيىنگە دەيىن ءۇزىلىس جاريالاندى.

ماكس بوقايەۆ پەن تالعات ايان 24 ءساۋىر كۇنى اتىراۋ قالاسىندا جەر رەفورماسىنا قارسىلىق رەتىندە وتكەن جاپپاي ميتينگتەن سوڭ قاماۋعا الىنعان. ماكس بوقايەۆ پەن تالعات ايانعا ءبىرقاتار قىلمىستىق باپتار («الەۋمەتتىك ارازدىق تۋعىزۋ»، «توتەنشە جاعداي رەجيمىندە جالعان اقپارات تاراتۋ»، «ميتينگىلەر وتكىزۋ ءتارتىبىن بۇزۋ») بويىنشا ايىپتارى تاعىلعان. ازاماتتىق بەلسەندىلەر بۇل ايىپتاردىڭ ەشقايسىسىن مويىنداعان جوق. قاماۋداعى ماكس بوقايەۆتىڭ تۋىستارى ونىڭ دەنساۋلىعىنا الاڭدايدى.

10 قازاندا Human Rights Watch حالىقارالىق ۇيىمىنىڭ ەۋروپا جانە ورتالىق ازيا بويىنشا زەرتتەۋشىسى «ماكس بوقايەۆ پەن تالعات ايان قارسىلىق ءبىلدىرۋ قۇقىعىن پايدالانعانى ءۇشىن دە، وزگەلەردى قارسىلىق بىلدىرۋگە شاقىرعانى ءۇشىن دە قامالماۋى ءتيىس. ۇكىمەت ساياساتىنا قارسىلىعىن ءبىلدىرۋ - قىلمىس ەمەس» دەپ مالىمدەگەن.

ۆيدەو "اقجايىق" سايتىنان الىندى