الەۋمەتتىك جەلىلەر مەن ۇيالى بايلانىس مەسسەندجەرلەرىنە جيلسترويبەك ەسىمى بەرىلگەن ءسابيدىڭ تۋۋ تۋرالى كۋالىگىنىڭ فوتوسى تاراي باستادى،- دەپ حابارلايدى Qamshy.kz قازاقپاراتقا سىلتەمە جاساپ.

عالامتور قولدانۋشىلارى اتا-انالار تۇرعىن ءۇي جيناق بانكىنەن باسپانا العاننان كەيىن ءوز بالاسىنا سونداي ەسىم قويۋعا شەشىم قابىلداعانىن ايتادى. الايدا بانكتىڭ استاناداعى باس كەڭسەسى اتالعان اقپاراتتى راستاعان جوق.

فوتوداعى مالىمەتتەرگە سەنسەك، تۋۋ تۋرالى قۇجات وڭتۇستىك قازاقستان وبلىسىنىڭ شىمكەنت قالاسىندا بەرىلگەن. جيلسترويبەكتىڭ تەگى - باتىربەك. اكەسىنىڭ اتى - ەركەبۇلان.

ءبىز تۇرعىن ءۇي قۇرىلىسى جيناق بانكىنىڭ استاناداعى باس كەڭسەسىنە حابارلاسىپ، عالامتور ارقىلى تاراعان فوتونىڭ شىن-وتىرىگىن بىلگەن ەدىك. بانك قىزمەتكەرلەرى ول جاڭالىق تۋرالى ەستىگەن. دەگەنمەن، ونى راستاپ وتىرعان جوق.

«بۇل فوتو كوللاج دا بولۋى ابدەن مۇمكىن. ءبىزدىڭ بانكتى جارنامالاۋدىڭ ءبىر ءادىسى شىعار. ءبىراق ول جاڭالىقتى راستاي المايمىز»، - دەيدى ولار.

الەۋمەتتىك جەلىلەر ارقىلى تارالعان قۇجاتتىڭ ءتۇپنۇسقالىعى راستالماسا دا، عالامتور قولدانۋشىلارى بۇل جاڭالىقتى ءاجۋاعا اينالدىرىپ، تۇرعىن ءۇي قۇرىلىس جيناق بانكى ارقىلى باسپانا العان وتباسىلارعا بالاعا ات قويۋدىڭ جاڭا ۇلگىلەرىن ۇسىنا باستادى.

«بالانىڭ اتى قازاقشا جازىلسا، ونىڭ اتى جيلسترويبەك ەمەس، تۇرعىنۇيقۇرىلىسجيناقبەك بولۋى كەرەك قوي»، - دەپ جازدى بىرەۋ. «قىز تۋسا، جيلسترويگۇل دەپ قويامىز!»، - دەيدى تاعى ءبىر قولدانۋشى.