«قازاق ءۇنى» گازەتىندە جاريالانعان ماقالاسىندا اقىن مادەنيەت جانە سپورت ءمينيسترى ارىستانبەك مۇحامەدي ۇلىنىڭ اتىنا ايتىلعان ايىپتاۋلاردى قازاققا جات قىلىق دەپ باعالاعان، - دەپ حابارلايدى Qamshy.kz.
ءبىز ەگەمەن ەلىمىزدىڭ 25 جىلدىعىندا بيىك بەلەستەردى باعىندىرىپ كەلەمىز، ەلباسىمىزدىڭ سارابدال ساياساتىنىڭ ارقاسىندا قارىشتى قادامدار جاساپ جاتىرمىز، ەل ەڭسەسى تىكتەلىپ، ەكونوميكامىز دا، مادەنيەتىمىز دە ىلگەرى دامىپ، ەل ساناساتىن دارەجەگە جەتتىك. اللاعا شۇكىر! وسىنداي جەتىستىكتەرىمىزدىڭ ارقاسىندا قازاق حالقىن الەم تانىپ وتىر. الدىمىزدا ەكسپو كەلە جاتىر، بۇل دا زور جەتىستىگىمىزدىڭ بىرەگەيى دەپ بىلەمىن.
وكىنىشكە وراي، بۇگىنگى قوعامدا كەلەڭسىز وقيعالار دا ءجيى ورىن الىپ جاتىر. كەشەگى كۇنگى مادەنيەت جانە سپورت مينيسترىنە قاتىستى الىپ-قاشپا اڭگىمەنى تاراتۋ ءوز باسىم قىلمىس دەپ بىلەمىن! وسىنى ۇيىمداستىرىپ وتىرعانداردىڭ وزدەرىن كىنالى دەپ تانۋ كەرەك.
بىرىنشىدەن، كەز كەلگەن ادامدى بەس-التى جىلدان كەيىن ايىپتاۋ – ازاماتتىق قۇقىقتى بۇزۋ دەگەن ءسوز. بىرەۋدىڭ اتىمەن بىرەۋگە قيانات جاسايتىن ازاماتتار زاڭ بويىنشا جازاعا تارتىلۋعا ءتيىس دەپ ويلايمىن. ەكىنشىدەن، مۇنىڭ ارتىندا تۇرعان ءبىرقاتار ازاماتتار بار ەكەن. قوعامدا ول تۋرالى اڭگىمە بار. مۇنى قىزدىڭ جالعىز ءوزىنىڭ ارەكەتى دەگەنگە كۇدىكتەنەمىن. كەيىنگى كەزدە، بىرەۋدى قارالاپ، كۇيە جاعاتىندار قاتارىندا ءبىرقاتار ادامداردىڭ تۇرعانى ۇياتتى جاعداي. جالپى، ءبىزدىڭ مادەنيەتكە، سالتىمىزعا، داستۇرىمىزگە جاتپايتىن، جات قىلىق بۇل. وكىنىشكە وراي، سوڭعى كەزدەرى ۇلكەندى سىيلاماۋ، كىسىنى قادىرلەمەۋ بەلەڭ الىپ بارادى. ءتىپتى، ار-ۇياتتان اتتاپ، نامىستان بەزىپ بارامىز…
بۇنىڭ ار جاعىندا باسقا ءبىر ماسەلە تۇر، كىم ايتسا دا. قازاقتىڭ ازاماتتارى، ەر ازاماتتارى ۇساق-تۇيەك شارۋامەن اينالىسپاۋى كەرەك، ارى-بەرىدەن سوڭ. بىرەۋدىڭ قولتىعىنا سۋ بۇركىپ… ەلدى دۇرلىكتىرۋدىڭ قاجەتى قانشا؟ باسقا دا شارۋالار جەتىپ جاتىر عوي… بۇل ەندى ۇيات ەمەس پە؟
مىناۋ – قازاقتىڭ ازاماتىنىڭ، قازاقتىڭ قىزىنىڭ شارۋاسى ەمەس. مۇنى ازاماتتارىمىزدىڭ ۇساقتالعانىنىڭ، قىزدارىمىزدىڭ كورگەنسىزدىككە بوي الدىرعانىنىڭ بەلگىسى دەپ ۇعامىن.
ازاماتقا جالا جابۋ – ۇيات! سوندىقتان، زاڭ جونىنەن كەلسە دە، ادامگەرشىلىك جونىنەن كەلسە دە، مىناداي ازاماتتى مۇقاتۋ ءۇشىن، ونى باسقا ءبىر ماقساتتارمەن اياعىنان ءسۇرىندىرۋ ءۇشىن ەلدىككە، ءتىپتى قازاققا، كىسىلىككە جاراسپايتىن ارەكەتكە بارۋ – قازاقتىڭ قىزدارىنا ۇيات نارسە! وسىنى قوستاپ جاتقان ازاماتتاردىڭ تۇلعاسىنا، كىسىلىگىنە ۇيات نارسە!
مەن بۇل قىز بالا قوعام الدىندا ءوزىنىڭ وسى ىس-ارەكەتى ءۇشىن ۇيالىپ، كەشىرىم سۇراۋى ءتيىس دەپ ويلايمىن.
ءبارىمىز دە ادامبىز، ءبارىمىز دە ازاماتپىز. سوندىقتان، ارىستانبەكتىڭ سىرتىنان ايتىلىپ جاتقان سوزدەر شىندىققا جاناسپايدى.
ءوز باسىم ارىستانبەكتى جاستايىنان بىلەمىن. ءوز سالاسىنىڭ شەبەرى. بەلگىلى قوعام قايراتكەرى. ەلباسىمىزدىڭ تاپسىرمالارىن جاۋاپكەرشىلىكپەن ورىنداپ كەلە جاتقان ازامات. ول مينيسترلىككە كەلگەلى بەرى قانشاما ءىستى ايانباي اتقارىپ، ىسكەرلىگىن دالەلدەپ كەلەدى.
ارىستانبەك – مادەنيەتتىڭ، ونەردىڭ سالاسىمەن بىتە قايناسىپ، سول ءۇشىن جارالعان ادام.
نەسىپبەك ايت ۇلى،
اقىن، مەملەكەتتىك سىيلىقتىڭ لاۋرەاتى
