ءدىن ىستەرى كوميتەتىنىڭ وكىلى «دياپوزون» اقتوبەدە 5 ماۋسىم كۇنى بولعان تەراكتىگە قاتىسقان راديكالداردىڭ قالايشا تەرىس اعىم جەتەگىندە كەتكەنىن ايتىپ بەردى، - دەپ حابارلايدى Qamshy.kz.

كوميتەتتىڭ ءدىني ساراپتاما باسقارماسىنىڭ باسشىسى بالعابەك مىرزايەۆتىڭ ايتۋىنشا، اقتوبەدەگى راديكالدار بىرنەشە توپقا بولىنەتىن كورىنەدى. ول مىسال رەتىندە ماۋسىم ايىنىڭ باسىندا تەراكت جاساعان تاڭاتاروۆ پەن ايتۋعان توبىن كەلتىرە وتىرىپ، اتالعان توپتار قاتارىن قالاي تولىقتىراتىنىن ايتىپ بەرگەن.

«مەن تۇزەۋ مەكەمەسىنە بارىپ سويلەسكەن سوتتالعان جىگىتتەردىڭ ءبىرى ادامداردىڭ راديكالدارعا قالاي قوسىلاتىنىن ايتىپ بەردى.  بۇل ونىڭ ءوزىنىڭ باسىنان كەشكەنى بولۋى دا مۇمكىن. بىرەۋدىڭ كەلىنشەگى اۋىرىپ قالىپ، اقشا كەرەك بولعان. قارىز سۇراعاندا ەشكىم بەرە قويماعان. ءبىراق، تانىستارى ارقىلى وعان بىرەۋلەر حابارلاسىپ 40 مىڭ تەڭگە ۇسىنعان. كەيىن ول قارىزدى قالاي قايتارۋدىڭ جولىن دا ايتقان. ول ءۇشىن الگى ادامدارمەن بىرگە بۇرىن قولدانىلعان قالتا تەلەفوندارىن ارزانعا ساتىپ الىپ، ساتۋمەن اينالىسۋ كەرەك بولادى. ءتىپتى، جۇمىستى باستاۋ ءۇشىن باستاپقى كاپيتال رەتىندە 100 مىڭ تەڭگە اقشا جانە بەرەدى. وسىلايشا جۇمىس باستالىپ كەتەدى. ءبىراز ۋاقىتتان سوڭ وعان ءدىني لەكسيالار جازىلعان اۋديوجازبالار بەرەدى. ءسويتىپ، ول جىگىت راديكال توپتىڭ قۇرامىنا وتەدى. ولار نەگىزىنەن مەشىتكە كوپ بارمايدى، ءوز پاتەرلەرىندە جينالىپ، ۋاعىز تىڭدايدى. تاڭاتاروۆ پەن ايتۋعان توبى دا وسىنداي»، - دەگەن ب. مىرزايەۆ.

مامان راديكالدار قاتارىن تولىقتىرۋ ءۇشىن قيىن جاعدايداعى كىسىلەرگە كومەكتەسۋ ءادىسى پايدالانىلعان. كەلەسى ءادىس – ادامداردىڭ ەموسياسىنا اسەر ەتۋ، ولاردى «ادىلەتسىزدىكتەرگە» قارسى قويىپ، «زارداپ شەككەن ادامدارعا» اياشۋلىلىق تۋعىزۋ.

«راديكالدار ءوز مۇشەلەرىن سيريادا مۇسىلماندار جازىقسىز قىرىلۋدا، ال، ولاردىڭ ايەلدەرىنىڭ ارى تاپتالۋدا دەپ الدايدى. سوسىن بارىپ ەلدىڭ ەموسياسىنا اسەر ەتەدى. «مۇسىلماندارعا ءبىز اراشا تۇسپەسەك، كىم اراشا تۇسەدى؟ انا دۇنيەدە سەندەر مۇسىلمانداردىڭ بەتىنە قالاي قارايسىڭدار؟» دەگەندەي سوزدەر ايتادى. شەت قالعان ادامدار و دۇنيەدە توزاققا بارادى دەپ قورقىتادى. وسىنداي ۋاعىزدارعا ءدىني ءبىلىمى جوق ادامدار يلانادى. ولار راديكالداردىڭ جەتەگىندە كەتەدى. ولارمەن سويلەسكەندە ءبىر كەزدەرى اقتوبە وبلىسىنا كەلىپ، ۋاعىز جۇرگىزگەن رەسەيلىك سودىر سايد بۋرياسكييدىڭ ىقپالى قاتتى بولعانىن بىلدىك»، - دەيدى كوميتەت وكىلى.