ەراسىل اۋباكىروۆكە قاتىستى ىستەگى ايان مەيىربايەۆتىڭ قورعاۋشىسى ەرلان ءبىلالوۆ باسپا ءسوز ءماسليحاتىن وتكىزىپ، زارداپ شەگۋشىنى كىم، قالاي، نە ءۇشىن ولتىرگەنىن، سونداي-اق، ءوزى قورعاپ شىققان ايان مەيىربايەۆتىڭ پسيحيكاسى بۇزىلعانىن ايتىپ بەردى،-  دەپ حابارلايدى  Qamshy.kz قازاقپاراتقا سىلتەمە جاساپ.

 «ءسوزىمنىڭ باسىن ايان مەيىربايەۆتىڭ دەنساۋلىعىنا قاتىستى اقپاراتتان باستاسام. ايان مەيىربايەۆ بولعان وقيعالاردان كەيىن پسيحيكالىق سوققى الىپ، ەم قابىلداۋ ۇستىندە. زارداپ شەگە تۇرا، تۇرمەگە وتىرىپ شىعۋ - وتە قاتتى پسيحولوگيالىق جاراقات. ونىڭ پسيحيكاسى ازداپ بۇزىلدى...»، - دەيدى ءبىلالوۆ.

سوندىقتان دا، بەلگىلى كاسىپكەر مەيىربايەۆتىڭ ۇلى ايان ەم قابىلداپ، پسيحيكاسىن شەتەلدە ەمەس، قازاقستانداعى اۋرۋحانالاردىڭ بىرىندە قالپىنا كەلتىرىپ جاتىر ەكەن.

«الگى ۆيدەو حالىقتى ءدۇر سىلكىندىردى. كوپ پىكىر ايتىلدى، ايان مەيىربايەۆتى ادام ءولتىردى دەپ كىنالادى. ءبىراق، ايان مەيىربايەۆتىڭ بۇل قىلمىسقا قاتىسى جوق. بۇل سوتالدى تەرگەۋ بارىسىندا دالەلدەندى. ايان مەيىربايەۆ زارداپ شەككەنىن دالەلدەپ، زارداپ شەگۋشى رەتىندە جاۋاپ بەردى. وقيعا بىلاي بولعان: ايان مەيىربايەۆ كوتتەدجگە كەلگەن كەزدە ونىڭ اياق-قولى بايلاندى. باسىنا پاكەت كيگىزىپ، قولىنا كىسەن سالعان، كوزى مەن اۋزىن بايلاعان. سوسىن وعان اياماي اراق بەرگەن. كۇشپەن اراق بەرىپ، ماس قىلدىرعان. ءبىزدىڭ بولجام بويىنشا، اراققا پسيحوتروپتى زاتتار قوسىلعان. سەبەبى، اياننىڭ كوپ ۋاقىت بويى ازعاسى ۋدان قايتا الماي ءجۇردى»، - دەيدى ءبىلالوۆ.

ءبىلالوۆتىڭ سوزىنە سەنسەك، ەراسىل اۋباكىروۆتى ءولتىردى دەپ 20 جىلعا سوتتالعان نۇربەك ءاجىمباي ايان مەيىربايەۆتىڭ اكەسىنەن 135 ملن تەڭگە كولەمىندە اقشا بوپسالاعىسى كەلگەن. ياعني، وزىمەن بىرگە وقىعان ايان مەيىربايەۆ وعان اكەسىنىڭ جۋىق ارادا وتە قىمبات كەلىسىم جاساعالى جاتقانىن ايتقاننان كەيىن، ءاجىمباي اياندى پايدالانىپ، اقشا تاپپاق بولعان.

سوندىقتان، اياندى دا، مارقۇم ەراسىلدى دا الداپ، كوتتەدجگە الىپ كەلگەن. ءبىراق، ادۆوكات ەراسىل نەگە ءوزى تانىمايتىن ادامدار شاقىرعان جەرگە بارعانىن تۇسىندىرە العان جوق. اياندى ماسايتىپ، وعان «سەن ەراسىل اۋباكىروۆپەن جاقىنداستىڭ» دەيدى.

ال ماس ايان مەيىربايەۆ بۇنى شىن كورىپ، ەراسىل اۋباكىروۆتى جىعىپ الىپ، بۇل شىن با، جوق پا دەپ سۇراپ جاتقان كورىنەدى. مىنە، ءدال وسى ءساتتى ۆيدەوعا تۇسىرگەن ءاجىمباي اياننىڭ اكەسىن بوپسالاي باستايدى.

اۋباكىروۆتىڭ اتا-اناسىنىڭ ادۆوكاتى ايتقانداي، ەراسىلدى قىلمىسكەر قىلقىندىرىپ ولتىرگەن.

مىنە، 2016 جىلدىڭ اقپان ايىندا استانانى عانا ەمەس، قازاقستاندى ءدۇر سىلكىندىرگەن ەراسىل اۋباكىروۆتىڭ ولىمىنە قاتىستى قىلمىستىڭ ءبىز بىلمەي كەلگەن قۇپياسى وسى ەكەن. 12 قازان كۇنى ەراسىل اۋباكىروۆتى ءولتىردى دەگەن نۇربەك ءاجىمباي 20 جىلعا، سىبايلاستارى 11 جىلعا سوتتالدى.