Qamshy.kz رەداكسياسىنا حابارلاسىپ ءوزىن الماتىدا 18 شىلدە كۇنى بىرنەشە پوليسەيدى ءولتىرىپ، بىرنەشەۋىن جاراقاتتادى دەكپ ايىپتالىپ جاتقان رۋسلان كۇلىكبايەۆتىڭ دوسىمىن دەپ تانىستىرعان ازامات كۇلىكبايەۆتىڭ بالا كەزىنەن كيكبوكسينگپەن شۇعىلدانعانىن، وسى سپورت تۇرىمەن اينالىسىپ ءجۇرىپ ءبىرشاما ناتيجەگە جەتكەنىن ايتادى. اتىن اتاماۋدى وتىنگەن ول رەداكسياعا رۋسلان كۇلىكبايەۆتىڭ سپورتتا جەتكەن جەتىستىكتەرىنە ايعاق بولاتىن مەدالدار مەن گراموتا، ديپلومداردىڭ دا سۋرەتتەرىن جولدادى. ايتۋىنشا، كيكبوكسينگپەن شۇعىلدانعان ر. كۇلىكبايەۆتىڭ «سپورت شەبەرلىگىنە كانديدات» دەگەن اتاعى دا بار ەكەن. رۋسلاننىڭ دوسى ونىڭ الماتىداعى قاندى قىلمىسقا بارۋىن تۇرمەدە ءجۇرىپ پسيحولوگياسىنىڭ بۇزۋلىۋمەن بايلانىستىرىپ وتىر.

ر. كۇلىكبايەۆ 1990 جىلى قىزىلوردا وبلىسىندا دۇنيەگە كەلگەن. 1994 جىلى وتباسىمەن تەرەڭوزەك كەنتىنەن بايقوڭىر قالاسىنا كوشىپ بارعان. اكەسى مەن شەشەسى اجىراسقان. ءقازىر اكەسى استانادا تۇرادى، باسقا وتباسى بار. رۋسلان ۇيدە التى اعايىندى ەكەن. رۋسلاننىڭ الدىندا ءبىر اعاسى، ءبىر اپكەسى، ءۇش ءىنىسى بار. 

ەستەرىڭىزگە سالساق، ر. كۇلىكبايەۆ 2010 جىلى 27 تامىزدا كىسى توناعانى ءۇشىن شىمكەنت قالاسى ەڭبەكشى اۋداندىق سوتىنىڭ ۇكىمىمەن شارتتى جازاعا كەسىلىپ، 2012 جىلى زاڭسىز قارۋ ساقتاعانى ءۇشىن قىزىلوردا قالالىق سوتىنىڭ ۇكىمىمەن الدىڭعى جازاسىن قوسا ەسەپتەگەندە ءۇش جارىم جىلعا باس بوستاندىعىنان ايىرىلعانى بەلگىلى.