19 قازان كۇنى حالىقارالىق عارىش ستانسياسىنا ۇشىرىلاتىن «سويۋز مس-02» ترانسپورت كەمەسى بار «سويۋز-فگ» زىمىرانى بايقوڭىردىڭ ۇشۋ الاڭىنا ورناتىلدى، - دەپ حابارلايدى Qamshy.kz قازاقپاراتقا سىلتەمە جاساپ.

«ون التىنشى قازان كۇنى «سويۋز مس-02» كولىكتىك باسقارىلاتىن كەمەسىمەن بىرگە «سويۋز-فگ» تاسىعىش-زىمىرانى بايقوڭىر ايلاعىنىڭ №31 ۇشۋ الاڭىنا شىعارىلدى جانە ۇشىرۋ قوندىرعىسىنا ورناتىلدى»، - دەلىنگەن حابارلامادا.

رەسەي زىمىران-عارىش سالاسىنداعى كاسىپورىنداردىڭ الدىڭعى توپتارى راديوجۇيەلەر جۇمىسىن تەكسەرۋ، ساندىق اقپارات اۋقىمىن تەستىلىك قۇراۋ جانە ەكيپاجدى اۆتوماتتى قۇتقارۋ جۇيەسىن تەستىلەۋ سىندى جۇمىستارعا كىرىسىپ كەتتى. 17 قازان كۇنى عارىش زىمىرانى تولىق سىناقتان وتكىزىلەدى، 18 قازان كۇنى حالىقارالىق عارىش ستانسياسىنا 49/50 ەكسپەديسيا ەكيپاجىنىڭ نەگىزگى قۇرامىن بەكىتىلەتىن مەملەكەتتىك كوميسسيانىڭ وتىرىسى وتەدى، دەپ حابارلادى ريا نوۆوستي.

بۇعان دەيىن «سويۋز مس-02» (№732) باسقارىلاتىن كەمەسىنىڭ تەحنيكالىق اقاۋلارىن جوندەۋ جۇمىستارى تۋرالى ماتەريالداردى مەملەكەتتىك كوميسسيانىڭ قاراعانى جانە حعس ۇشىرۋ مەرزىمىن 19 قازانعا، ماسكەۋ ۋاقىتىمەن 11:05-كە بەلگىلەگەنى حابارلانعان ەدى. كەمە ەكيپاجىنىڭ نەگىزگى قۇرامىندا روسكوسموس عارىشكەرلەرى سەرگەي رىجيكوۆ پەن اندرەي بوريسەنكو جانە ناسا استروناۆتى روبەرت شەين كيمبروۋ بار. دۋبلورلەر - رەسەيلىك عارىشكەرلەر الەكساندر ميسۋركين مەن نيكولاي تيحونوۆ جانە ناسا استروناۆتى مارك ۆاندە حاي.