ءومىر وتەدى دە كەتەدى. ونىڭ ءار ءساتىن قادىرلەي ءبىلۋ كەرەك. ءومىر جولىن ەندى عانا باستاعان ايگۇل قۇسايىنوۆانىڭ ولەر الدىنداعى حاتى وسى ءسوزىمىزدى راستاپ تۇرعانداي. 

وقۋىن ءبىتىرىپ، مەكتەپكە ءمۇعالىم بولىپ ورنالاسقان ايگۇلدىڭ حاتىن «قوستاناي جاڭالىقتارى» باسىلىمى جاريالاپتى. 

«سالەم، مەنىڭ ءاتى-جونىم ايگۇل قۇسايىنوۆ. جاسىم 22-دە.  مەكتەپتە جاقسى وقىدىم. جوعارى وقۋ ورنىن قىزىل ديپلومعا ءبىتىردىم. وقۋدى اياقتاعاننان كەيىن رۋدنىي قالاسىنداعى مەكتەپتىڭ بىرىنە ءمۇعالىم بولىپ ورنالاستىم. ساباق بەرەمىن. ءبىراق، وقۋ-وقۋ دەپ شاپقىلاپ ءجۇرىپ دەنساۋلىعىمدى قۇرتىپ الدىم. دۇرىس تاماقتانعام جوق. ءبارى سودان باستالدى. انىعىندا، باستى بايلىق وسى دەنساۋلىق ەكەن.

اۋرۋدىڭ العاشقى بەلگىلەرى جۇمىسقا تۇرعاننان ساتتەن-اق بەلگى بەردى. كوزىم تۇماندانىپ، باسىم اينالاتىن. سويلەپ تۇرعاندا داۋسىم وزگەرىپ كەتەتىن. كەيىن دارىگەرلەرگە بارىپ ماعان دياگنوز قويدى. قالقانشا بەزىمنەن پروبلەما پايدا بولدى. ەمدىك دارىلەردى قابىلداپ ءجۇردىم. ءبىراق، اسەرى بولعان جوق. ۇيىقتاي المايتىنمىن. ۋاقىت وتە ءجۇرىپ-تۇرۋدان قالدىم. ءتىپتى سويلەۋگە دە شامام كەلمەدى. ويىمدى قاعازعا جازىپ جەتكىزەتىن بولدىم». 

وعان ءتيىستى ەم الۋعا مەكەن-جاي قۇجاتىنىڭ جوقتىعى كەدەرگى بولىپتى. وسى سەبەپتى رۋدنىي قالاسىنىڭ دارىگەرلەرى ونى قابىلداماي قويعان. 

«ول ۋاقىتتا مەن ءجۇرىپ-تۇرا المايتىنمىن. ال دارىگەرلەر مەنى ءبىر كابينەتتەن ەكىنشى كابينەتكە ساندالتتى. مەن ءبىر قاسىق سۋدى جۇتۋعا قينالامىن، ال ولار ماعان ءدارى جازىپ بەردى».

اۋرۋى اسقىنعان ايگۇلدى جاقىندارى رۋدنىيدان 250 شاقىرىم جەردەگى جەتىقارا اۋدانىنىڭ اۋرۋحاناسىنا جاتقىزادى.

«اۋرۋىم كۇن وتكەن سايىن دەندەي ءتۇستى. جانىم قينالدى. كەي كەزدەرى مەنىڭ احۋالىمدى باقىلاپ جۇرگەن دارىگەرلەردەن ماڭگىلىك ۇيقىعا جىبەرەتىن ەكپە سالۋدى وتىنەتىنمىن…». 

ءوز كەزەگىندە دارىگەرلەر ايگۇلدى «بار ءومىرىڭ الدا، قايعىرما» دەپ سابىرعا شاقىرعان. 

«باقىت دەگەن سەنىڭ ءجۇرىپ-تۇرىپ، ىشىپ-جەپ، تىنىس العانىڭ ەكەن عوي. سوعان دا تاۋبە دەۋ كەرەك. ودان ارتىقتىڭ كەرەگى جوق. باقىت دەگەن جانىڭدا اكە-شەشەڭنىڭ، جاقىن باۋىرلارىڭنىڭ بولعانى ەكەن. تەك سولار عانا سەن قينالعان كەزدە كومەك قولىن سوزادى. ءقازىر عانا قولىڭدا بار دۇنيەنى باعالاي ءبىلۋ كەرەكتىگىن ءتۇسىنىپ وتىرمىن. تەك جاقسىلىققا سەنۋ كەرەك. جاقسىلىق جاساۋ كەرەك. مەنىڭ ءومىر سۇرگىم كەلەدى. ءومىر سۇرەرىمە سەنەمىن» دەپ جازعان ەكەن ايگۇل ءوز حاتىندا. 

الايدا اجال اقىرى ونى الىپ تىندى. ايگۇلدىڭ حاتىن جاريالاۋعا ونىڭ اپايى نۇرگۇل قۇسايىنوۆا رۇقسات بەرىپتى.